وسى كۇندەرى استانالىق دەلەگاتسيا وڭىردەگى ءىرى كاسىپورىنداردى ارالاپ, ولاردىڭ تىنىس-تىرشىلىگىمەن تانىسىپ شىققان ەدى. «وڭىرارالىق ىنتىماقتاستىقتى نىعايتا ءتۇسۋ ءۇشىن مۇنداي قارىم-قاتىناستىڭ ماڭىزى وتە زور» دەيدى باتىس قازاقستان وبلىسى اكىمىنىڭ ءبىرىنشى ورىنباسارى يگور ستەكسوۆ.
باتىس قازاقستان وبلىستىق اكىمدىگىندە وتكەن قورىتىندى كەزدەسۋگە استانا قالاسى اكىمىنىڭ ورىنباسارى ەرمەك امانشاەۆ باستاعان دەلەگاتسيا – استانا قالاسى ينۆەستيتسيا جانە كاسىپكەرلىك باسقارماسى, «Astana Innovations» اق, «Astana»اكك ۇك» اق, «استانا كونۆەنشن بيۋرو» جشس, «Smartnet» جك سەكىلدى مەملەكەتتىك جانە جەكەمەنشىك مەكەمە-ۇيىم وكىلدەرى قاتىستى.
ارينە, وڭىرلەر اراسىنداعى ىسكەرلىك قارىم-قاتىناس بۇگىن باستالىپ وتىرعان جوق. ستەكسوۆتىڭ ايتۋىنشا, بيىلعى اقپان ايىندا باتىس قازاقستان وبلىسىنىڭ دەلەگاتسياسى استانادا بولىپ, ەلوردادا قولعا الىنعان جاقسى ۇردىستەرمەن جاقىن تانىسىپ قايتقان. وسى كەزدەسۋلەر ناتيجەسىندە بىرنەشە كەلىسىم-شارتقا قول قويىلدى. ورال قالاسىندا قولعا الىنعان «اقىلدى قالا» جوباسىن جۇزەگە اسىرۋدا استانانىڭ ءىس-تاجىريبەسى وتە كەرەك.
- Smart city, نوۋ-حاۋ, تسيفرلاندىرۋ سالالارىندا قازىردىڭ وزىندە تىعىز ىسكەرلىك بايلانىستىڭ نەگىزى قالانىپ, جۇزەگە اسىپ جاتىر, - دەيدى يگور ستەكسوۆ.
بۇعان دەيىن ورالداعى مەتالل جابىنى, پروفليست, سونداي-اق گاز, سۋ, كارىزگە ارنالعان ديامەترى 20-دان 1600 ميلليمەترگە دەيىنگى پوليەتيلەن, پوليپروپيلەن قۇبىرلارىن شىعاراتىن «ورال ساۋدا-ونەركاسىپ كومپانياسى» جشس, الەمدىك باسەكەگە قابىلەتتى شىنى ونىمدەرىن شىعاراتىن «ستەكلو سەرۆيس» جشس تسەحتارىندا بولعان استانالىق دەلەگاتسيا وكىلدەرى مۇنداي ارىپتەستىك ەكى جاققا دا پايدالى بولاتىنىن ماقۇلداپ وتىر. ماسەلەن, ورالدىق «ستەكلو سەرۆيس» جشس ءونىمىنىڭ 31%-ى رەسەي فەدەراتسياسىنا يمپورتتالادى, استاناداعى «EXPO-2017» كورمە قالاشىعى قۇرىلىسىنا دا ورالدىق شىنى كەڭىنەن پايدالانىلىپ, ساپالىلىعىن كورسەتكەن.
وڭىرلەردىڭ ءبىر-بىرىمەن ىسكەرلىك بايلانىسقا ءتۇسىپ, ميداي ارالاسۋى, كاسىپكەرلىك پەن ءوندىرىستىڭ بارلىق سالاسىندا تىعىز قارىم-قاتىناس جاساۋى – ەلباسىنىڭ تىكەلەي تاپسىرماسى. استانا قالاسى اكىمىنىڭ ورىنباسارى ەرمەك امانشاەۆ ەلوردانىڭ 20 جىلدىعىنا وراي مەملەكەت باسشىسىنىڭ تاپسىرماسىنا سايكەس كەشەندى ءىس-شارالار جوسپارى جاسالىپ, كوپتەگەن باستاما قولعا الىنعانىن ايتادى. استانا – بۇگىندە الەم مويىنداعان باستامالار الاڭى, مۇندا اي سايىن دۇنيەجۇزىلىك دەڭگەيدەگى شارالار ءوتىپ جاتادى, الەمدەگى يننوۆاتسيالىق جاڭالىقتار دا تەز جەتەدى.
