وتاندىق سپورت تاريحىندا جانىبەكتىڭ ءوز ورنى بار ەكەنى ەش داۋ تۋعىزباسا كەرەك. بالا كەزىنەن بەلگىلى بوكسشى, تانىمال باپكەر مۇرات سيقىمباەۆتىڭ قول استىندا جاتتىققان الماتى وبلىسى الاكول اۋدانىنا قاراستى جىلاندى اۋىلىنىڭ تۋماسى اۋەسقوي رينگتە اۋىز تولتىرىپ ايتارلىقتاي تابىستارعا قول جەتكىزدى. العاش رەت ول قىراعى مامانداردىڭ نازارىنا 2012 جىلى ىلىكتى. سول جىلى استانادا وتكەن ەل بىرىنشىلىگىندە 75 كەلى سالماق دارەجەسىندە ونەر كورسەتكەن 19 جاستاعى ورەن بارلىق قارسىلاستارىن جولىنان ىعىستىرىپ, باس جۇلدەگە يە بولدى. 2013 جىلى اممان مەن استانادا ۇيىمداستىرىلعان ازيا جانە الەم چەمپيوناتتارىندا توپ جارىپ, 2014 جىلى ينچحوندا ازيا ويىندارىنىڭ جەڭىمپازى اتاندى.
بيىل شىمكەنتتە وتكەن قازاقستان چەمپيوناتىندا ساتسىزدىككە ۇشىرعاننان سوڭ جانىبەك ءالىمحان ۇلى ءبىراز ۋاقىت جانكۇيەر نازارىنان تىس قالعان ەدى. سول كەزدەرى «ول ۇلكەن سپورتتان تۇبەگەيلى قول ءۇزدى» نەمەسە «كاسىپقوي بوكسقا كەتكەلى جاتىر ەكەن» دەگەن سىڭايدا ءتۇرلى اڭگىمەلەر ءوربىدى. سول ساۋالدارعا سپورتشىنىڭ ءوزى باق وكىلدەرى الدىندا رەسمي تۇردە جاۋاپ بەردى.
كاسىپقوي رينگتە كۇش سىناسۋعا تۇبەگەيلى بەت بۇرعان جەتىسۋدىڭ ورەنى تانىمال مەنەدجەر ەگيس كليماسپەن كەلىسىمشارتقا وتىرۋدى قۇپ كورگەن ەكەن. اقش-تا تۇرىپ جاتقان تەگى ليتۆالىق ازامات كوپتەگەن بىلعارى قولعاپ شەبەرلەرىن ءوز قامقورلىعىنا الىپ, بۇگىنگى تاڭدا تولاعاي تابىستارعا قول جەتكىزىپ وتىر. سولاردىڭ قاتارىندا ۆاسيلي لوماچەنكو, الەكساندر ۋسيك, سەرگەي كوۆالەۆ, الەكساندر گۆوزديك جانە باسقا شوق جۇلدىزدار بار. سونىمەن قاتار 2017 جىلدىڭ ەڭ ۇزدىك مەنەدجەرى اتانعان مامانمەن ماديار اشكەەۆ, مەيىرىم نۇرسۇلتانوۆ, اسحات ءۋاليحانوۆ, ساعادات راحمانقۇلوۆ جانە قانات يسلام سىندى قازاقستاندىق بوكسشىلار جۇمىس ىستەيدى.
ەستەرىڭىزگە سالا كەتەيىك, جانىبەك ءالىمحان ۇلى وسى كۇنگە دەيىن كاسىپقويلار اراسىندا ەكى كەزدەسۋ وتكىزىپ ۇلگەردى. ەكى رەتىندە دە ول جەڭىسكە جەتتى. 2016 جىلى قانداسىمىز الماتىدا كولۋمبيالىق ميلتون نۋنەستى ءبىرىنشى راۋندتا ۇرىپ جىقسا, بىلتىر استانادا برازيليالىق جيلبەرتو پەرەيرۋ دوس سانتوستى ۇپاي سانىمەن ۇتتى.
عالىم سۇلەيمەن,
«ەگەمەن قازاقستان»
الماتى
