سوناۋ 1998 جىلى ىرگەسى قالانعان جوعارى وقۋ ورنى بۇگىندە ەلىمىزدەگى بەدەلدى ۋنيۆەرسيتەتتەردىڭ بىرىنە اينالىپ ۇلگەردى. قازىرگى تاڭدا ۋنيۆەرسيتەتتە ونەر سالاسىنىڭ بولاشاق مايتالماندارى ءبىلىمىن شىڭداپ ءجۇر. ءبىلىم ورداسى ەلوردانىڭ عانا ەمەس, تۇتاس ەلدىڭ ونەرى مەن مادەنيەتىنىڭ دامۋىنا ەلەۋلى ۇلەس قوسۋدا. القالى جيىنعا قاتىسقان مەملەكەت باسشىسى قۇتتىقتاۋ لەبىزىندە اۋقىمدى مادەنيەت وشاقتارى ەلوردا مارتەبەسىن اسقاقتاتا تۇسەتىنىن اتاپ ءوتتى.
«شىعارماشىل زيالى قاۋىم ەلوردانىڭ مادەني ومىرىنە ەلەۋلى ۇلەس قوسىپ كەلەدى. مەن استاناعا الماتىدان جانە بۇكىل قازاقستاننان مادەنيەت سالاسىنىڭ ۇزدىك وكىلدەرىن شاقىردىم. الەمدە كوپتەگەن ۋنيۆەرسيتەت بار, بىراق ونەر ۋنيۆەرسيتەتى تەك استانادا عانا بوي كوتەردى. بۇگىندە ەلوردادا وپەرا جانە بالەت تەاترى, حورەوگرافيا اكادەمياسى, ورتالىق كونتسەرت زالى جانە باسقا دا مادەنيەت وشاقتارى اشىلدى. وسىنىڭ ءبارى ەلىمىزدىڭ بولاشاعى ءۇشىن, مادەنيەتىمىز بەن ونەرىمىز ءۇشىن جاسالىپ جاتىر», دەدى نۇرسۇلتان نازارباەۆ.
بۇدان كەيىن ەلباسى جوعارى وقۋ ورنىنىڭ ماڭىزىنا توقتالدى. الەمدەگى ءتۇرلى سالالاردىڭ ءبارى ونەرگە بارىپ تىرەلەتىنىن ءارى ونەر ارقىلى قازاقستاندى الەمگە ايگىلى ەتەتىنىمىزدى جەتكىزدى. سونىمەن قاتار مەملەكەت باسشىسى ونەر ۋنيۆەرسيتەتىنىڭ قالىپتاسىپ, دامۋى ءۇشىن ونىڭ باسشىلىعى مەن پروفەسسور-وقىتۋشىلار قاۋىمىنىڭ زور ءرول اتقارعانىن ايتتى.
«ۋنيۆەرسيتەت جانىندا كوللەدج, باكالاۆريات, ماگيستراتۋرا جانە دوكتورانتۋرا بار. 3 مىڭعا جۋىق ستۋدەنت ءبىلىم الۋدا. 20 جىل ىشىندە ۋنيۆەرسيتەتتىڭ 500-دەن استام تۇلەگى حالىقارالىق كونكۋرستار مەن بايقاۋلاردىڭ لاۋرەاتى اتاندى. سىزدەرگە تابىس تىلەيمىن, وتانىمىز – قازاقستان رەسپۋبليكاسىنىڭ ابىرويىن اسقاقتاتاتىن اتاقتى مۋزىكانتتاردىڭ شىعۋىنا جانە جاڭا ەسىمدەردىڭ تانىلۋىنا نيەتتەستىك بىلدىرەمىن!» دەپ تۇيىندەدى ەلباسى.
مەرەيتويلىق ءىس-شاراعا پارلامەنت دەپۋتاتتارى, مەملەكەتتىك ورگاندارىنىڭ وكىلدەرى, ديپلوماتيالىق كورپۋس, شىعارماشىلىق جانە عىلىمي ينتەلليگەنتسيا وكىلدەرى, جاستار مەن بۇقارالىق اقپارات قۇرالدارى وكىلدەرى قاتىستى.
