مۇنىڭ ءوزى قازاقستان مەن رەسەيدىڭ شەكارالاس وڭىرلەرى اراسىنداعى قارىم-قاتىناستاردىڭ جاڭا تۇرپاتتا قالىپتاسۋىنا دا ىقپالىن تيگىزدى. كوپ كەشىكپەي شەكارالاس وڭىرلەر ءۇشىن ورتاق ەكونوميكالىق, گۋمانيتارلىق جانە ەكولوگيالىق ماسەلەلەردى ءتيىمدى تۇردە شەشۋ جولدارى بەلگىلەندى. بۇل قادام تاتۋ-ءتاتتى, كورشىلىك بايلانىستاردىڭ ورىستەۋىنە جول اشتى. قازاقستان مەن رەسەي وڭىرلەرى اراسىنداعى وسىنداي شەكارالىق ىنتىماقتاستىقتىڭ ومىرشەڭ, قايتالانباس مودەلى رەسەيدىڭ ورىنبور جانە قازاقستاننىڭ اقتوبە وبلىستارى اراسىندا جىلدان-جىلعا نىعايىپ كەلەدى.
بۇگىنگى كۇنى ەكى ءوڭىر اراسىنداعى ەكونوميكالىق جانە مادەني بايلانىستار ودان ءارى تەرەڭدەي تۇسكەنى دە اتار تاڭداي, باتار كۇندەي شىندىق. ايتالىق وتكەن 2017 جىلدىڭ كوكتەمىندە ورىنبوردا وتكىزىلگەن اقتوبە وبلىسىنىڭ كۇندەرى ۇلكەن تابىسپەن وتكەنىنە كۋا بولا الامىز. ەڭ باستىسى بۇدان ءبىر جىل بۇرىن ەكى ءوڭىر باسشىلارى قول قويعان كەلىسىمدە كورسەتىلگەن وڭىرارالىق ماسەلەلەر تولىقتاي دەرلىك شەشىمىن تاپقانىنىڭ ءوزى ءبىر مەرەي. ءبىر مارتەبە. ايماقتىق-شەكارالىق دەڭگەيدە كەلىسوزدەر ۇستەلىندە قويىلعان وزەكتى جايتتەر قاتارلاسا, قاناتتاسا وركەندەۋگە قازىق بولا العانى –ەكى جاقتاعى ساراپشىلار مەن جۇمىس توپتارىنىڭ دا ناتيجەلى ەڭبەگىنىڭ كورىنىسى.
ەكىنشى ءبىر كوزقاراس تۇرعىسىنان قاراستىرعاندا مۇنىڭ ءوزى بەينە ءبىر سىناق ىسپەتتەس دەر بولساق, بۇدان ەكى جاقتىڭ دا ابىرويمەن وتە بىلگەنى اتاپ ايتۋعا تۇرارلىق ءىس. وسى ارقىلى شەكارالاس وڭىرلەرگە ورتاق تۇستاردىڭ تۇيىندەرى تارقاتىلدى. سونىڭ ىشىندە ەكونوميكالىق ىنتىماقتاستىقتىڭ باستى بۋىنى –وتىن-ەنەرگەتيكا كەشەنى, ياعني مۇناي ونىمدەرى مەن گاز ءوندىرۋ جانە كوگىلدىر وتىندى قايتا وڭدەۋ سالاسى بويىنشا بەرىك ونەركاسىپتىك نەگىز قالاندى. سونداي-اق ستراتەگيالىق ارىپتەستىك ەكىجاقتاعى ماشينا جاساۋ ىسىنە وڭ سەپتىگىن تيگىزدى.
