باعدات نۇرلانقىزى ابىشەۆا 40 جىلدان استام ءومىرىن ش. ءۋاليحانوۆ اتىنداعى تاريح جانە ەتنولوگيا ينستيتۋتى قابىرعاسىندا قازاق عىلىمىنىڭ دامۋىنا ارنادى. «ينستيتۋت شەجىرەسىنە» اينالعان ارداگەر-عالىم كەزىندە اكادەميك ق.ي.ساتباەۆتىڭ باتاسىن الىپ, اسپيرانتۋراعا تۇسۋگە ارنايى قولداۋ حات العان.
ب.ن. ابىشەۆا وتكەن عاسىردىڭ 50-ءشى جىلدارىنىڭ باسىندا ماسكەۋدە تاريح عىلىمىنىڭ مايتالماندارى ە.ۆ. تارلە, ب.د. گرەكوۆ, ا.م. پانكراتوۆا, م.ۆ. نەچكينا, ن.م. درۋجينين, ي.ي.مينتس, ب.ن. پونومارەۆ, ە.ب. گەنكينا, م.پ. كيم, ك.ۆ. بازيلەۆيچ, ا.م. سامسونوۆ جانە ت.ب. ءدارىس بەرگەن اسپيرانتۋرانى ءبىتىرىپ, تاريح عىلىمدارىنىڭ دوكتورى ا.پ. كۋچكيننىڭ جەتەكشىلىگىمەن ديسسەرتاتسياسىن قورعاپ شىققان, 24 جاسىندا تاريح عىلىمدارىنىڭ كانديداتى اتاعىن العان العاشقى قازاق قىزى. 1952 جىلدان 1994 جىلعا دەيىن ينستيتۋتتا ۇزدىكسىز اعا عىلىمي قىزمەتكەر, ينستيتۋت ديرەكتورىنىڭ عىلىم جونىندەگى ورىنباسارى, ءبولىم مەڭگەرۋشىسى, جەتەكشى عىلىمي قىزمەتكەر لاۋازىمدارىندا ەڭبەك ەتتى.
عىلىمي كەڭەستى جۇرگىزگەن ينستيتۋت ديرەكتورى, ت.ع.د., پروفەسسور ز.ە. قابىلدينوۆ باعدات ابىشەۆانىڭ عىلىم جولىنداعى عيبراتتى عۇمىرىنا شولۋ جاسادى. ال ينستيتۋتتىڭ ءبولىم مەڭگەرۋشىسى ز.م.تولەنوۆا «عيبراتى مول عۇمىر», ينستيتۋتتىڭ باس عىلىمي قىزمەتكەرى ز.ت. سادۋاقاسوۆا «عىلىمداعى ايەلدىڭ ءومىرى مەن قىزمەتى» تاقىرىپتارىندا بايانداما جاسادى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ تاريح, ارحەولوگيا جانە ەتنوگرافيا فاكۋلتەتىنىڭ دەكانى م.س. نوعايباەۆا, قازاقستان تاريحى كافەدراسىنىڭ مەڭگەرۋشىسى, پروفەسسور ب.ب. كارىباەۆ, پروفەسسور ا.ب. قالىش, اكادەميك اقاي نۇسىپبەكوۆتىڭ قىزى م.ا. نۇسىپبەكوۆا, اكادەميك م.ح. اسىلبەكوۆتىڭ قىزى پروفەسسور ج.م. اسىلبەكوۆا, ت.ب. ارداگەر-عالىمعا قۇرمەت ءبىلدىرىپ, ەستەلىكتەرىمەن ءبولىستى.
تاريح عىلىمدارىنىڭ بىرنەشە كانديداتىن دايىنداعان باعدات نۇرلانقىزى ءوز عىلىمي مەكتەبىن قالىپتاستىرعان عالىمداردىڭ ءبىرى. بۇگىندە حالىقارالىق اقپاراتتاندىرۋ اكادەمياسىنىڭ اكادەميگى, «قازاقستان رەسپۋبليكاسى عىلىمىنىڭ دامۋىنا سىڭىرگەن ەڭبەگى ءۇشىن» توسبەلگىسىنىڭ يەگەرى, «ەڭبەك ارداگەرى» باعدات ابىشەۆانىڭ وتاندىق عىلىم مەن قوعامعا سىڭىرگەن ەڭبەگى ولشەۋسىز.
ەلۆيرا سەرىكقىزى,
«ەگەمەن قازاقستان»
الماتى