مەرەكەلىك كونتسەرتتە كورەرمەنگە قازاق جانە شەتەل كومپوزيتورلارىنىڭ ءتۇرلى جانرداعى تانىمال تۋىندىلارى ۇسىنىلدى. ولاردىڭ قاتارىندا كەڭەس دۇيسەكەەۆتىڭ «ونەر ورداسى» شىعارماسى, ەۆگەني برۋسيلوۆسكيدىڭ «قىز جىبەك» وپەراسىنان ءۇزىندى, لاتيف ءحاميديدىڭ «بۇلبۇل» ءانى, لەونارد بەرستايننىڭ «ۆەستسايد تاريحى» ميۋزيكلىنەن «سيمفونيالىق بيلەر» جانە باسقا دا كوپتەگەن تۋىندىلار ورىندالدى.
جالپى, قازاق ۇلتتىق ونەر ۋنيۆەرسيتەتى ەل استاناسى ارقا توسىنە كوشىرىلگەن كەزدە قۇرىلدى. حالىق ءارتىسى ايمان مۇساقوجاەۆا ەلىمىزدەگى دارىنداردى جيناپ, مۋزىكا الەمىندەگى العاشقى قادامىنان باستاپ كاسىبي شەبەرلىكتى تولىق مەڭگەرگەنگە دەيىن جۇيەلى ءبىلىم بەرۋ تۋرالى ۇسىنىس ايتقان بولاتىن. بۇل يدەيانى پرەزيدەنت ن.نازارباەۆ قولداپ, وقۋ ورنىنىڭ اشىلۋىنا تىكەلەي ىقپال ەتتى. وسىنىڭ ناتيجەسىندە ۇكىمەتتىڭ 1998 جىلعى 31 ناۋرىزداعى قاۋلىسىمەن قازاق ۇلتتىق مۋزىكا اكادەمياسى اشىلدى. وقۋ ورنىنىڭ رەكتورى بولىپ قازاقستان رەسپۋبليكاسىنىڭ حالىق ءارتىسى, پروفەسسور ايمان مۇساقوجاەۆا تاعايىندالدى.
«ن.نازارباەۆ اكادەميانىڭ 1998 جىلعى 2 شىلدەدە وتكەن سالتاناتتى اشىلۋىنا قاتىسسا, 2000 جىلى قايتا جوندەۋدەن وتكەن باس عيماراتتى ارالاعان ەدى. ەلباسى تاپسىرماسىمەن جاڭا وقۋ عيماراتى سالىندى. ال 2005 جىلى ورگان زالى اشىلدى. سودان بەرى وندا تۇراقتى تۇردە كونتسەرتتەر وتكىزىلىپ كەلەدى. بۇگىندە ۋنيۆەرسيتەت ەلوردا مەن رەسپۋبليكانىڭ مادەني ورتالىعى مارتەبەسىنە قول جەتكىزدى», دەدى ۋنيۆەرسيتەت رەكتورى ا.مۇساقوجاەۆا.
قازىرگى تاڭدا ۋنيۆەرسيتەت دارىندى جاستاردىڭ تالانتىن ۇشتاپ, ونەر الەمىندەگى بيىكتەردى باعىندىرۋىنا جول سالاتىن بەدەلدى وقۋ ورداسىنا اينالدى. وقۋ ورنىندا جان-جاقتى ءبىلىم بەرۋ مەن ونەر شەبەرلەرىنىڭ جاڭا بۋىنىن تاربيەلەۋ ءۇشىن بارلىق جاعداي جاسالعان. تالاي تالانتتىڭ جولى اشىلىپ, شەبەرلىگى شىڭدالا ءتۇستى. بۇگىندە ۋنيۆەرسيتەت تۇلەكتەرى الەمدىك دەڭگەيدەگى ونەر سايىستارىندا جۇلدەلى ورىنداردان كورىنىپ ءجۇر. ماسەلەن, ءانشى ديماش قۇدايبەرگەن قىتايدىڭ «I am a singer» بايقاۋىنا قاتىسىپ, تالانتىمەن الەمدى تاڭعالدىردى. سونىمەن قاتار ۋنيۆەرسيتەت ستۋدەنتتەرى بەدەلدى حالىقارالىق كونكۋرستاردا توپ جاردى. ولاردىڭ قاتارىندا پ.چايكوۆسكي اتىنداعى جاستار كونكۋرسىنىڭ, «شابىت» حالىقارالىق كونكۋرسىنىڭ, «سلاۆيان بازارى» حالىقارالىق ءان فەستيۆالى سەكىلدى ونەر بايقاۋىنىڭ جۇلدەگەرلەرى بار.
اباي اسانكەلدى ۇلى,
«ەگەمەن قازاقستان»