سوڭعى ءبىر ىشىندە تۇرمىستىق-گۋمانيتارلىق ماسەلەلەرگە قاتىستى دا شەشىمىن تاپقان ىستەر كوپ. شەكارالاس اۋداندىردىڭ تۇرعىندارى ءۇشىن ارنايى شەكارا وتكەلدەرىن وتكىزۋگە قاتىستى ماسەلەلەر ناقتىلاندى. بىلتىر ءساۋىر ايىنىڭ اياعىندا ورىنبوردا وتكىزىلگەن اقتوبە وبلىسىنىڭ كۇندەرىنە جۋرناليستىك ىسساپارمەن جولىمىز تۇسكەن كەزدە رەسەي شەكاراسىنان باستالعان جولدىڭ 45 شاقىرىمدىق بولىگى ويقىل-شويقىل ەكەنىن كورگەنبىز. ال قازىر قانداي دەسەك, بۇعان –تاقتايداي دەپ جاۋاپ قايتارۋعا ابدەن بولادى. ءبىر سوزبەن ايتقاندا قىسقا ۋاقىتتىڭ ىشىندە اياقتالعان كۇردەلى جوندەۋ بۇگىندە شەكارالاس وبلىستار اراسىندا بارىس پەن كەلىستىڭ ودان ءارى جيىلەي تۇسۋىنە جول اشىپ وتىر. بۇعان جاۋاپ رەتىندە بۇگىنگى كۇنى اقتوبەلىك اۆتوجولشىلار اقتوبە-ورسك باعىتىنداعى ماگيسترالدىڭ رەسەي فەدەراتسياسىنا دەيىنگى بولىگىنە كۇردەلى جوندەۋ جۇمىستارىن جۇرگىزۋدە. ونىڭ قۇرىلىسى بيىلعى جىلدىڭ سوڭىنا دەيىن اياقتالماق.
ەندى مىنە تابيعاتتىڭ تامىلجىعان كەزىندە, اسپاننان راحمان نۇرى مولىنان توگىلىپ, «كوكوراي شالعىن بايشەشەك ۇزارىپ ءوسىپ تولعان شاقتا» اقتوبەدە وتكىزىلگەن ورىنبور وبلىسىنىڭ كۇندەرى دوستىق پەن تاتۋلىقتىڭ تۋىن تاعى دا جەلبىرەتىپ الا جونەلدى. سونداي-اق بۇل كۇندەر تەك شەكراالاس اقتوبە مەن ورىنبور وبلىستارى ءۇشىن عانا ەمەس, تۇتاستاي ەگەمەن ەلىمىز ءۇشىن, ءتىپتى كەرەك دەسەڭىز ىزگى نيەتتى مەملەكەت ارالى قارىم-قاتىناستار ءۇشىن ەلەۋلى دە ماڭىزدى ءرول اتقاردى دەۋگە ابدەن بولادى.
بۇلاي دەۋىمىزدىڭ باستى سىرى نەدە؟ ياعني الدىمىزداعى شىلدە ايىنىڭ التىنشى جۇلدىزىندا ەلورداسى استانانىڭ 20 جىلدىعى كەڭىنەن اتالىپ وتىلمەك. وسى مەرەيلى داتانىڭ قۇرمەتىنە وراي كۇندەر كەزىندە ارنايى ۇيىمداستىرىلعان اۆتوكەرۋەن ورىنبوردان قىزىلوردا قالاسىنا قاراي اتتاندى. ماسەلەنىڭ ءمانىسى مىنادا. ورىنبور –قازاق ەلىنىڭ تۇڭعىش استاناسى بولعانى تاريحتان جاقسى ءمالىم. بۇدان كەيىن ەل استاناسى ورىنبوردان قىزىلورداعا, سودان سوڭ الماتىعا كوشىرىلدى. ال سوڭعى 20 جىل ىشىندە ەلدىڭ ورداسى –استانا بولىپ وتىر. اۆتوكەرۋەن قازاق ەلىنىڭ بۇعان دەيىنگى ءۇش استاناسىن ارالىپ, 6-شى شىلدە كۇنى كەرۋەننىڭ باسىن استاناعا تىرەمەك.
وسى ۋاقىتتىڭ ارالىعىندا ونىڭ قۇرامىنداعى مەملەكەت جانە قوعام قايراتكەرلەرى, زيالى قاۋىم مەن جاستار وكىلدەرى مادەنيەت پەن نەر جاناشىرلارى, عالىمدار مەن ءبىلىم, دەنساۋلىق ساقتاۋ سالاسىنىڭ بىلىكتى ماماندارى اتالعان باعىت بويىنشا ەل-جۇرتتىڭ اراسىندا بولىپ كەزدەسۋلەر وتكىزەدى. شەبەرلىك ساعاتتارىن جۇرگىزىپ, تۇرعىندارعا ءتيىستى كەڭەستەر مەن كومەكتەر بەرەدى. مۇنداعى باستى ماقسات –استانانى اسقاقتاتۋمەن بىرگە قازاق ەلىنىڭ بۇرىنعى استانالارى ورىنبوردىڭ جانە قىزىلوردا مەن الماتىنىڭ ورنىن ولقى تۇسىرمەۋ. ونىڭ ارقايسىسىنىڭ ەلىمىزدىڭ ءوسىپ-وركەندەۋى مەن دامۋىنداعى الاتىن ورنى مەن مارتەبەسى تۋرالى عيبراتتى اڭگىمەلەر ءوربىتۋ.
