ەكىنشى كاتەگوريالى ماگيسترال بەينەۋ اۋىلىنان باستالىپ, وزبەكستان شەكاراسىنا دەيىن 85 شاقىرىمعا سوزىلعان.
ا.مامين بەينەۋ-اقجىگىت اۆتوكولىك جولىن وڭىرلىك ماڭىزدىلىعى بار ينفراقۇرىلىمدىق نىسان رەتىندە اتاپ ءوتتى.
«بۇل ماڭىزدى جوبا اقتاۋ مەن قۇرىق تەڭىز پورتتارى ارقىلى ورتالىق ازيا ەلدەرىنەن كاۆكاز, تۇركيا جانە ەۋروپاعا ترانزيتتىك اۆتوكولىك اعىنىن قالىپتاستىرۋعا ىقپال ەتەدى», دەگەن ا.مامين جولدىڭ قۇرىلىسىن ساپالى جۇرگىزىپ, ونى بەلگىلەنگەن ۋاقىتتا اياقتاۋدى تاپسىردى.
سونداي-اق ءبىرىنشى ۆيتسە-پرەمەر قۇرىق پورتىندا پاروم كەشەنىنىڭ ەكىنشى كەزەگى قۇرىلىسىنىڭ بارىسىمەن تانىستى.
ا.مامينگە شىعىس جانە باتىس سۋلارىنىڭ قۇرىلىسى, «كەدەندىك رەسىمدەۋ ايماعى» نىسانى پورت دامۋىنىڭ ەكىنشى كەزەڭىنىڭ جاعالاۋداعى گيدروتەحنيكالىق قۇرىلىمدارى تۋرالى اقپارات بەرىلدى. سونىمەن قاتار «قۇرىق-قۇرىق پورتى» اۆتوكولىك تاس جولىن قايتا قۇرۋ جانە پاروم كەشەنىن پايدالانۋعا بەرۋ بويىنشا جۇرگىزىلىپ جاتقان شارالار تۋرالى حاباردار ەتتى.
قازىرگى ۋاقىتتا ەكىنشى كەشەن سىناق رەجىمىندە ىسكە قوسىلادى. جوبا جۇزەگە اسىرىلعاننان باستاپ 476 كەمە قاتىناسى جۇرگىزىلدى, 2 110 مىڭ توننا جۇك وڭدەلدى, ونىڭ ىشىندە بيىلعى جىلى 156 كەمە قاتىناسى جۇرگىزىلىپ, 634 مىڭ توننادان استام جۇك وڭدەلدى.
سول كۇنى ءبىرىنشى ۆيتسە-پرەمەر XV وڭىرارالىق ىنتىماقتاستىق فورۋمىنا دايىندىق اياسىندا سولتۇستىك قازاقستان وبلىسىنا جۇمىس ساپارىمەن باردى.
ا.مامين پەتروپاۆل قالاسىنىڭ حالىقارالىق اۋەجايىندا تۇراق ورىندارىن قالپىنا كەلتىرۋ, «اۋەجايعا كىرەبەرىس جول» اۆتوكولىك جولىن كۇردەلى جوندەۋ جۇمىستارىمەن تانىستى.
سونداي-اق پرەمەر-ءمينيستردىڭ ءبىرىنشى ورىنباسارى «نۇرلى جول» باعدارلاماسى بويىنشا جۇزەگە اسىرىلىپ جاتقان «پەتروپاۆل-رەسەي فەدەراتسياسىنىڭ شەكاراسى» ۋچاسكەسىندەگى جول وتپەسىن قايتا قالپىنا كەلتىرۋ بارىسىن ءوز كوزىمەن كوردى.
وڭىردە ا.مامين وقۋشىلار سارايىنىڭ, «جاس وركەن» جاڭا شاعىن اۋدانىنىڭ, «Hilton» ساۋدا-قوناق ءۇي كەشەنىنىڭ, «قىزىلجار» قوناق ءۇيىنىڭ قۇرىلىسى بارىسىمەن تانىستى. بارلىق نىساندار 2018 جىلدىڭ قىركۇيەك ايىندا پايدالانۋعا بەرىلەدى.
ا.مامين پەتروپاۆلدا قازاقستان مەن رەسەيدىڭ XV وڭىرارالىق ىنتىماقتاستىق فورۋمىنا دايىندىق جۇمىستارىن جوعارى ۇيىمداستىرۋشىلىق دەڭگەيدە وتكىزۋدى تاپسىردى.
