جىل سايىن قالامگەرلەردى جاڭا شىعارما جازۋعا ىنتالاندىرىپ, دەمەۋ بولىپ كەلە جاتقان يگى شارا ءوز جەمىسىن بەرە باستادى. تۋعان جەر تاقىرىبىنداعى جاڭا ولەڭدەر مەن پوەمالار دۇنيەگە كەلىپ, وقىرماندارعا ەستەتيكالىق ءلاززات سىيلاپ كەلەدى.
«بايقاۋعا قاتىسۋشىلار قاتارى جىلدان-جىلعا ارتىپ كەلەدى. شىنىندا دا, اۋىل تاقىرىبى بۇل ماڭىزدىلىعى مەن جاڭالىعى كوپ تاۋسىلمايتىن تاقىرىپ قوي. بايقاۋعا قاتىسۋشىلار ءوز شىعارمالارىندا اۋىلدىڭ كەلبەتىن, بەت-بەينەسىن, ونداعى مادەنيەت پەن ەكونوميكالىق دامۋدى سيپاتتاپ جاتادى. سونىمەن قاتار, بۇل جيناققا ەنىپ وتىرعان شىعارمالار ۇلكەن قىزىعۋشىلىق تانىتۋدا. قازىرگى ۋاقىتتا «اۋىل» پارتياسى ءوزىنىڭ فيليالدارى ارقىلى وبلىستىق, اۋداندىق, اۋىلدىق كىتاپحانالارعا شىعارمالار جيناعىن تاراتىپ جاتىرمىز. جالپى العاندا, ەكى جىلدان بەرى ءبىز وسى شىعارمالاردى توپتاستىرىپ, ءار 3 جانر بويىنشا بىلتىر ءۇش توم, بيىل ءۇش توم جيناق شىعاردىق. بۇل كىتاپتار ءار جىل سايىن مىڭ دانا تيراجبەن شىعارىلادى», دەدى «اۋىل» پارتياسىنىڭ توراعاسى, پارلامەنت سەناتىنىڭ دەپۋتاتى ءالي بەكتاەۆ.
پارتيا توراعاسى دراماتۋرگتەر شىعارماشىلىعىنا باسىمدىق بەرىلگەنىن ايتتى. «اۋىل» پارتياسى اۋىلدىڭ ءداستۇرلى ءومىر سالتىن دارىپتەپ, ونداعى الەۋمەتتىك, رۋحاني ماسەلەلەردى كوركەم شىعارمالار ارقىلى كوپشىلىك نازارىنا ۇسىنۋ ماقساتىندا 2016 جىلدان بەرى «اۋىلىم – التىن تۇعىرىم» ادەبي-ونلاين بايقاۋىن ۇيىمداستىرىپ كەلەدى. ادەبيەت پورتالىمەن بىرلەسە وتكىزىلەتىن ناتيجەسى بويىنشا «التىن تۇعىر» ءۇش تومدىق جيناعىن باسىپ شىعارۋ يگى داستۇرگە اينالدى.
جيناقتىڭ تۇساۋكەسەرىنە پارلامەنت دەپۋتاتتارى, زيالى قاۋىم وكىلدەرى, اقىن-جازۋشىلار مەن دراماتۋرگتەر, بايقاۋدىڭ 2017 جىلعى جەڭىمپازدارى دا قاتىستى.
«بۇگىنگى شارانىڭ ءمانى وتە زور. ەلىمىزدەگى حالىقتىڭ تەڭ جارتىسى اۋىلدا تۇرادى. ول ءبىزدى ازىق-ت ۇلىكپەن, ەت, ءسۇت جانە مايمەن قامتاماسىز ەتىپ وتىرعان ەڭبەكقور ازاماتتار. وسى تۇرعىدان, اۋىلدىڭ «التىن تۇعىر» دەپ اتالۋى جاي عانا ءسوز تىركەسى ەمەس ەكەنىن كورسەتەدى. پارتيانىڭ مۇنداي بايقاۋدى وتكىزۋى بولاشاق دراماتۋرگتەر مەن پروزايكتەردى شىڭداۋعا ۇلكەن ۇلەس بولىپ تابىلادى», دەدى قوعام جانە مەملەكەت قايراتكەرى ءادىل احمەتوۆ.
«التىن تۇعىر» جيناعىنا ەنگەن شىعارمالارمەن ونلاين تانىسۋ مۇمكىندىگى دە قاراستىرىلعان. شىعارمالاردىڭ بارلىعى ادەبيەت پورتالىنا ورنالاستىرىلعان. بيىل دا جالعاسىن تاپقان بايقاۋدىڭ قورىتىندىسى تاۋەلسىزدىك كۇنى قارساڭىندا جاريالانادى. قالامگەرلەردىڭ اۋىل تاقىرىبىنداعى تىڭ تۋىندىلارى قازىرگى ادەبيەتىمىزدىڭ قورىنا قوماقتى ۇلەس بولىپ قوسىلارى ءسوزسىز.
باعاشار تۇرسىنباي ۇلى,
«ەگەمەن قازاقستان»