بۇل جونىندە اقتوبە مەن ورىنبور وبلىستارى رەسمي دەلەگاتسيالارىنىڭ كەزدەسۋى مەن تۇڭعىش پرەزيدەنت اتىنداعى ساياباقتا ورىنبور وبلىسىنىڭ كۇندەرى سالتاناتتى تۇردە اشىلۋ ءراسىمى كەزىندە اقتوبە وبلىسىنىڭ اكىمى بەردىبەك ساپارباەۆ ايتىپ بەردى. ورىنبور –قازاقستاننىڭ تۇڭعىش استاناسى بولعانىن ەشكىم تاريحتان سىزىپ تاستاي المايدى. تاريحتىڭ اتى تاريح. وسى ورايدا ورىنبور –قىزىلوردا –الماتى –استانا اۆتوكەرۋەنىنىڭ قىزمەتىن ورىنبوردان باستاۋ جونىندە شەكارالاس ارىپتەستەر تاراپىنان ۇسىنىس تۇسكەن كەزدە بۇعان تۇسىنىستىكپەن قاراي بىلدىك. ورىندى تىلەككە قولداۋ كورسەتتىك, -دەدى گازەت تىلشىسىنە ورىنبور وبلىسىنىڭ گۋبەرناتورى يۋري بەرگ. سونداي-اق شەكارالاس ءوڭىر باسشىسى رەسمي دەلەگاتسيالاردىڭ كەزدەسۋى كەزىندە قازاقستان پرەزيدەنتى نۇرسۇلتان نازارباەۆتىڭ قازاقستان مەن رەسەي تاعدىرىڭ ءوزى قوسقان ەجەلگى تاريحي كورشىلەر ەكەندىگى جونىندەگى سارابدال ءسوزىن العا تارتىپ –سول ەجەلگى قارىم-قاتىناستاردى قازىرگى گەو-ساياسي جانە گەو-ەكونوميكالىق تالاپتارعا ساي جالعاستىرىپ, جاڭعىرتا بەرۋ باستى كورشىلىك ءارى ارىپتەستىك پارىز ەكەنىن مالىمدەدى.
سونداي-اق ورىنبور وبلىسى ۇكىمەتىنىڭ توراعاسى يۋري بەرگتىڭ تۇجىرىمداۋىنشا وڭىرارالىق ىنتىماقتاستىق تۇتقاسىن قالىپتاستىرۋ ءىسى ەكى جاققا دا بىردەي پايدا مەن تيىمدىلىك اكەلە ءبىلدى. وسى ارقىلى ەكونوميكالىق بايلانىستار مەن وندىرىستىك كووپەراتسيانى دامىتۋدىڭ باستى نەگىزدەرى قالاندى. وسىنداي بايلانىستار گۋمانيتارلىق سالادا دا ورنىعىپ كەلەدى. ونىڭ باستى كورىنىسىنىڭ ءبىرى –ورىنبور مەن اقتوبە وبلىستارى اراسىنداعى ەكونوميكالىق جانە گۋمانيتارلىق تۇرعىداعى بايىپتى قارىم-قاتىناستار دەدى ول ودان ءارى.