كەزدەسۋ بارىسىندا استانادا جۇزەگە اسىرىلىپ جاتقان ناقتى جوبالار تانىستىرىلدى. استانا قالاسى ينۆەستيتسيا جانە كاسىپكەرلىك باسقارماسى باسشىسىنىڭ ورىنباسارى ەرلان بەكمىرزاەۆ بولاشاقتا ەل مەن ەل ەمەس, قالا مەن قالا كوبىرەك باسەكەلەستىككە تۇسەتىنىن ايتادى. الەمدىك McKinsey Global Institute زەرتتەۋشىلەرىنىڭ پىكىرىنشە 2025 جىلى الەمنىڭ 60% بايلىعىن جەر بەتىندەگى 600 قالا وندىرەتىن بولادى. قازىردىڭ وزىندە جۇمىر جەر بەتىندەگى قالالىقتار سانى اۋىلدىقتاردان اسىپ كەتكەن. دۇنيەجۇزىلىك بۇل ءۇردىستى قازاقستان دا ەسكەرمەسە بولمايدى, ەلىمىزدە ءىرى مەگاپوليستەردى دامىتۋ, قالالاردىڭ دامۋى مەن يننوۆاتسيا جەتىستىكتەرىن جاپپاي يگەرۋ اسەلەسىنە ەرەكشە كوڭىل ءبولىنىپ وتىرعانى سوندىقتان.
استانا قالاسى مەن باتىس قازاقستان وبلىسى كاسىپكەرلەرىنىڭ كەزدەسۋى بارىسىندا استانالىقتار ەلوردادا قولعا الىنعان باستامالار مەن باعدارلامالاردى ەگجەي-تەگجەيلى تانىستىرىپ بەردى. «Astana Innovations» اق توراعاسى ورىنباسارى سەرىك قۇسايىنوۆ ەلورداداعى «Smart City» تۇجىرىمداماسى مەن قالا ەكونوميكاسىن تسيفرلاندىرۋ بويىنشا قولعا الىنعان يننوۆاتسيالىق جوبالار تۋرالى ايتسا, «Smartnet» جك يەسى تايىر قوجاحمەتوۆ پاتەر يەلەرى كووپەراتيۆتەرىنىڭ قىزمەتىن اۆتوماتتاندىرۋ بويىنشا «ە-پاك» جۇيەسىن ەنگىزۋدىڭ تەتىكتەرىن ءتۇسىندىردى.
كەزدەسۋ سوڭىندا ەرمەك امانشاەۆ پەن يگور ستەكسوۆ استانا قالاسى مەن باتىس قازاقستان وبلىسى اكىمدىگى اراسىندا ىنتىماقتاستىق جونىندەگى مەموراندۋمعا قول قويدى. سونداي-اق باتىس قازاقستان وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى مەن استانا قالاسى ينۆەستيتسيا جانە كاسىپكەرلىك باسقارماسى ءوزارا كاسىپكەرلىك بايلانىستاردى دامىتۋ تۋرالى, ورال قالاسى اكىمدىگى مەن «Astana Innovations» اق «Smart City» تۇجىرىمداماسىن جۇزەگە اسىرۋ بويىنشا, «ورال» اكك ۇك» اق مەن «Astana»اكك ۇك» اق ينۆەستيتسيا جانە مەملەكەتتىك-جەكەمەنشىك ارىپتەستىگى سالالارى اياسىندا, باتىس قازاقستان وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى مەن «استانا كونۆەنشن بيۋرو» جشس ىشكى جانە حالىقارالىق ءتۋريزمدى دامىتۋ ماسەلەلەرى بويىنشا, ورالدىق «اگران» جشس مەن «Astana»اكك ۇك» اق ءوزارا ارىپتەستىك حاقىندا مەموراندۋمدارعا قول قويدى.
قازبەك قۇتتىمۇرات ۇلى,
«ەگەمەن قازاقستان»
ورال قالاسى
سۋرەتتى تۇسىرگەن تەمىربولات توقمامبەتوۆ
