«ۇرپاقتار ساباقتاستىعى» اتالىمىندا مامليۋت اۋدانىنان كەلگەن شاۋكەروۆتەر جەڭىمپاز اتاندى. ءۋاليحانوۆ اۋدانىنىڭ نامىسىن قورعاعان قاسىمبەكوۆتەر يبالى توعىز بالا تاربيەلەپ, 17 نەمەرە, 2 شوبەرە قىزىعىن كورىپ وتىر. «ۇستاز بولۋ–جۇرەك قالاۋى» اتالىمى بويىنشا جەڭىستىڭ ەڭ بيىك تۇعىرىنا كوتەرىلگەن دۇيسەنبيندەردىڭ پەداگوگيكالىق جۇمىس ءوتىلى ەكىجۇز جىلعا تاقاۋ. اتا-انانىڭ جولىن قۋعان ۇل-قىزدارى نوۆويشيمكا مەكتەبىندە ەڭبەك ەتەدى. وسىلايشا التى اتالىم ساراپقا سالىنىپ, جۇلدەلى ورىندار ءوز يەلەرىن تاپتى.
جالپى بايقاۋدىڭ قورىتىندىسىندا ەكىنشى ورىنعا يە بولعان ششەگولەۆتەر تۋعان اۋىلىنا بىلتىر 18 ميلليون, بيىل 6 ميلليون تەڭگەنىڭ قارجىلىق قولداۋىن جاساپتى. ولارمەن تەڭ ونەر كورسەتكەن مۇحامەدياروۆتاردى باستاپ كەلگەن وتاعاسى بولات پەن وتاناسى مافرۋزا التى ۇلىن ۇياعا قوندىرعان. ءبارى دە شەتىنەن ونەرپاز. ۇلدارىنىڭ ءبىرى حالىقارالىق «شابىت» كونكۋرسىنىڭ لاۋرەاتى. بۇگىندە كوكشەتاۋداعى ءبىرجان سال اتىنداعى ونەر كوللەدجىنە جەتەكشىلىك ەتەدى.
ءبىرىنشى ورىندى ەكتوۆتار مەن يساقوۆتار اۋلەتى ءبولىستى. پەتروپاۆلدىق ەكتوۆتاردىڭ سپورت سالاسىنداعى تابىستارى اۋىز تولتىرىپ ايتارلىقتاي. الەكساندر 1998 جىلدان بەرى جەڭىل اتلەتيكادان اعا جاتتىقتىرۋشى بولىپ ىستەيدى. وسى ارالىقتا 4 حالىقارالىق دارەجەدەگى سپورت شەبەرىن, 8 سپورت شەبەرىن دايىنداپ شىعارعان. ايەلى نينا دا جاتتىقتىرۋشى. ۇلدارى الەمدىك جارىستاردا ولجا سالىپ ءجۇر.
يساقوۆتار 2004 جىلى وزبەكستاننان جامبىل اۋدانىنا قونىس اۋدارىپ, سودان بەرى ۇلگىلى وتباسى رەتىندە اۋىلداستارىنىڭ قۇرمەت-قوشەمەتىنە بولەنگەن. ساپارحان قازاق ءتىلى ءپانىنىڭ مۇعالىمى بولسا, سايرا شاعىن ورتالىقتا تاربيەشى.
اۋلەتىمىز جەتىمدەر ۇيىنەن الىنعان ارتەم, كاتيا, گريگوري, ماريا دەگەن جەتكىنشەكتەرمەن تولىقتى. ولاردى ءوزىمىزدىڭ كىندىگىمىزدەن وربىگەن ءتورت بالادان كەم كورمەيمىز. ۇيدە قازاق تىلىندە سويلەسەمىز, دەيدى سايرا.
ءومىر ەسقالي,
«ەگەمەن قازاقستان.
سولتۇستىك قازاقستان وبلىسى.