گۋبەرناتوردىڭ ايتۋى بويىنشا ورىنبور وبلىسىنىڭ اقتوبەدەگى كۇندەرىنە قاتىسۋ ءۇشىن مىڭنان استام ادام كەلىپتى. ونىڭ نەگىزگى قۇرامى ىسكەر توپتار مەن كاسىپكەرلىك قۇرىلىمداردان. مينەرالدى ونىمدەردى ءوندىرۋ مەن وڭدەۋ ءىسىنىڭ شەبەرلەرىنەن, ماشينالار مەن ەلەكتر جابدىقتارىن قۇراستىرۋشىلاردان تۇرادى. ورىنبور رەسەيدىڭ دالالىق وڭىرىندە ورنالاسقان شەتكەرى وبلىستارىنىڭ ءبىرى بولا تۇرسا دا, سوڭعى ۋاقىتتا ونىڭ جالپىرەسەيلىك ەكونوميكانىڭ دامۋىنا قوسىپ وتىرعان ۇلەسى جىلدان جىلعا ءوسىپ كەلە جاتقانى بايقالادى. بۇعان شەكارالاس ايماقتا جاساقتالعان ينۆەستيتسيالىق باعدارلامالار مەن جوبالاردىڭ تيگىزگەن ىقپالى مول, -دەدى كەزدەسۋلەر كەزىندە ورىنبور وبلىسى ۇكىمەتى توراعاسىنىڭ ورىنباسارى, ۆيتسە-گۋبەرناتور ن.ل.لەۆينسون. سونداي-اق ونىڭ ايتۋىنشا ءونىم ءوندىرۋشى وندىرىستىك قۇرىلىمدار اراسىندا بىرىككە رەسەي-قازاقستان كاسىپورىندارىنىڭ سانى ءوسىپ كەلەدى ەكەن. ءسوز جوق, بۇل وتە جاعىمدى ءجايت. سونىڭ ىشىندە ناتاليا لازەرەۆنا «زابەر 56 –«ۆانيل» سەكىلدى ورىنبور مەن اقتوبە وندىرىسشىلەرىنىڭ باسىن قوسقان ىرگەلى جوبانى وڭ مىسال رەتىندە كەلتىردى.
تاعى ءبىر تۇيسىنگەنىمىز بالامالى ەنەرگيا كوزدەرىن ءوندىرۋ مەن دامىتۋ ىسىندە شەكارالاس وڭىرلەر اراسىندا ءبىرىن-ءبىرى بايىتاتىن ءارى بىرىنەن ءبىرى ۇيرەنەتىن تاجىريبەلەر جەتكىلىكتى ەكەندىگى. سونداي-اق ورىنبورلىقتار تاياۋدا بيزنەس-كلاسس جوباسى شەڭبەرىندە «تالىمگەر -2018» جوباسىن بەكىتكەن ەكەن.
سايكەستىلىك دەيمىز بە, جوق الدە كەزدەيسوقتىق دەيمىز بە, نە دەسەڭىز و دەڭىز, ءدال وسىعان ۇقساس جوبا بيىل اقتوبە وبلىسىندا دا قولعا الىنعانىنا تاڭ قالماي كورىڭىز. بۇعان اقتوبەدە بيزنەستى جاڭادان باساعانداردىڭ قارلىعاش-قادامدارىن قولداۋ ءۇشىن رەسپۋبليكادا بالاماسى جوق ايىرىقشا جوبا قولعا الىنانىن ايتقان ءجون. ونىڭ باستى ءبىر ەرەكشەلىگى –جوباعا قاتىسۋشىلار بيزنەستىڭ جىلىك مايىن شاعىپ ىشكەن بىلىكتى تە تاجىريبەلى تالىمگەرگە بەكىتىلۋىندە.
سونداي-اق ورىنبور وبلىسىندا دەنساۋلىق ساقتاۋ ءىسى مەن مەديتسينانىڭ دامۋى تۇتاستاي رەسەي فەدەراتسياسى بويىنشا الدىڭعى ورىندا ەكەنى جاسىرىن ەمەس. مۇندا ءتىپتى فەدەروۆ اتىنداعى كوز اۋرۋرالى كلينيكاسى بۇكىلرەسەيلىك ماڭىزعا يە ەكەنى دە بەلگىلى. كۇندەر كەزىندە اقتوبە قالاسىنداعى تۇڭعىش پرەزيدەنت اتىنداعى ساياباقتا ورنالاستىرىلعان كورمەلەر تىزبەگىندە «جوعارى تەحنولوگيالىق مەديتسينالىق كومەك» دەپ اتالاتىن ورىنبور وبلىسى مەديتسيناسى جەتىستىكتەرىنە ارنالعان كورمەنى كورشىلەس وڭىرلەر باسشىلارى بەردىبەك ساپارباەۆ پەن جانە يۋري بەرگپەن بىرگە تاماشالاۋدىڭ ءساتى تۇسكەنى-ءدى.
