اعىمداعى جىلى ۇبت الدىن الا بەلگىلەنگەن 167 ورىندا وتەدى. ونىڭ ىشىندە 48-ءى جوعارى وقۋ ورنىندا, 3-ەۋى كوللەدجدەردە, 116-سى مەكتەپ بازاسىندا ۇيىمداستىرىلماق. ر.الىمقۇلوۆتىڭ ايتۋىنشا, بيىلعى ۇبت فورماتىندا وزگەرىس جوق. ياعني بىلتىر قابىلدانعان جاڭا فورمات نەگىزىندە وتەدى. 2017 جىلدىڭ 1 قاڭتارىنداعى ء«بىلىم تۋرالى» زاڭىنا ەنگىزىلگەن وزگەرىستەرگە سايكەس, مەكتەپ بىتىرۋشىلەرگە ارنالعان ەمتيحاندار ەكى كەزەڭنەن تۇرادى. ونىڭ ءبىرى قورىتىندى اتتەستاتتاۋ بولسا, ەكىنشىسى – ۇبت.
– بيىل ۇبت سىناعى ون بەسىنشى مارتە وتپەك. 2004 جىلدان بەرى ۇبت-عا 1 ملن 600 مىڭ ادام قاتىستى. جىل وتكەن سايىن تەستىلەۋ تەحنولوگياسى جەتىلدىرىلىپ كەلەدى. سوڭعى ەكى جىلدا اپەللياتسياعا بەرۋشىلەر سانى ەكى ەسەگە تومەندەدى. اعىمداعى جىلى سۇراقتاردى جەتىلدىرۋ بويىنشا بىرقاتار جۇمىس اتقارىلدى. اسىرەسە فۋنكتسيالىق ساۋاتتىلىق بويىنشا تەست تاپسىرمالارى الدەقايدا جەتىلدىرىلە ءتۇستى, – دەپ اتاپ ءوتتى ۆيتسە-مينيستر ا.ايماعامبەتوۆ.
بۇل تاراپتا ر.الىمقۇلوۆتىڭ ايتۋىنشا, تەست سۇراقتارىنىڭ 50 پايىزى جاڭارتىلعان. ماسەلەن, بىلتىر 40 مىڭ سۇراق بولسا, بيىل 119 مىڭ سۇراق بار. ونىڭ ىشىندە 3 مىڭداي سۇراق اعىلشىن تىلىندە. وسى 119 مىڭ سۇراقتىڭ 11 پايىزى فۋنكتسيالىق ساۋاتتىلىق بويىنشا, ال 37 پايىزى ءبىر نەمەسە بىرنەشە دۇرىس جاۋاپتارعا قۇرىلعان سۇراقتار بولىپ كەلەدى.
ۇبت-عا قاتىسۋعا وتىنىمدەردى قابىلداۋ اعىمداعى جىلدىڭ 10 ناۋرىزىنان 10 مامىرىنا دەيىن جۇرگىزىلەدى. ال تەستىلەۋ ۋاقىتى بيىلعى 20 ماۋسىمنان 1 شىلدەگە دەيىن وتكىزىلمەك. بيىل مەكتەپتى 146 مىڭ تۇلەك بىتىرسە, ولاردىڭ باسىم بولىگى ۇبت-نى قازاق تىلىندە تاپسىرۋعا ءوتىنىم بەرگەنى قۋانتادى. ۇبت 5 ءپان بويىنشا, اتاپ ايتقاندا 3 مىندەتتى جانە تاڭداعان ماماندىعىنا سايكەس 2 بەيىندى ءپان بويىنشا وتەدى.
ايتا كەتەرلىگى, ۇبت بايقاۋىندا «التىن بەلگى» يەلەرىنىڭ جيناعان بالى وزگەلەرمەن تەڭ بولعان جاعدايدا عانا باسىمدىققا يە بولادى. بيىل 7 مىڭعا جۋىق «التىن بەلگى» يەلەرى ۇبت-دا باعىن سىناماق. سونداي-اق ۇبت-نى اعىلشىن تىلىندە تاپسىرۋعا بولادى.
بىلتىر اۋديتوريالاردان تىكەلەي ونلاين ترانسلياتسيا جۇيەسى ەنگىزىلگەنى بەلگىلى. بۇل ۇبت-نىڭ اشىق, ءادىل ءوتۋىن قامتاماسىز ەتەدى. بىلتىر ونلاين كورسەتىلىم 35 پايىزعا قولدانىلسا, بيىل تسيفرلاندىرۋ باعدارلاماسى اياسىندا بۇل كورسەتكىش ارتا تۇسپەك. ۇلتتىق تەستىلەۋ ورتالىعىنىڭ باسشىسى تەستىلەۋ كەزىندە «مەملەكەتتىك قۇپيا تۋرالى» زاڭعا سايكەس ەشبىر جاۋاپ الدىن الا بەرىلمەيتىندىكتەن اتا-انالار مەن تالاپكەرلەردىڭ «تەستىلەۋ جاۋاپتارى» رەتىندە الدىن الا ساتاتىن الاياقتارعا الدانباۋىن, تەك ءوز بىلىمىنە سەنۋى, بەرىلگەن ۋاقىتتى ءتيىمدى پايدالانۋى كەرەكتىگىن ءوتىندى.
سونداي-اق بيىل ەلباسىنىڭ بەس الەۋمەتتىك باستاماسى اياسىندا قوسىمشا 20 مىڭ گرانت ءبولىندى. ونىڭ 11 مىڭى تەحنيكالىق ماماندىقتارعا ارنالعاندىقتان تالاپكەرلەردىڭ باسىم بولىگى فيزيكا مەن ماتەماتيكا ءپانىن تاڭداۋعا قۇلشىنىس تانىتىپ وتىر.
دۋمان اناش,
«ەگەمەن قازاقستان»
