«نۇر وتان» پارتياسى وبلىستىق فيليالىنىڭ جيىنىندا تەحنيكالىق جانە كاسىپتىك ءبىلىم بەرۋ باعدارلامالارىنىڭ ورىندالۋ جايى تالقىلانىپ, بىرقاتار مىندەتتەر بەلگىلەندى. فيليال جانىنداعى ء«بىلىم» كوميسسياسىنىڭ ءتورايىمى عافۋرا بوستەكوۆا ءوز بايانداماسىندا ەلباسىنىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» جولداۋىندا بارشاعا تەگىن كاسىپتىك-تەحنيكالىق ءبىلىم بەرۋ جوباسىن جۇزەگە اسىرۋدى ودان ءارى جالعاستىرۋ مىندەتى قويىلعانىن, بۇل ورايدا وقىتۋدىڭ مازمۇندىلىعى زاماناۋي تەحنيكالىق تۇرعىدان قولداۋ تابۋدىڭ, تسيفرلى ءبىلىم بەرۋ رەسۋرستارىن دامىتۋدىڭ, كەڭ جولاقتى ينتەرنەتپەن, بەينەقۇرىلىمدارمەن جابدىقتاۋدىڭ ماڭىزىنا توقتالدى. كاسىپتىك-تەحنيكالىق ءبىلىم بەرۋ ءۇردىسىن جەتىلدىرۋدىڭ مۇمكىندىكتەرى كوپ. جۇمىس بەرۋشىلەر وبلىستا بىلىكتى جۇمىسشى كادرلارىنا سۇرانىستىڭ جوعارى ەكەنىن جەتە ەسكەرە وتىرىپ, جوعارى جاقتىڭ نۇسقاۋىن كۇتپەي-اق باستاماشىلدىق كورسەتكەندەرى, باعدارلاماعا بەلسەنە اتسالىسقاندارى ءجون, دەدى ول.
ءبىلىم باسقارماسى باسشىسىنىڭ ورىنباسارى ۆلاديمير تكاچەنكو ءوز ەسەبىندە كوللەدجدەر مەن كاسىپورىندار اراسىنداعى ەكىجاقتى كەلىسىمدەر اياسىندا ستۋدەنتتەردىڭ وندىرىستىك تاجىريبەدەن وتەتىنىنە, ۇشتەن بىرىنە ەڭبەكاقى تولەنەتىنىنە, ءوز كاسىبىنە توسەلگەندەردى جۇمىسقا اتتاي قالاپ الاتىندارىنا مىسالدار كەلتىردى. ج.قيزاتوۆ اتىنداعى ەسىل اۋىلشارۋاشىلىق كوللەدجىندە زاماناۋي قۇرال-جابدىقتار ورناتىلعان ۆەتەرينارلىق كلينيكا جۇمىس ىستەيدى. بىرقاتار سەرىكتەستىكتەردىڭ وتىنىشىمەن ەت, ءسۇت ونىمدەرى ءوندىرىسىنىڭ ماماندارى دايارلانادى. وسىلايشا جاس مامانداردىڭ ەڭبەك نارىعىنان ءوز ورنىن قينالماي تابۋىنا, جۇمىسقا ورنالاسۋىنا مۇمكىندىكتەر بارىنشا قاراستىرىلعان. «مۇنايماش», «پەتروپاۆل اۋىر ماشينا جاساۋ» زاۋىتى اكتسيونەرلىك قوعامدارىندا دۋالدى وقىتۋ جۇيەسى جاقسى جولعا قويىلعان. «سەۆكازەنەرگو» كومپانياسى كاسىپتىك دايارلاۋ جانە سەرۆيس كوللەدجى بازاسى نەگىزىندە ەلەكترمەن جابدىقتاۋ ءپانى بويىنشا وقىتۋ پوليگونىن اشقان. باسقوسۋدا پەتروپاۆل قۇرىلىس-ەكونوميكالىق كوللەدجىنىڭ تاجىريبەسى ۇلگى ەتىلدى. مۇندا 11 تسەح پەن ارنايى وقىتۋ شەبەرحانالارى قۇرىلعان. «ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى شەڭبەرىندە ەلەكترشى, گازبەن دانەكەرلەۋشى, سلەسار, اسپاز, ەسەپشى ماماندىقتارى دايارلانادى. دەگەنمەن دە, مەملەكەت تالابىنا ورتاق ۇلەس قوسۋدىڭ ورنىنا ق ۇلىقسىزدىق تانىتىپ جاتاتىن جۇمىس بەرۋشىلەر دە جوق ەمەس. سونىڭ سالدارىنان العان ماماندىعى بويىنشا قىزمەت تاپپاي باسقا سالاعا امالسىز اۋىساتىن جاعدايلار از ۇشىراسپايدى. وزىق تەحنولوگيالاردى ەنگىزۋ, تسيفرلاندىرۋ ءالى وزەكتى ماسەلە رەتىندە قالىپ وتىر.
كوللەدج ديرەكتورلارى اناتولي فۋرمانيۋك, نيكولاي سوكولوۆ, تاعى باسقالار ءوز كاسىبىن تەرەڭ يگەرگەن ماماندار ازىرلەۋ ەكى دەڭگەيلى جۇيەدە جۇرگىزىلەتىنىن, ستۋدەنتتەرگە تالىمگەرلەر مەن الەۋمەتتىك سەرىكتەستىكتەر بەكىتىلگەنىن, ۇكىمەت تاراپىنان بارلىق الەۋمەتتىك جاعداي قاراستىرىلعانىن جەتكىزدى. كەلەسى وقۋ جىلىنان باستاپ IT-ماماندارىنا مەملەكەتتىك تاپسىرىس مولشەرى ۇلعايىپ, ەكى جارىم مىڭداي جاس تەگىن وقۋعا قابىلدانادى. مۇنىڭ ءوزى شالعايداعى ەلدى مەكەندەر ءۇشىن وزىق ءبىلىم مەن قۇزىرەتتىلىككە قول جەتكىزۋگە ايقارا جول اشادى. «پرەزيدەنتتىڭ بەس الەۋمەتتىك باستاماسى» ۇلكەن سۇرانىسقا يە جاڭا ماماندار دايارلاۋعا زور سەرپىلىس بەرىپ وتىر. «تەحنيك-مەحاترونيك», «كومپيۋتەرلىك جابدىقتاردى جوندەۋ جانە قىزمەت كورسەتۋ», «اقپاراتتى قورعاۋ» سەكىلدى جاڭا ماماندىقتار پايدا بولادى. «WoridSkiills» جوباسى بويىنشا وقىتىلادى. وكىنىشكە قاراي ءبازبىر مەكەمەلەردىڭ كەلىسىمشارتتارى قاعاز جۇزىنەن ارىگە اسپاي جاتادى. وندىرىستىك تاجىريبەگە كەلگەن بولاشاق ماماندارعا جالاقى تولەۋ مۇمكىندىكتەرى بولا تۇرا, دۇرىس ىنتالاندىرىلمايدى. ءبىر مەزگىل بولسا دا ىستىق تاماق ۇيىمداستىرىلمايدى. الداعى كەزەڭدە وسى ولقىلىقتاردىڭ تۇزەتىلگەنى ابزال, دەستى وقۋ ورىندارىنىڭ باسشىلارى.
جيىندا كاسىپتىك-تەحنيكالىق ءبىلىم بەرۋ باعدارلامالارىن تالاپقا ساي جۇرگىزۋدىڭ, الەۋمەتتىك جاۋاپكەرشىلىكتى ارتتىرۋدىڭ وزگە دە جايتتارى اتاپ كورسەتىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