ءسوز جوق, باردى بار, جاقسىنى جاقسى دەپ باعالاۋ پارىز. تەڭىزدىڭ ءدامى تامشىسىنان بىلىنەدى دەگەندەي –كورمە پاۆيلوندارى مەن قابىرعالىق ماتەريالدارعا كوز تاستاعان كەز-كەلگەن ادام ورىنبور مەديتسيناسىنىڭ وزىق داستۇرلەرىنە قانىعا الادى. ايتسە دە ورىنبورلىقتاردىڭ ستراتەگيالىق ارىپتەستەرى –اقتوبەلىكتەر دە بۇل باعىتتا باسەكەگە توتەپ بەرە الاتىنداي دەڭگەيدە ەكەنىن ايتپاي كەتسەك, شىندىققا قيانات بولار. مۇندا مەديتسينالىق كلاستەر قۇرۋ ءىسى بويىنشا رەسپۋبليكادا بالاماسى جوق جاسامپاز جوبالار قولعا الىنعانى. سوعان سايكەس اقتوبەدە رەسپۋبليكانىڭ باتىس وڭىرىندەگى باتىس قازاقستان, اتىراۋ, ماڭعىستاۋ جانە قىزىلوردا وبلىستارىنىڭ تۇرعىندارىن مەديتسينالىق قىزمەتپەن قامتيتىن ءىرى ورتالىققا اينالعانىن ايتۋدىڭ ءوزى ءبىر مارتەبە. كۇندەر كەزىندە وبلىس ورتالىعىنداعى «دارۋ» كوز اۋرۋلارىن ەمدەۋ ورتالىعىنىڭ قىزمەتىمەن تانىسقان ورىنبورلىق ماماندار وعان وڭ باعا بەرگەنى –كاسىبيلىكتىڭ كورىنىسى بولماق.
سونىمەن اقتوبەلىكتەر ورىنبورلىق كورشىلەرىنەن, ولاردىڭ يگى دە ىزگى ىستەرىنەن كوڭىلدەرىنە تاعى دا قانداي وي تۇيە الادى؟ ءبىزدىڭ ويىمىزشا ورىنبور ۇكىمەتى قازاقستاننىڭ اقتوبە مەن باتىس قازاقستان وبلىستارىمەن شەكتەسەتىن گۋبەرنيالىق شەتكەرى ءوڭىرى –سول يلەتسكىگە مول قاراجات قۇيىپ جاتقانى تاعىلىم الۋعا تۇراتىنداي ءىس سەكىلدى كورىنەدى. ەجەلگى يلەتسك تۇزدى كولىنىڭ ەمدىك قاسيەتى عىلىمي-مەديتسينادا دالەلدەنگەنىنە 165 جىل بولعان ەكەن. كۇنى كەشەگە دەيىن وسى جەردىڭ اينالاسى جارتىلاي جابايى كۇيىندە بولىپ كەلگەنى قازاقستاندىقتارعا دا قۇپيا ەمەس. ءارى وعان اعايىندارىمىز ەم الۋ ءۇشىن «تۇز ايى» دەپ ەسەپتەلگەگ شىلدە كەزىندە عانا باراتىن.
كۇندەر كەزىندە وسى ىرگەمىزدەگى شەكارالىق ايماق جىل بويى جۇمىس ىستەيتىن رەسەيدىڭ سوچيدان كەيىنگى باستى قالپىنا كەلتىرۋ كۋرورتىنا اينالعانىن بىلدىك. ءتىتى بۇعان دەيىن تالاي رەت بارعان يلەتسك ەمدەۋ ورنىن سلايدتان كورگەن كەزدە ونى تانىماي قالعانداي كۇي كەشتىك. بۇعان قوسا اقتوبمەن ىرگەلەس قۋاندىق كۋرورتى دا وزگەشە تۇرگە ەنىپتى. ءوسۋ, ورلەۋ دەگەن وسى دا. بۇعان قوسارىمىز رەسەيلىك پروۆينتسايالىق بيلىك وكىلدەرى اتالعان شەتكەرى ايماقتى تۋريستىك بەلدەۋگە اينالدىرۋ جونىندە وڭتايلى شەشىم قابىلداپتى. ماسەلەن اقتوبە ايماعىندا سوڭعى كەزدەرى شالعايداعى ىرعىز اۋدانى اۋماعى تۋريستىك باعىتقا سۇرانىپ تۇرعانى جونىندە اڭگىمەلەر قوزعالىپ ءجۇر. وسى باستامانىڭ اياقسىز قالماعانىن قالار ەدىك.
