العاش رەت بوسانعان 32 جاستاعى رەگينا گورح بىردەن ءۇش ۇل مەن ءبىر قىزدىڭ اناسى اتاندى. اعايىن-تۋىسىمەن جابىلىپ نارەستەلەرگە ەمما, ۆيلگەلم, يوگانن, گوتليب دەگەن ەسىمدەر بەرىپتى.
تورتەمنىڭ دۇنيەگە كەلەتىنى الدىن الا بەلگىلى بولعاندىقتان, رەگينا جۇكتىلىگىنىڭ 28-ءشى اپتاسىنان باستاپ دارىگەرلەردىڭ باقىلاۋىنا الىنعان. پەريناتالدىق ورتالىقتىڭ اكۋشەر-گينەكولوگ ماماندارى ەرەكشە كۇتىم جاساپ, جۇكتىلىك مەرزىمىن 31 اپتاعا دەيىن سوزا الدى. بۇل قۇرساقتاعى شارانالاردىڭ مەيلىنشە سالماق جيناپ, الدەنۋى ءۇشىن قاجەت بولعان.
ەرلى-زايىپتىلار العاشقى سابيلەرىن كۇتىڭكىرەپ قالسا دا, تورتەم انا بويىنا تابيعي جولمەن بىتكەن ەكەن. جاراتقاننىڭ ءبىر-اق ساتتە جارىلقاي سالعانىنا جاس اتا-انا ءدان ريزا.
سابيلەردىڭ ەڭ ءىرىسى 1890 گرامم بولسا, ودان كەيىنگىسى 1760 گرامم, ءۇشىنشىسى 1745 گرامم, ال سوڭعىسى نەبارى 1095 گرامم تارتىپتى. دەگەنمەن, نەوناتولوگ ماماندار بارىن سالىپ, ءبارىن دە امان الىپ قالدى. شالا تۋىلعان شاقالاقتار ءبىر اي بويى قارقىندى تەراپيا بولىمشەسىندە قولدان جەتىلدىرىلدى. ودان كەيىن دە جاڭا تۋعاندار پاتولوگياسى بولىمشەسىندە باقىلاۋدا بولعان.
سابيلەر پاتولوگيا بولىمشەسىنە اۋىستىرىلعاننان كەيىن ولاردىڭ اكەسىنە دە كۇندىز-ءتۇنى جاندارىندا بولۋعا رۇقسات بەرىلگەن ەكەن. بالالاردى سالالىق ماماندار دا ايرىقشا تەكسەرۋدەن وتكىزدى. جۇكتىلىكتىڭ اۋىر ءوتۋى سالدارىنان كوزىنە زاقىم كەلگەن جالعىز قىز ەمماعا وتا جاسالىپ, ءساتتى اياقتالعان. جاس بوسانعان اناعا دا ءبىرشاما ۋاقىت وڭالتۋ شارالارى جاسالدى. تورتەم كوتەرۋ وڭاي ەمەس, السىرەگەن انانىڭ اعزاسىن پەريناتالدىق ورتالىق دارىگەرلەرى مەيلىنشە قىسقا ۋاقىت ىشىندە قالپىنا كەلتىردى.
قايرات ءابىلدا,
«ەگەمەن قازاقستان»
قاراعاندى
