بۇل كوپىردىڭ رەسپۋبليكالىق ماڭىزى بار, ول اقتوبەدەن رەسەيلىك استراحانعا دەيىنگى جولدى قىسقارتىپ, ترانزيتتىك كولىك اعىنىن اتىراۋعا كىرگىزبەي وتكىزۋگە مۇمكىندىك بەرەدى. سونىمەن قاتار ەلۋ مىڭنان اسا تۇرعىنى بار 18 ەلدى مەكەن حالقىن اۋدان ورتالىعىنا پاروممەن قاتىناسۋدان قۇتقارادى. بۇگىنگى كۇنگە دەيىن پاروممەن قاتىناۋ تۇرعىنداردىڭ تىرشىلىگىنە قولايسىز, قاۋىپتى جانە ءوڭىردىڭ الەۋمەتتىك-ەكونوميكالىق دامۋىنا دا كەرى اسەرىن تيگىزۋدە. وسى تاراپتا اسا قاجەتتى كوپىر قۇرىلىسى جۇمىسىن جىلدام اياقتاپ, ىسكە قوسۋ ماقساتىندا 2018-2020 جىلدارعا ارنالعان رەسپۋبليكالىق بيۋدجەتتى ناقتىلاۋ كەزىندە قوسىمشا 1 500,0 ملن تەڭگە بولىنگەن جاعدايدا, بيىلعى جىلى نىساندى تولىقتاي ءبىتىرىپ, ىسكە قوسۋعا مۇمكىندىك تۋاتىنىن ايتىپ, ءبىز ءساۋىر ايىندا پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال جولداعان ەدىك.
سول ساۋالعا ۇكىمەت باسشىسىنان جۋىردا جاۋاپ كەلدى. وندا «باستالعان جوبالاردى, سونىڭ ىشىندە ولاردىڭ قۇنىنىڭ قىمباتتاۋىن بولدىرماۋ ماقساتىندا ءبىرىنشى كەزەكتە اياقتاۋ قاجەتتىگى تۋرالى سىزدەردىڭ ۇسىنىستارىڭىزدى قولدايمىز. سونىمەن بىرگە, اعىمداعى جىلدىڭ بيۋدجەتىن ناقتىلاۋ بارلىق مۇمكىن رەسۋرستاردى قولدانا وتىرىپ مەملەكەت باسشىسىنىڭ جولداۋىن جانە «پرەزيدەنتتىڭ بەس الەۋمەتتىك باستاماسىن» ىسكە اسىرۋعا باعىتتالعانىن حابارلايمىز. سوعان بايلانىستى جوعارىدا كورسەتىلگەن جوباعا قاراجات ءبولۋ ماسەلەسىن شەشۋدى قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ جەرگىلىكتى جەلىنىڭ اۆتوجولدارى جوبالارى بويىنشا بيۋدجەت قاراجاتتارى ۇنەمدەلگەن جاعدايدا قايتا ءبولۋ جولىمەن نەمەسە 2018 جىلعا ارنالعان رەسپۋبليكالىق بيۋدجەتتى ناقتىلاۋ كەزىندە, سونداي-اق 2019-2021 جىلدارعا ارنالعان رەسپۋبليكالىق بيۋدجەتتى قالىپتاستىرۋ كەزىندە قاراستىرۋدى ۇسىنامىز» دەلىنگەن.
ۇكىمەت باسشىسىنىڭ وزەكتى ماسەلەگە كوڭىل ءبولىپ, قولداعانىن قۇپتايمىز. قاجەتتى قاراجاتتىڭ ايتىلعان باعىتتاردان تۇسەتىنىنەن ءۇمىتتىمىز.
عۇمار دۇيسەمباەۆ,
سەنات دەپۋتاتى
