دەپارتامەنت باسشىلىعى قازا بولعان ادامداردىڭ بارلىعىندا اۋرۋدىڭ جەدەل ءتۇرى باستالعانىن ايتتى.
ونىڭ ايتۋىنشا, سوڭعى كۇندەرى اۋرۋحانالارعا 47 ادام جۇگىنگەن. ولاردىڭ 15-ىندە دياگنوز زەرتحانا ارقىلى راستالعان.
«بۇل وقيعالار ءبىر-بىرىمەن بايلانىستى ەمەس. ءبىرىنشى جاعدايدا ەر ادامدا كوكباۋىردىڭ جوق بولعاندىقتان يممۋنيتەتتى ءالسىز بولدى. ول ادامنىڭ ءومىرىن اراشالاي المادىق. ەكىنشى جاعدايدا, جاس قىز بەن 5 جاستاعى بالا بىردەن اسقىناتىن تۇرىنە شالدىعىپ تەز ارادا كوز جۇمدى. ولارمەن بايلانىستا بولعان 715 ادام دارىگەرلەر باقىلاۋىندا», - دەدى ايزات مولداقاسىموۆا.
دارىگەرلەر الماتىدا ىندەت بۇرق ەتتى دەپ دابىل قاعۋدىڭ قاجەتتىلىگى جوق ەكەندىگىن ايتتى. «اۋرۋدىڭ ۇلكەن مەرزىمدىلىككە ءوتۋى 10-15 جىلدا ءبىر كەزدەسەدى. ياعني, 2010 جىلى - 28 ادام, 2011 جىلى - 44 ادام, 2012 جىلى -23 ادام, 2016 جىلى 66 ادام اۋرۋعا شالدىققان. ءبىرىنشى كەزەكتە يممۋنيتەتى ءالسىز ادامدار جۇقتىرادى», - دەدى ا. مولداقاسىموۆا.
دارىگەرلەردىڭ ايتۋىنشا, 18 مامىردا بالاباقشادا جۇرگەندە بالانىڭ دەنە قىزۋى كوتەرىلگەن. كەشكە تامان ۇيگە كەلگەندە بۋىندارى اۋىرا باستاعان. بىرنەشە ساعات وتكەن سوڭ بالانىڭ اياقتارى قىزارا باستايدى. شۇعىل تۇردە شاقىرىلعان جەدەل جاردەم بالانى تۇنگى ساعات 00:50 بالالار اۋرۋحاناسىنا الىپ كەلگەن. الايدا, دارىگەرلەر اۋرۋدىڭ جىلدام اسقىنۋىنا بايلانىستى بالانىڭ ءومىرىن اراشالاي المادى.
س.اسفەندياروۆ اتىنداعى قازۇمۋ پروفەسسورى, جۇقپالى جانە تروپيكالىق اۋرۋلار كافەدراسىنىڭ مەڭگەرۋشىسى دۇيسەنوۆا امانگۇلدىڭ ايتۋىنشا, كوز جۇمعان ەرەسەك ادامداردىڭ ءبىرى - ايەل ادام دا, تاماعى اۋىرىپ, قىزۋى كوتەرىلسە دە ەرتەڭگىسىن جۇمىسقا بارعان.
«كوكباۋىرى جوق ادام اۋرۋمەن كۇرەسىپ 10 كۇن جانساقتاۋ بولىمىندە جاتقان. 10-كۇن دەگەندە ول كوز جۇمدى», - دەدى دارىگەرلەر.
دارىگەرلەر الماتى تۇرعىندارى مەن قوناقتارىنا ادام كوپ شوعىرلانعان جەرگە بارماۋعا كەڭەس بەردى. «قازى بارلىق ۇيىمداردا مادەني سپورتتىق شارالاردى ازايتۋعا تىرىسىپ جاتىرمىز. حالىققا الدىن الا ءتۇسىندىرۋ جۇمىستارى جۇرگىزىلۋدە. اۋىرعان ادامنىڭ بارلىعى بىردەي كوز جۇمبايدى. مىسالى, الماتىدا جۇقپالى اۋرۋلار اۋرۋحاناسىندا 2 ادام مەنينگوكوكتسەميا دياگنوزىنان جازىلىپ كەلەدى. سونداي-اق, مەنينگيت اۋرۋى ءبىر ساتتە جۇقپايدى. ياعني, 3 اپتاداي ۋاقىت ارالاسقان سوڭ عانا جۇعۋى مۇمكىن. سول سەبەپتى, بۇل قالىپتى جاعداي دەگىم كەلەدى», - دەدى امانگۇل دۇيسەنوۆا.