تاعى ءبىر تاعىلىم الار تۇرارلىق تۇس: كۇندەر كەزىندە ايتىلعانداي شەكارالاس وڭىردە ونىڭ برەندى بولۋعا لايىقتى دەرلىكتەي ورىنبوردىڭ ءتۇبىت ورامالىن ونەركاسىپتىك نەگىزدە ءوندىرۋدىڭ كەڭ اۋقىمدى جوبالارى بەلگىلەنىپتى. سونىڭ نەگىزىندە ەجەلگى ءتۇبىت ورامال توقۋ ءىسى ىرگەسىن كەڭەيتىپ ءار ءتۇرلى توقىما بۇيىمدار وندىرەتىن, ءبىر اۋىسىمدا 1200 ادام جۇمىس جاسايتىن كەلىستى كەشەنگە اينالىپتى. وسى دەرەكتى ەستىگەن كەزدە اقتوبەلىك اقساقال كەلدىباي يسماعامبەتوۆ اعامىز بىزگە وي-پىكىرىن بىلايشا جەتكىزىپ ەدى.
-ورىنبورلىقتار اقتوبەدە دە ءتۇبىت ورامالىن ساتاتىن ساۋدا ورنىن اشاتىنىن ايتىپ وتىر. دۇرىس قوي ارينە. بۇل دا قاجەتتى ءىس. دەگەنمەن مۇنىڭ ءوزى از. ءشالىنى شىعارۋ ءۇشىن ەشكىنىڭ ءتۇبىتى كەرەك. بۇل ءۇشىن ەڭ الدىمەن ەشكى كەرەك. ءبىزدىڭ وبلىستا ەشكى وسىرۋشىلەر دە از ەمەس. سوندا ءتۇبىتتى وتكىزۋ ارقىلى ورىنبورلىق وندىرىسكە ءوز ۇلەسىمىزدى قوسۋعا بولاتىن شىعار. ءبىزدىڭ ويىمىزشا كەل-اعانىڭ ۇسىنىسى قۇپتاۋعا تۇراتىنداي پىكىر سەكىلدى.
ەۋرازيا جۇرەگى اتانعان ءوڭىردىڭ اقتوبە وبلىسىنداعى كۇندەرى كەزىندە ق.جۇبانوۆ اتىنداعى اقتوبە وڭىرلىك مەملكەتتىك ۋنيۆەرسيتەتى بازاسىندا ەكى وڭىردەگى مەملەكەتتىك جوعارى وقۋ ورىندارىنىڭ رەكتورلارى باس قوسىپ, ينتەگراتسيالىق الەۋەتتى ءوسىرۋ جونىندەگى ءوز ويلارىن ورتاعا سالدى. سونداي-اق وبلىس ورتالىعىنداعى «باتىس 2» ىقشاماۋدانىندا ورىنبور اللەياسى اشىلدى. سونىمەن بىرگە كۇندەر اياسىندا شەكارالاس وڭىرلەردەگى ءبىلىم بەرۋ سالاسىنىڭ باسشىلارى اراسىندا يننوۆاتسيالىق ءبىلىم بەرۋ ساپاسىن جاقسارتۋ جونىندەگى بىرلەسكەن جوبالارعا قول قويىلدى. ءتىپتى ەكىجاقتى باسقوسۋ كەزىندە بالالاردىڭ بيىلعى جازعى دەمالىسىن بىرلەسىپ ۇيىمداستىرۋ ماسەلەلەرى دە ۇمىت قالعان جوق. بۇل جونىندە قول قويىلعان مەموراندۋم ورىنبوردىڭ «سولنەچنايا ستورونا» لاگەرىندە اقتوبەلىك دارىندى بالالاردىڭ, ءوز كەزەگىندە اقتوبەنىڭ «اسەم» جازعى دەمالىس ورتالىعىندا ورىنبورلىق جەتكىنشەكتەردىڭ جازعى دەمالىسىن ۇيىمداستىرۋدى كوزدەيدى. وسىنداي كەلىسىمدەر ەكى تاراپتاعى ونەركاسىپشىلەر مەن كاسىپكەرلەر اراسىندا دا جاسالدى. ءتۇيىپ ايتقاندا رەسەيدىڭ ورىنبور ولكەسىنىڭ اقتوبە وبلىسىنداعى كۇندەرى كورشىلىك قارىم-قاتىناستار مەن ەكونوميكالىق جانە گۋمانيتارلىق بايلانىستاردىڭ ودان ءارى تەرەڭدەي تۇسۋىنە جول اشىپ بەردى.
تەمىر قۇسايىن,
"ەگەمەن قازاقستان"
