اۋقىمى جىل سايىن ارتىپ كەلە جاتقان دوداعا بيىل قاراعاندىلىقتار مەن ەلىمىزدىڭ باسقا دا وبلىستارىنان كەلگەن قوناقتار عانا ەمەس, بەلارۋستەن, قىرعىزستان مەن ۋكراينادان كەلگەن جەلاياقتار دا قاتىستى. كەنشىلەر قالاسىنىڭ ورتالىعىنداعى تاۋەلسىزدىك الاڭىندا باستالعان مارافونعا قاتىسۋشىلاردى قاراعاندى وبلىسىنىڭ اكىمى ەرلان قوشانوۆ قۇتتىقتاپ, ءسات-ساپار تىلەدى.
تىلەك بىلدىرۋشىلەر ءارتۇرلى قاشىقتىقتاعى ءتورت ارالىققا جۇگىردى. «بالاپان» دەپ اتالعان العاشقى ەكى شاقىرىمدىق قاشىقتىق 8 بەن 14 جاس ارالىعىنداعى بالالارعا ارنالعان. ال قالعان 7 شاقىرىمدىق «دوستىق», 15 شاقىرىمدىق «سپۋتنيك» جانە 21 شاقىرىمدىق «ارمانعا جول» ديستانتسيالارىندا ەرەسەكتەر جۇگىردى.
تاڭەرتەڭگى ساعات 8-دە الدىمەن بالالاردىڭ ەكى شاقىرىمدىق بايگەسى باستالدى. قىزدار اراسىنداعى جارىستا ءبىرىنشى بولىپ ۆيكتوريا شاروۆا, ودان كەيىن ۆيكتوريا شيمپف پەن ناتاليا لابەتسكايا كەلدى. ال ۇلدار اراسىنداعى باسەكەدە مارە سىزىعىن الدىمەن بىرىنەن سوڭ ءبىرى جەتكەن ستەپان سپاسسكي, داۋلەت بەرىكبول جانە ۆلادلەن يۆانوۆ قيدى. جەڭىمپاز, جۇلدەگەر بالالارعا 30-50 مىڭ تەڭگە ارالىعىندا اقشالاي سىيلىقتار ۇلەستىرىلدى.
ال بەلارۋستەن كەلگەن سپورتشى ۆلاديسلاۆ پرياموۆ 21 شاقىرىمنان استام قاشىقتىقتى 1 ساعات 6 مينۋتتا جۇگىرىپ ءوتىپ, جارتىلاي مارافوننىڭ باس بايگىسى ءبىر ميلليون تەڭگەنى ەنشىلەدى.
– جەڭىل اتلەتيكامەن جيىرما جىلدان بەرى شۇعىلدانىپ كەلەمىن, كاسىبي سپورتشىمىن, – دەيدى ۆ.پرياموۆ. – بۇرىن دەنە شىنىقتىرۋ ءپانىنىڭ مۇعالىمى بولدىم. قازىر مينسكىدە اۋەسقوي جەلاياقتاردى جاتتىقتىرامىن. وسى مارافون تۋرالى قاراعاندىلىق بەلگىلى سپورتشى, وبلىستىق جەڭىل اتلەتيكا فەدەراتسياسىنىڭ پرەزيدەنتى دميتري كارپوۆتان ەستىدىم. بيىل ول مەنى قاراعاندىعا ارنايى شاقىردى. مۇندا جۇگىرۋ باعىتىنداعى جولدار مەن كوشەلەردىڭ ءبارى جاقسى ءارى تازا ەكەن. باسەكەلەستەر دە وسال بولعان جوق.
ال ايەلدەر اراسىندا نەگىزگى جۇلدە قىرعىزستاننان كەلگەن ۆيكتوريا پوليۋديناعا بۇيىردى. ول دا كاسىبي سپورتشى, مارافوننان حالىقارالىق دارەجەدەگى سپورت شەبەرى ەكەن.
– مارافون ءبارىمىز ءۇشىن ۇلكەن مەرەكە بولدى. بۇل جارتىلاي مارافون مەن ءۇشىن بيىل دجاكارتادا وتەتىن ازيا ويىندارى الدىندا ءوز-ءوزىمدى سىناپ الۋىما جاقسى بولدى, – دەيدى ول.
«ارمانعا جول» جارتىلاي مارافونىن ءبىراز ەل قازىردىڭ وزىندە قاراعاندىنىڭ سپورتتىق برەندى دەپ اتاي باستاعان. ۇيىمداستىرۋشىلار بۇل جارىستىڭ اۋەسقويلار ءۇشىن عانا ەمەس, كاسىبي جەڭىل اتلەتتەر ءۇشىن دە تارتىمدى بولۋىنا كۇش سالۋدا.
قايرات ءابىلدا,
«ەگەمەن قازاقستان»
قاراعاندى
