اتالعان كونتسەرت بارىسىندا نەگىزىنەن كلاسسيكالىق شىعارمالار ورىندالىپ, تىڭدارماننىڭ قۇلاق قۇرىشىن قاندىردى. ەلىمىزگە باريتون داۋىستى ءانشى رەتىندە تانىمال ازامات جىلتىركوزوۆتىڭ ورىنداۋىنداعى مۇقان تولەباەۆتىڭ «ەشكىم دە ۇمىتىلمايدى» ءانى تىڭدارماندى بەي-جاي قالدىرمادى. سونىمەن قاتار قالامقاس جۇماباەۆانىڭ سكريپكامەن ورىنداۋىنداعى قۇرمانعازىنىڭ «سارىارقا» كۇيى, ەرمەك قۇرماناەۆتىڭ ورىنداۋىنداعى احمەت جۇبانوۆتىڭ شىعارمالارى ءساتتى شىققان دۇنيەلەر بولدى.
كونتسەرت بارىسىندا سوپرانو داۋىستى بيبىگۇل جانۇزاق الەم كلاسسيكتەرىنىڭ شىعارمالارىن تىڭدارمان نازارىنا ۇسىندى. بۇل رەتتە ونەرپازدى فورتەپيانو اسپابىندا گاۋھار تاسبەرگەنوۆا سۇيەمەلدەپ, وزدەرىنىڭ شەبەر مۋزىكانت ەكەندىكتەرىن تانىتتى.
استانا قالاسىنىڭ مەرەيلى مەرەكەسىنىڭ قۇرمەتىنە وراي اۋليەاتا اسپانىن انگە بولەگەن ەلوردالىق ونەرپازدار «بالاساعۇن» ورتالىق كونتسەرت زالىنا جينالعان كوپشىلىكتىڭ كوڭىلىن كوتەرىپ, اسقاق رۋح سىيلادى. ادامزاتتىڭ جاۋھارىنا بالانعان كلاسسيكالىق ءان ونەرىنىڭ كەرەمەتىن ايگىلەدى.
كونتسەرت سوڭىندا جامبىلدىقتاردىڭ نازارىنا «استانا – ۇلى دالانىڭ جاۋھارى» اتتى فوتوكورمە ۇسىنىلىپ, اۋليەاتالىق كوپشىلىك الەمگە تانىلعان باس شاھاردىڭ بۇگىنگى كەلبەتىمەن تانىستى. سونىمەن قاتار استانا قالاسىنىڭ ساۋلەتىنە سۇيسىنگەن كورەرمەن دە از بولعان جوق. ال قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى ۇيىمداستىرعان بۇل فوتوكورمە ەلىمىزدە عانا ەمەس, ماسكەۋ, سانكت-پەتەربۋرگ, مادريد, بەرلين, بەيجىڭ, پاريج قالالارىندا جانە استانا مەن الماتى شاھارلارىندا جالعاسىن تاباتىن بولادى.
حاميت ەسامان,
«ەگەمەن قازاقستان»
جامبىل وبلىسى
