مامۋدۋ گاسساما عيماراتتىڭ ءتورتىنشى قاباتىنا ەشبىر قۇرالسىز ورمەلەپ شىعىپ, ءبۇلدىرشىندى قۇتقارۋ ءۇشىن ءبىر مينۋتقا جەتەر-جەتپەس ۋاقىتىن عانا جۇمسادى.
وسى وقيعادان حاباردار بولعان فرانتسيا پرەزيدەنتى ەممانۋەل ماكرون 22 جاستاعى گاسسامانى دۇيسەنبى كۇنى ەليسەي سارايىندا قابىلداپ, بۇكىل فرانتسيا حالقىنىڭ اتىنان العىس ايتتى (سۋرەتتە). سونداي-اق, وعان فرانتسيا ازاماتتىعىن بەرۋ, ءارى ءپاريجدىڭ ءورت ءسوندىرۋ قىزمەتىنە جۇمىسقا ورنالاستىرۋ تۋرالى شەشىم قابىلدادى.
وقيعانىڭ ۆيدەوسى سول مەزەتتە-اق ءتۇرلى جەلىلەردە تاراپ كەتتى. ءبىر عانا Facebook-تەگى قارالىمى 13 ميلليوننان اسىپ كەتتى.
سونىمەن قاتار پاريج قالاسىنىڭ مەرى انن يدالگو ماليلىك جىگىتتىڭ ەرلىگىنە تاڭ قالىپ, تەلەفون ارقىلى العىس ايتتى. انن يدالگو بەيبىت كۇننىڭ باتىرىن «18-وكرۋگتىڭ ورمەكشى ادامى» دەپ اتادى. ياعني وقيعا قالانىڭ وسى مەكەنجايىندا وتكەنىنە بايلانىستى جىلى لەبىزىن ءبىلدىردى.
«بارەكەلدى, مامۋدۋ گاسساما. ەرجۇرەكتىگىنىڭ ارقاسىندا بالاپاندى ولىمنەن قۇتقارىپ قالدى», دەپ جازدى يدالگو Twitter پاراقشاسىندا. ونىڭ ايتۋىنشا گاسساما بىرنەشە اي بۇرىن ماليدەن فرانتسياعا جاڭا ءومىر باستاماق ويمەن كەلىپتى.
«قاھارماندىعى بارلىق ازاماتقا ۇلگى بولعانىن ءارى ونىڭ فرانتسياعا ورنالاسىپ كەتۋىن پاريج تاراپى قۋانا قولدايتىنىن ايتتىم», دەدى قالا مەرى.
ايتا كەتەيىك, وقىس وقيعا وتكەن سەنبى كۇنى فرانتسيا استاناسىنداعى كوشەلەردىڭ بىرىندە بولدى. گاسساما جۋرناليستەرگە بەرگەن سۇحباتىندا سول ماڭايدان ءوتىپ بارا جاتقاندا بيىككە قاراپ, شۋلاپ تۇرعان جۇرتقا كوزى تۇسكەنىن ايتتى.
«ول ءسابي عوي. مەن قولىمنان كەلگەنىن جاسادىم. قۇدايعا شۇكىر, جوعارى قاراي ورمەلەي جونەلدىم دە قۇتقارىپ قالدىم», دەدى 22 جاستاعى ميگرانت.
جەرگىلىكتى باق-تىڭ حاباراۋىنشا بالانىڭ اتا-اناسى ۇيىندە بولماعان.
