وسىناۋ مەرەيلى ساتتە فيلارمونيا ۇجىمى ايگىلى كومپوزيتور, قازاقستاننىڭ حالىق ءارتىسى ءشامشى قالداياقوۆتىڭ شىعارماشىلىعىنا ارنالعان ء«ان پاديشاسى – ءشامشى اعا» اتتى كونتسەرتتىك باعدارلاما ۇيىمداستىرىپ, كورەرمەن نازارىنا ۇسىندى. ءشامشى انىنە سۋساعان اۋليەاتالىقتار بۇل كۇنى «بالاساعۇن» ورتالىق كونتسەرت زالىنا كوپتەپ جينالىپ, اۋەلى اتاقتى كومپوزيتوردىڭ ءومىر جولىنا ارنالعان دەرەكتى ءفيلمدى تاماشالادى.
ارينە ءشامشى تاعدىرىنا ارنالعان, ءشامشى شىندىعىنا بويلاعان فيلم كوپشىلىكتى بەيجاي قالدىرمادى. ءتىپتى كومپوزيتوردىڭ «انا تۋرالى جىر» ءانىنىڭ ومىرگە كەلۋ تاريحى ايتىلعاندا كورەرمەن كوزدەرىنە جاس ءۇيىرىلدى. بالا ءشامشىنىڭ اناسى ساقىپجامالدى ساعىنىپ, باقشادا اعىل-تەگىل جىلاپ وتىرعانىن كورگەنى جونىندە رايحان قالداياقوۆا تەبىرەنە ەستەلىك ايتىپ, بۇل ايگىلى ءاننىڭ ومىرگە كەلۋىنە وسى جاعدايدىڭ سەبەپكەر بولعانىن جەتكىزدى.
ءان پاديشاسىنا ارنالعان كونتسەرت قازاق ۇلت اسپاپتار وركەسترىنىڭ سۇيەمەلدەۋىمەن ءشامشى قالداياقوۆ اندەرىنەن قۇرالعان پوپپۋريمەن باستالدى. اتالعان وركەسترگە قازاقستاننىڭ ەڭبەك سىڭىرگەن قايراتكەرى مۇحتار راحمانقۇلوۆ جەتەكشىلىك ەتتى. كونتسەرت بارىسىندا وركەستردىڭ سۇيەمەلدەۋىمەن دينارا ديحانباەۆا كومپوزيتوردىڭ «قۇشاق جايعان قانداي ادام؟», ءرازيا ءمادىحانوۆا «اق ماڭدايلىم», دياس ابىلەكوۆ پەن دۋلات جاسۇزاقوۆ «ارىس جاعاسىندا» اندەرىن تامىلجىتا ورىنداسا, «كاۋسار» ۆوكالدىق, «الاتاۋ» فولكلورلىق ءانسامبلى مەن «اسىل اجەلەر» ءانسامبلىنىڭ ورىنداۋىنداعى ءشامشى اندەرى تىڭدارمان كوڭىلىنەن شىقتى. سونىمەن قاتار ۆالس كورولىنە ارنالعان اندەر دە ساحنا شىرايىن ارتتىردى. باعلان وماروۆتىڭ «جالعىز قايىق» ءانىن جاناتبەك كادىروۆ, ال قالدىبەك قۇرمانالىنىڭ ء«شامشى اعا» ءانىن «الاتاۋ» تريوسى ورىندادى. وزگە دە ونەرپازدار ءشامشى اندەرىن ناقىشىنا كەلتىرە ورىنداپ, كورەرمەن كوزايىمىنا اينالدى. كونتسەرت سوڭىندا فيلارمونيا ونەرپازدارى ءشامشى قالداياقوۆتىڭ «مەنىڭ قازاقستانىم» ءانىن, ياعني قازاقستان رەسپۋبليكاسىنىڭ مەملەكەتتىك گيمنىن قوسىلا شىرقاپ, تىڭدارماندار جۇرەگىن تەربەتتى.
حاميت ەسامان,
«ەگەمەن قازاقستان»
جامبىل وبلىسى
