«بۇگىن ءبىز الماتى قالاسىندا ازاماتتىق قوعام ينستيتۋتتارىن دامىتۋ بويىنشا «بەلسەندi مەگاپوليس» جول كارتاسىنا قول قويدىق. بۇل قۇجات ءدىن ىستەرى جانە ازاماتتىق قوعام مينيسترلىگى مەن الماتى قالاسىنىڭ اكىمدىگى اراسىندا ازاماتتىق قوعام, ءدىن جانە جاستار سالاسىنداعى مەملەكەتتىك ساياساتتى جۇزەگە اسىرۋدىڭ وزىق تاجىريبەسىن, فورمالارى مەن تەتىكتەرىن پايدالانۋ مۇمكىندىگىن كەڭەيتەدى», - دەدى دارحان كالەتاەۆ.
جول كارتاسى بىرقاتار بىرلەسكەن ءىس-شارالاردى وتكىزۋدى كوزدەيدى. اتاپ ايتقاندا, ازاماتتىق قوعام سالاسى بويىنشا الماتى قالاسىندا ازاماتتىق ورتالىقتىڭ اشىلۋى, ۇەۇ وكىلدەرىنە ارنالعان وقىتۋ سەمينارلارى مەن الەۋمەتتىك زەرتتەۋلەر وتكىزۋ, ازاماتتىق قوعامدى دامىتۋ جونىندەگى «U38» ۋنيۆەرسيتتەر اليانسىمەن ىنتىماقتاستىقتى بەكىتۋ سياقتى شارالار جوسپارلانعان.
ءدىن سالاسىندا الماتى قالاسىنىڭ يمامدارى ءۇشىن وقۋ كۋرستارىن وتكىزۋ, رەسپۋبليكالىق سەمينارلار مەن ترەنينگتەر ۇيىمداستىرۋ, اقپاراتتىق-ءتۇسىندىرۋ ماتەريالدارىن ازىرلەۋ جوسپارلانۋدا. بۇدان بولەك, جاستار ساياساتى سالاسىندا تمد-عا قاتىسۋشى مەملەكەتتەردىڭ جاستار فورۋمىن وتكىزۋ, ۆولونتەرلەردىڭ رەسپۋبليكالىق سلەتىن ۇيىمداستىرۋ سياقتى ءىس-شارالار قامتىلدى.
بۇگىن قر ءدىن ىستەرى جانە ازاماتتىق قوعام ءمينيسترى دارحان كالەتاەۆ الماتى قالاسىنا جۇمىس ساپارى اياسىندا قالالىق قوعامدىق كەڭەستىڭ كەڭەيتىلگەن وتىرىسىنا قاتىسقانىن ەستەرىڭىزگە سالا كەتكىمىز كەلەدى. سونداي-اق, ءمينيستردىڭ «نۇر-مۇباراك» يسلام مادەنيەتى ۋنيۆەرسيتەتىنە بارۋى جانە الماتى قالاسىنىڭ ۇكىمەتتىك ەمەس ۇيىمدارىنىڭ باسشىلارىمەن كەزدەسۋى جوسپارلانۋدا.
