ۇلتتىق مەكتەپ ەلباسىنىڭ تاپسىرماسىمەن 2008 جىلى اشىلدى. وسى جىلدار ىشىندە ول جاڭا تۇرپاتتاعى 140 مەملەكەتتىك باسقارۋ ءىسىنىڭ قىزمەتكەرلەرىن دايارلاپ شىعاردى.
2016 جىلى مەملەكەتتىك باسقارۋ اكادەمياسىندا وقۋ ءىسىنىڭ تۇبەگەيلى ترانسفورماتسياسى باستالدى. نازارباەۆ ۋنيۆەرسيتەتى مەن لي كۋان يۋ مەملەكەتتىك ساياسات مەكتەبىنىڭ قولداۋىمەن ماگيسترلىق باعدارلامالار جاڭارتىلدى. «تسيفرلى اكادەميا» جوباسى ازىرلەنۋدە.
گ.ابدىقالىقوۆا ءوزىنىڭ قۇتتىقتاۋ سوزىندە قازىر ەلىمىزدە ۇلت جوسپارى ىسكە اسىرىلىپ جاتقانىنا, وندا كاسىبي مەملەكەتتىك اپپارات قالىپتاستىرۋ العاشقى باعىت رەتىندە بەلگىلەنگەنىنە توقتالدى.
مەملەكەتتىك حاتشى قازاقستان پرەزيدەنتىنىڭ ۇزدىك مەملەكەتتىك قىزمەتشىلەرمەن بىلتىرعى كەزدەسۋىندە: «باسەكەگە قابىلەتتى مەملەكەتتىك قىزمەت قالىپتاستىرماي, باستى ماقساتىمىز – ءوسىپ-وركەندەگەن قازاقستاندى قۇرۋعا قول جەتكىزۋ مۇمكىن ەمەس», – دەگەنىن اتاپ ءوتتى.
– بۇگىندە دۇنيە جۇزىندە تسيفرلاندىرۋ ءداۋىرى باستالدى. ول, ەڭ الدىمەن, مەملەكەتتىك اپپاراتتى ۇدايى جاڭعىرتىپ وتىرۋدى تالاپ ەتەدى. بۇل رەتتە مەملەكەتتىك باسقارۋدىڭ ءتيىمدى مودەلىن قامتاماسىز ەتۋدىڭ وڭتايلى تەتىگىنىڭ ءبىرى – مەملەكەتتىك قىزمەتشىلەردى وقىتۋ ىسىندە جاڭا ۇردىستەر مەن تەحنولوگيالاردى ەسكەرە وتىرىپ, ۇزدىكسىز ءبىلىم بەرۋ, – دەدى مەملەكەتتىك حاتشى.
گۇلشارا ابدىقالىقوۆا جاھاندىق ءبىلىم بەرۋ كەڭىستىگىندە دامىپ كەلە جاتقان مىناداي ترەندتەردى اتاپ ءوتتى: بۇقارالاندىرۋ, كوممەرتسيالاندىرۋ, ينتەرناتسيونالداندىرۋ, اقپاراتتاندىرۋ جانە تسيفرلاندىرۋ. ولار يننوۆاتسيالىق ءبىلىمدى يگەرىپ, شەبەرلىك پەن ماشىققا يە بولۋدى تالاپ ەتەدى. 2016 جىلى داۆوستاعى دۇنيەجۇزىلىك ەكونوميكالىق فورۋمدا 2020 جىلعا قاراي وزەكتى بولا تۇسەتىن 10 كاسىبي ماشىق اتالدى: سىني تۇرعىدان ويلاۋ, كرەاتيۆتىلىك, پروبلەمالاردى شەشۋ ماشىعى, ەموتسيونالدىق ينتەللەكت جانە ت.ب.
– ول ءۇشىن بىزگە ۇزدىكسىز ءبىلىم الۋ كۋلتىن قالىپتاستىرۋ قاجەت. اتاپ ايتقاندا, ءوز ءبىلىمىڭ مەن قابىلەتىڭدى جەتىلدىرىپ, ءوز-ءوزىڭدى دامىتۋ ارقىلى ءومىر بويى ءبىلىم الۋ كەرەك, – دەدى گ.ابدىقالىقوۆا.
كەزدەسۋ سوڭىندا مەملەكەتتىك حاتشى گۇلشارا ابدىقالىقوۆا مەملەكەتتىك ساياساتتىڭ ۇلتتىق مەكتەبى تىڭداۋشىلارىنا جاڭا بىلىمدەرىن, ىسكەرلىك قاسيەتتەرى مەن ماشىقتارىن مەملەكەتتىك قىزمەتتە قازاقستان حالقىنىڭ يگىلىگى ءۇشىن جۇمساۋعا تىلەكتەستىك ءبىلدىردى.
