قۇرامىندا استانا قالاسى اكىمدىگىنىڭ ءتۇرلى باسقارمالارى مەن قۇرىلىمدىق بولىمشەلەرىنىڭ وكىلدەرى بار استانادان كەلگەن ۇلكەن دەلەگاتسيا اتىراۋ وبلىسىندا جۇمىس ساپارىمەن بولۋدا. استانالىق قوناقتاردىڭ كەلۋى استانانىڭ الداعى 20 جىلدىق مەرەيتويىنا ورايلاستىرىلعان.
ساپار اياسىندا اتىراۋ وبلىسىنىڭ اكىمى نۇرلان نوعاەۆتىڭ قاتىسۋىمەن وڭىرارالىق ىنتىماقتاستىق بيزنەس كەزدەسۋى ءوتتى. ءوزىنىڭ قۇتتىقتاۋ سوزىندە ءوڭىر باسشىسى جاڭا يننوۆاتسيالىق يدەيالاردى, بيزنەس جوبالاردى جانە ۇلكەن قالالار مەن تۇتاس ەلىمىزدىڭ الەۋمەتتىك-ەكونوميكالىق دامۋىنا ىقپال ەتەتىن تەحنيكالىق جاڭالىقتاردى ەنگىزۋ بويىنشا ەكى قالانىڭ اراسىندا تاجىريبە الماسۋدىڭ ماڭىزدىلىعىن اتاپ ءوتتى.
- بۇگىنگى كۇنى استانا قازاقستاننىڭ بارلىق قالالارىنا ۇلگى, بۇل – وتانىمىزدىڭ كەلبەتى, مۇندا الەمدىك ستراتەگيالىق مىندەتتەردى شەشۋ ءۇشىن كوپتەگەن ەلدەردىڭ ءبىرىنشى باسشىلارى كەلەدى, اۋقىمدى ءىس-شارالار وتكىزىلەدى. استانادا مەديتسينانىڭ, مادەنيەتتىڭ, ءبىلىم مەن عىلىمنىڭ بارلىق ماڭىزدى وبەكتىلەرى شوعىرلانعان. سىزدەردىڭ وبلىسىمىزعا ساپارلارىڭىزدىڭ ماڭىزى زور, ءبىز ءوڭىردى دامىتۋ بويىنشا استانادان بارىنشا كوپ تاجىريبە الۋدى نيەت ەتەمىز, -دەدى اتىراۋ وبلىسىنىڭ اكىمى قوناقتارعا ارناپ سويلەگەن سوزىندە.
استانا قالاسىنىڭ اكىمى ەرمەك امانشاەۆ باسقارعان استانالىق دەلەگاتسيا وكىلدەرىنىڭ ايتۋىنشا, اتىراۋ وبلىسى قوناقتاردىڭ ۇلكەن قىزعۋشىلىعىن تۋدىرۋدا, بۇعان قوسا وڭىرارالىق ىنتىماقتاستىق بىردەن بىرنەشە باعىت بويىنشا – ونەركاسىپ, اۋىل شارۋاشىلىعى, كاسىپكەرلىك, تۋريزم, تسيفرلاندىرۋ, «اقىلدى قالا» تەحنولوگياسىن ەنگىزۋ جانە باسقالارى بويىنشا جاسالۋى مۇمكىن.
- استانادا 20 جىلدا ىسكە اسىرىلعان تابىستى جوبالاردى اتىراۋ وبلىسىندا دا ەنگىزۋگە بولادى. ءبىز ولار تۋرالى ايتقىمىز, ولاردى ىسكە اسىرۋداعى تاجىريبەمىزبەن بولىسكىمىز كەلەدى. ەكى كۇنگى ساپاردا اتىراۋ وبلىسىنىڭ اكىمدىگى ەكى جوباعا قىزىعۋشىلىق تانىتتى دەپ ايتۋعا بولادى– بۇل ءىت-قاۋىپسىزدىك سالاسىنداعى جوبالار, ياعني بۇكىل قالا بويىنشا كوشە بەينەباقىلاۋ كامەرالارىن ەنگىزۋ, بۇل قىلمىستى تومەندەتۋگە جانە اشىلۋىن ارتتىرۋعا, سونداي-اق جكو ازايتۋعا مۇمكىندىك بەرەدى. ەكىنشى جوبا – ءبىز استانادا ويداعىداي ەنگىزگەن «1000 جاڭا ساۋدا ورىندارى» جوباسى ءمجا-كە نەگىزدەلگەن, ايتا كەتەتىنى جوباعا مەملەكەت ءبىر تيىن دا سالعان جوق – ساۋدا الاڭدارىنا ارنالعان جەر ۋچاسكەلەرىن ينۆەستورلار ۇسىندى, جوبانى ىسكە اسىرۋ استاناعا جاڭا ينۆەستيتسيالار تارتتى جانە جاڭا جۇمىس ورىندارىن قۇردى, - دەپ اڭگىمەلەدى استانا قالاسى اكىمدىگىنىڭ ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ مىندەتىن اتقارۋشى ەرلان بەكمۋرزاەۆ.
مەملەكەت باسشىسىنىڭ تاپسىرماسى بويىنشا ەلىمىزدىڭ بارلىق وڭىرلەرىندە استانانىڭ 20 جىلدىق مەرەيتويىنا وراي استانانىڭ مادەنيەت كۇندەرى وتۋدە. استانالىق قوناقتاردىڭ ساپارى ەكى بولىمنەن تۇرادى – مادەني جانە ىسكەرلىك. استانالىق شىعارماشىلىق ۇجىمداردىڭ كونتسەرتتەرى ىسكەرلىك توپتاردىڭ بيزنەس كەزدەسۋلەرىمەن, ونەركاسىپتىك جانە وندىرىستىك كاسىپورىنداردى ارالاۋمەن قاتار وتۋدە. ۇيىمداستىرۋشىلاردىڭ ايتۋىنشا, مۇنداي فورۋمدار وڭىرارالىق ىنتىماقتاستىققا جاڭا سەرپىن بەرمەك.
