2012 جىلدىڭ 15 قاڭتارىندا قازاقستاندا پارلامەنت ءماجىلىسى مەن ءماسليحاتتارىنىڭ سايلاۋى وتەدى. بۇل سايلاۋدى قولدانىستاعى زاڭناما تالاپتارىن ساقتاي وتىرىپ, اشىق تا ءادىل باسەكەلەستىكپەن ءوتكىزۋ – بۇل ەلىمىزدەگى دەموكراتيانى ودان ءارى نىعايتۋداعى ماڭىزدى قادام بولىپ تابىلادى.
وسىعان بايلانىستى ءبىز سايلاۋ ناۋقانىنا قانداي دا ءبىر دارەجەدە قاتىساتىن ساراپشى قوعامداستىققا ۇندەۋ جولدايمىز.
1. سايلاۋ زاڭناماسىنىڭ تالاپتارىن مۇلتىكسىز ساقتاۋ.
«سايلاۋ تۋرالى» قر زاڭىنىڭ 27-بابى 9-تارماعى بۇقارالىق اقپارات قۇرالدارىندا سايلاۋعا بايلانىستى قوعامدىق پىكىر ساۋالدامالارىنىڭ ناتيجەلەرىن جاريالاۋ كەزىندە ساقتالۋى ءتيىس نورمالار كوزدەلگەنى بەلگىلى. اتاپ ايتقاندا, ساۋالداما جۇرگىزگەن ۇيىم, تاپسىرىس بەرگەن جانە اقىسىن تولەگەن ادامدار, اقپارات جيناۋ ءادىسى, سۇراقتىڭ ناقتى تۇجىرىمداماسى, سۇراق بەرىلگەندەر سانى مەن ساۋالداما ناتيجەلەرىنىڭ قاتەلىك كوەففيتسيەنتى مىندەتتى تۇردە كورسەتىلۋگە ءتيىس.
بۇقارالىق اقپارات قۇرالدارىندا قوعامدىق پىكىر ساۋالداماسىنىڭ ناتيجەلەرىن, سايلاۋ ءناتيجەلەرىنىڭ بولجامدارىن, سايلاۋعا قاتىستى وزگە دە زەرتتەۋلەردىڭ ءناتيجەلەرى تۋرالى اقپاراتتى سايلاۋعا دەيىنگى بەس كۇننىڭ ىشىندە جاريالاۋعا جول بەرىلمەيدى.
سايلاۋ كۇنى داۋىس بەرۋگە ارنالعان ءۇي-جايدا نەمەسە سايلاۋ پۋنكتىندە قوعامدىق پىكىردى سۇراۋعا تىيىم سالىنادى.
2. سايلاۋ پروتسەسىن الەۋمەتتانۋلىق سۇيەمەلدەۋ عىلىميلىق, كاسىبي شەبەرلىك جانە اشىقتىق پرينتسيپتەرى نەگىزىندە جۇزەگە اسىرىلۋى كەرەك. تەك سول كەزدە عانا ءوز جۇمىسىمىزدىڭ ناتيجەلەرىنە دەگەن سەنىم دەڭگەيىن قامتاماسىز ەتە الامىز.
3. ىنتىماقتاستىق, سايلاۋ پروتسەسىنىڭ بارلىق سۋبەكتىلەرىنە دەگەن ءوزارا سىيلاستىق پەن سەنىم احۋالىن قۇرۋعا ىقپال ەتۋ كەرەك. سايلاۋعا جۇمىلدىرىلعان ساراپشىلار, الەۋمەتتانۋشىلار, ساياسي تەحنولوگتار ءبىرىنشى كەزەكتە سايلاۋشىنىڭ قۇقىعىن سىيلاۋعا ءتيىس, ول اشىقتىق, وبەكتيۆتىلىك جانە اقپاراتقا قولجەتىمدىلىك جاعدايىندا ىسكە اسىرىلۋعا ءتيىس.
ساراپشى قوعامداستىقتىڭ جوعارىدا اتالعان نورمالار مەن پرينتسيپتەردى ساقتاۋى ءادىل دە اشىق سايلاۋ وتكىزۋگە, سونداي-اق ولاردىڭ ناتيجەلەرىنىڭ زاڭدىلىعىن قامتاماسىز ەتۋگە جاعداي جاسايدى.
استانا قالاسى, 2011 جىلعى 7 جەلتوقسان.
