كورمەنىڭ اشىلۋ سالتاناتىندا ەلىمىزدىڭ ازەربايجان رەسپۋبليكاسىنداعى توتەنشە جانە وكىلەتتى ەلشىسى بەيبىت يساباەۆ: «بۇگىنگى كورمەنىڭ باستى جادىگەرى – «قازاقستاندىق تۋتانحامون» اتانىپ كەتكەن «التىن ادام». التىن ادام قازاقستاننىڭ تاريحي-مادەني قۇندى جادىگەرى بولىپ تابىلادى.
بىلتىر «التىن ادام» الەم مۋزەيلەرىنە شەرۋىن باستادى. ازەربايجان التىن ادام تابان تىرەگەن ءۇشىنشى ەل بولىپ تۇر. ءبىر جارىم اي بويى ازەربايجاندىقتار نازارىنا ۇسىنىلاتىن « ۇلى دالا مۇراسى: زەرگەرلىك ونەر جاۋھارلارى» اتتى بۇل كورمە ەكى ەل اراسىنداعى مادەني بايلانىسقا تىڭ سەرپىن بەرەرى ءسوزسىز. كورمەگە كەلۋشىلەر ساق ءداۋىرىنىڭ تەرەڭ تاريحىنا بويلاپ ەرەكشە اسەر الادى دەگەن سەنىمدەمىن», دەپ كورمە جۇمىسىنا تابىس تىلەدى.
ءوز كەزەگىندە ازەربايجان رەسپۋبليكاسى مادەنيەت ءمينيسترىنىڭ ورىنباسارى سەۆدا مامەدالي ء«بىزدى ورتاق تامىر, ورتاق ءداستۇر, ورتاق مادەنيەت جاقىنداستىرادى. بۇل جاقىندىق ءبىزدىڭ كوشباسشىمىز گايدار اليەۆ پەن نۇرسۇلتان نازارباەۆتىڭ ورتاق بايلانىسىنىڭ ناتيجەسى. ءدال سول بايلانىستى, تاتۋ كورشىلىكتى قازىرگى پرەزيدەنتىمىز يلحام اليەۆ مىرزا دا جالعاپ كەلەدى», دەپ ەكى ەل اراسىنداعى ساياسي بايلانىستىڭ دا مىعىم ەكەنىنە توقتالدى.
قازاقستان مەن ازەربايجان اراسىندا بۇرىننان تاريحي جانە مادەني بايلانىستارعا نەگىزدەلگەن ءداستۇرلى دوستىق سيپاتىنداعى ەكىجاقتى قارىم-قاتىناس قالىپتاسقان. جىل وتكەن سايىن قوس مەملەكەت اراسىنداعى ساياسي, ساۋدا-ەكونوميكالىق جانە مادەني-گۋمانيتارلىق بايلانىس بارلىق باعىتتاردا جانە وڭ ناتيجەلەرمەن دامىپ كەلەدى. ءارى اتالمىش ەكى ەل اراسىنداعى ىنتىماقتاستىق ءوزارا ىقپالداستىقتىڭ, كورشىلىك قارىم-قاتىناستىڭ وزىق ۇلگىسى بولىپ تابىلادى.
«التىن ادامنىڭ الەم مۋزەيلەرىنە شەرۋى» حالىقارالىق كورمە جوباسىنىڭ نەگىزگى ماقساتى شەتەلدىك كورەرمەندەردى ەرتە تەمىر داۋىرىندەگى ەۋرازيا ۇلى دالا بەلدەۋىنىڭ مادەني مۇراسىمەن تانىستىرۋ بولىپ تابىلادى. كورمەدە ۇلتتىق مۋزەي قورىنان ب.ز. دەيىنگى VII-ءىىى عاسىرلارعا جاتاتىن التىن بۇيىمدار كوللەكتسياسى مەن ەسىك قورعانىنان تابىلعان ساق جاۋىنگەرى تولىق كيىممەن تانىستىرىلدى.
حالىقارالىق «التىن ادامنىڭ الەم مۋزەيلەرىنە شەرۋى» اتتى جوبا اياسىندا ۇيىمداستىرىلىپ وتىرعان « ۇلى دالا مۇراسى: زەرگەرلىك ونەر جاۋھارلارى» كورمەسىندە تانىستىرىلاتىن زەرگەرلىك ونەر تۋىندىلارى – ەۋرازيانىڭ دالالىق مادەنيەتىنىڭ وزىندىك ءستيلى مەن ەرەكشەلىكتەرىن بەينەلەيتىن اشەكەي-بۇيىمدار مەن بىزگە اتى بەلگىسىز تاريح تەرەڭىندە قالعان شەبەرلەردىڭ قولدارىنان شىققان تۋىندىلاردىڭ ءبىر بولىگى عانا.
بيىلعى جىلى «التىن ادامنىڭ الەم مۋزەيلەرىنە شەرۋى» حالىقارالىق كورمە جوباسى شەنسي پروۆينتسياسى تاريحي مۋزەيىندە (سيان ق. قحر), گدانسك ۇلتتىق مۋزەيىندە (گدانسك ق. پولشا) جانە كورەيا ۇلتتىق مۋزەيىندە (سەۋل ق. كورەيا) وتكىزىلەدى. ال كەلەسى جىلى اتالمىش كورمەنى جاپونيا, گرۋزيا, ۇلىبريتانيا, يسپانيا جانە تۇركيا مەملەكەتتەرىنىڭ مۋزەيلەرىندە وتكىزۋ جوسپارلانىپ وتىر.
باكۋدەگى « ۇلى دالا مۇراسى: زەرگەرلىك ونەر جاۋھارلارى» كورمەسى 2018 جىلدىڭ 1 شىلدەسىنە دەيىن جالعاسادى.
«ەگەمەن-اقپارات»
