وتان الدىنداعى ازاماتتىق بورىشىن وتەۋ ءۇشىن ەلىمىزدىڭ ءار وڭىرىنەن ىرىكتەلىپ الىنعان 285 جاس سارباز الماتىداعى 0111 اسكەري بولىمىندە سالتاناتتى تۇردە اسكەري انت قابىلدادى. بۇل ءراسىم اسكەريلەر ءۇشىن ەرەكشە جورالعى سانالىپ, ساربازداردىڭ بويىنداعى پاتريوتيزم, وتانعا جانە پرەزيدەنتكە ادال بولۋ, سونداي-اق قازاقستان رەسپۋبليكاسى مەملەكەتتىك كۇزەت قىزمەتىنىڭ قاتارىندا ادال قىزمەت اتقارۋ ءتارىزدى قاسيەتتەرگە تاربيەلەيدى.
قازاقستان رەسپۋبليكاسىنىڭ مەملەكەتتىك كۇزەت قىزمەتىنە مەملەكەت باسشىسىنىڭ, كۇزەتىلەتىن ادامدار مەن وبەكتىلەردىڭ قاۋىپسىزدىگىن قامتاماسىز ەتۋ, مەملەكەتتىك ەتالونداردى كۇزەتۋ جانە مەملەكەتتىك-حاتتامالىق ءىس-شارالارعا قاتىسۋ جونىندەگى ماڭىزدى جانە جاۋاپتى ميسسيا جۇكتەلگەن. سالتاناتتى راسىمدە انت قابىلداعان سايدىڭ تاسىنداي ساربازدار بۇل مىندەتتەردىڭ سالماعىن انىق سەزىندى. ولاي دەيتىنىمىز, ولاردىڭ ساپتىق جۇرىسىنەن, اسكەري مادەنيەتى مەن تەمىردەي تارتىبىنەن وسى جاۋاپكەرشىلىك ايرىقشا بايقالىپ تۇردى.
مەملەكەتتىك كۇزەت قىزمەتى باستىعىنىڭ ورىنباسارى – وبەكتىلەر قورعاۋ قىزمەتىنىڭ باسشىسى گەنەرال-لەيتەنانت مۇحتار ايۋباەۆ سالتاناتتى شارا بارىسىنداعى العى سوزىندە: «سىزدەردىڭ قىزمەتتەرىڭىز – ءاربىر قازاقستاندىق وتباسىنىڭ تىنىشتىعى مەن ەرتەڭگى كۇنگە دەگەن سەنىمدىلىگىنىڭ كەپىلى. بۇل جەردە ناعىز جاۋىنگەر بولىپ شىڭدالاسىزدار. وتاندى رياسىز ءسۇيۋ ءدال وسى جەردەن باستاۋ الادى. سىزدەر مۇندا وتانسۇيگىشتىك, ادامگەرشىلىك سياقتى ىزگى قاسيەتتەردىڭ بارلىعىن بويلارىڭىزعا ءسىڭىرىپ, تاباندى ءارى ءتوزىمدى بولۋدى ۇيرەنەسىزدەر. الداعى ءبىر جىلدا جان اياماي قىزمەت ەتىپ, ۇلتتىق نامىسىمىزدىڭ تۋىن بيىكتەن جەلبىرەتىڭىزدەر!», دەپ, جاس ساربازدارعا جىگەر سىيلاپ, اتاۋلى كۇنمەن قۇتتىقتادى.
وتە جاۋاپتى مىندەتتەردى ءمىنسىز اتقارۋ ءۇشىن اتالعان قىزمەتتە ساربازداردىڭ كەشەندى دەنە شىنىقتىرۋ جانە جاۋىنگەرلىك دايارلىعىنا اسا نازار اۋدارىلادى. ولار ساپتىق امالداردى, جاۋىنگەرلىك قارۋدان اتۋ ماشىق-داعدىسىن, سونداي-اق جاۋىنگەرلىك تەحنيكانى قۇرعاق جەردە جانە سۋدا جۇرگىزۋدى جانە تاعى باسقالاردى مەڭگەرەدى. سپورتتىق جەتىستىكتەرى بار جاۋىنگەرلەردىڭ ءارتۇرلى دەڭگەيدەگى, ونىڭ ىشىندە الەمدىك دارەجەدەگى سپورتتىق جارىستارعا قاتىسۋ مۇمكىندىگى مول.
اسكەري انت قابىلداۋ راسىمىنە الماتى قالاسى اكىمدىگىنىڭ وكىلدەرى, قوعام قايراتكەرلەرى, مەملەكەتتىك كۇزەت قىزمەتىنىڭ ارداگەرلەرى, جاس ساربازداردىڭ اتا-انالارى مەن تۋىستارى قاتىستى. مەملەكەتتىك كۇزەت قىزمەتىنىڭ اسكەري قىزمەتكەرلەرى وزدەرىنىڭ شەبەرلىكتەرىن, كاسىپقويلىعى مەن ءىس-قيمىلدارىنىڭ ۇيلەسىمدىگىن كورسەتىپ جيىلعانداردى ءتانتى ەتتى. ءوز كەزەگىندە جاس ساربازدار دا قىسقا مەرزىمدە العان ماشىق-داعدىلارىن, سونىڭ ىشىندە قارۋمەن جانە قارۋسىز يگەرگەن ساپتىق امالدارىن پاش ەتىپ, كوپشىلىك الدىندا سالتاناتتى مارشپەن ءجۇرىپ ءوتتى. سونداي-اق
پرەزيدەنتتىك ۇرلەمەلى اسپاپتار وركەسترى مەن قۇرمەت قاراۋىل روتاسى پلاتس-كونتسەرتتىڭ (دەفيلە) جاڭا باعدارلاماسىن كورەرمەن نازارىنا ۇسىندى.
وتان الدىندا انت قابىلداعان ساربازدار الداعى ۋاقىتتا مەملەكەتتىك كۇزەت قىزمەتىنىڭ استانا مەن الماتى قالالارىنداعى اسكەري بولىمدەرى بويىنشا تاراتىلىپ, اسكەري مەرزىم ارالىعىندا جۇكتەلگەن اسا جاۋاپتى مىندەتتەردى اتقارۋعا كىرىسەتىن بولادى.
ارمان وكتيابر,
«ەگەمەن قازاقستان»
الماتى
