جيىندى اشىپ, شارانىڭ ماقسات-مۇددەسى جايلى تانىستىرعان مادەنيەت جانە سپورت ءمينيسترى ارىستانبەك مۇحامەدي ۇلى, سوڭعى ۋاقىتتا مينيسترلىك تاراپىنان ۇلتتىق سپورت تۇرلەرىن دامىتۋعا زور نازار اۋدارىلىپ وتىر. بۇل دەگەنىمىز – ەلباسىنىڭ «رۋحاني جاڭعىرۋ» باعدارلاماسىن ىسكە اسىرۋ جولىندا ۇلتتىق كود پەن تاريحي سانامىزدى جاڭعىرتۋ ءۇشىن قاجەت, دەدى. سونىمەن قاتار ۆەدومستۆو باسشىسى ەلوردانىڭ مەرەيتويى قارساڭىندا مينيسترلىك وتە ۇلكەن اۋقىمدى مادەني شارالار تىزبەسىن جوسپارلاپ وتىرعانىن دا جەتكىزدى.
چەمپيوناتقا كەلەتىن بولساق, بۇل رەتكى دوداعا قازاقستان, وزبەكستان, قىرعىزستان, تاجىكستان, موڭعوليا, رەسەي, اۋعانستان, قىتاي, تۇركيا قاتارلى توعىز مەملەكەتتەن 44 سپورتشى قاتىسادى, اۋدارىسپاق سايىسى بەس سالماق دارەجەسى (60, 70, 80, 90 جانە +90 كيلو) بويىنشا وتكىزىلەدى, دەدى جارىستى ۇيىمداستىرۋشىلار. قوس چەمپيوناتتىڭ جۇلدە قورى – 14 000 000 تەڭگەنى قۇراپ وتىر.
اتالمىش سپورتتىق شاراعا يۋنەسكو-نىڭ ءداستۇرلى سپورت ويىندارى كوميتەتىنەن وكىلدەر شاقىرىلىپتى. ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحاننىڭ پىكىرىنشە, بۇل قوناقتاردىڭ كەلۋى – ەلىمىزدەگى ۇلتتىق سپورتتىڭ دامۋ قارقىنىنا دەگەن الەمدىك قاۋىمداستىقتىڭ قىزىعۋشىلىعىن بىلدىرسە كەرەك. تىپتەن بولاشاقتا قازاق ەتنوويىندارىنىڭ الەمدىك دەڭگەيگە شىعۋىنا ەسىك اشىلۋى دا عاجاپ ەمەس.
ويتكەنى يۋنەسكو 2021 جىلى دۇنيە ءجۇزى حالىقتارىنىڭ ەتنوويىن تۇرلەرىنەن وليمپيادا وتكىزۋدى جوسپارلاپ قويعان. ازىرگە بۇل شارانى قابىلداۋعا كانادا, جاپونيا سياقتى ەلدەر ىقىلاس بىلدىرۋدە. بۇل جەردە اتاپ وتەرلىك جاڭالىق, مۇنداي الەمدىك دودانى ء«بىز وتكىزەيىك» دەپ ەلىمىز اتىنان مادەنيەت جانە سپورت مينيسترلىگى دە ءوتىنىش بىلدىرگەن. «ەل تاۋەلسىزدىگىنىڭ 30 جىلدىعى قارساڭىندا جوعارىداعى شارانىڭ ەلىمىزدە ءوتۋى الەم قاۋىمداستىعى الدىندا زور بەدەل بولار ەدى» دەيدى ارىستانبەك مۇحامەدي ۇلى.
سونداي-اق ءباسپاسوز ءماسليحاتىندا ءمالىم بولعانداي, ۇلتتىق سپورت قاۋىمداستىعى استانانىڭ 20 جىلدىعىنا وراي ۇلتتىق ماڭىزعا يە 20 ءتۇرلى سپورتتىق شارا وتكىزۋدى جوسپارلاپتى. وسىلاردىڭ بەتاشارى جوعارىداعى قوس چەمپيونات بولسا, الداعى كۇندەرى ات ۇستىندە ساداق اتۋدان الەم چەمپيوناتى, سونىمەن بىرگە ونەر-مادەنيەت سالاسىنداعى تانىمال تۇلعالاردىڭ قاتىسۋىمەن «جۇلدىزدى كوكپار» جوباسى, جىل سايىن وتەتىن «التىن تۇلپار» الامان بايگەسى ت.ب. شارالار كۇتىپ تۇر. ال كوكپاردان ءىى الەم چەمپيوناتىن وتكىزۋگە تۇركيا تاراپى قىزىعۋشىلىق ءبىلدىرىپتى.
بەكەن قايرات ۇلى,
«ەگەمەن قازاقستان»
