ۇلتتىق كينو ونەرىمىزدىڭ دامۋ تاريحىنداعى ەرەكشە جەتىستىك ەكەنىن اتاعان مينيستر ارىستانبەك مۇحامەدي ۇلى اكتريسا سامال ەسلياموۆانى «ۇزدىك ايەل ءرولى» نوميناتسياسىنىڭ جەڭىمپازى اتانۋىمەن قۇتتىقتادى.
«بۇل ۇلتتىق كينو ونەرىمىزدەن بولەك, الەمدىك ونەردىڭ ۇلكەن جەتىستىگى. وسى ورايدا تالانتتى رەجيسسەر سەرگەي دۆورتسەۆويعا, اكتريسا سامال ەسلياموۆاعا العىس بىلدىرەمىن. كەرەمەتتەي تاندەم بولعان شىعارماشىلىق ۇجىم 10 جىلدان بەرى ىنتىماقتا جۇمىس ىستەپ كەلەدى. كەڭەس وداعى كەزىندە پوست كەڭەستىك ەلدەر اراسىندا مۇنداي ماراپات بۇرىن-سوڭدى بولعان ەمەس», دەگەن ارىستانبەك مۇحامەدي ۇلى سامال ەسلياموۆا مەن رەجيسسەر سەرگەي دۆورتسەۆويعا ارنايى سىي-سياپات تارتۋ ەتتى.
«بىرنەشە كۇننەن بەرى قانشاما قۇتتىقتاۋلار كەلىپ ءتۇسىپ جاتىر. تۋعان ەلىڭنىڭ ىقىلاسىن سەزىنۋ – ناعىز باقىت. تۋىپ-وسكەن ەل-جۇرتىما زور ريزاشىلىعىمدى بىلدىرەمىن», دەدى اكتريسا سامال ەسلياموۆا.
سامال ەسلياموۆا سولتۇستىك قازاقستان وڭىرىندە, قاراپايىم وتباسىندا دۇنيەگە كەلگەنىن ايتادى. «اكەم ورمانشى, انام پوچتادا جۇمىس ىستەدى. كەزىندە انام مەنى ورىس مەكتەبىنە بەرمەك بولعاندا, التى جاسىمدا قازاق مەكتەبىنە بارامىن دەپ تابانداپ تۇرىپ الدىم. وسىلايشا قازاق مەكتەبىندە ءبىلىم الدىم», دەپ وتكەندى ەسكە الدى اكتريسا.
مەكتەپ بىتىرگەن سوڭ پەتروپاۆلداعى ونەر كوللەدجىندە اكتەر ماماندىعى بويىنشا ءبىلىم العان سامال ەسلياموۆا, 2011 جىلى رەسەيدىڭ تەاتر ونەرى ۋنيۆەرسيتەتىندە (گيتيس) وقۋىن جالعاستىرعان.
رەجيسسەردىڭ سوزىنشە, «ايكا» ءفيلمى التى جىل بويى تۇسىرىلگەن. فيلم بيۋدجەتى 2,5 ملن ەۋروعا جەتە قابىل.
بۇعان دەيىن سامال ەسلياموۆا «قىزعالداق» (رەج. س. دۆورتسەۆوي) فيلمىندە باستى ءرولدى سومداعان. بۇل تۋىندى 2008 جىلى كانندا «ەرەكشە كوزقاراس» كونكۋرسىنىڭ باس جۇلدەسىن, جاس ادىلقازىلاردىڭ جۇلدەسىن, فرانتسيانىڭ ءبىلىم مينيسترلىگىنىڭ جۇلدەسىن جەڭىپ العان بولاتىن.
ايا ءومىرتاي,
سۋرەتتى تۇسىرگەن ەرلان وماروۆ,
«ەگەمەن قازاقستان»
