وبلىستىق اۋىل شارۋاشىلىعى باسقارماسىنىڭ مالىمەتىنشە,تىڭايتقىشتاردى سۋبسيديالاۋ ۇدەرىسى اۆتوماتتاندىرىلعان. سۋبسيديانىڭ كىمگە قانشا كولەمدە بەرىلەتىنىن مەملەكەتتىك قىزمەتكەرلەر ەمەس, كومپيۋتەرلىك جۇيە شەشەدى. جاڭا جۇيەدە بۇرىنعىداي شەنەۋنىكتەر مەن شارۋالار اراسىندا بايلانىس بولمايدى, جەمقورلىققا جول بەرىلمەيدى.
ەندى يەلىگىندەگى ەگىس القاپتارىنىڭ ەلەكتروندى كارتاسىن جاساماعان شارۋا قوجالىقتارى تىڭايتقىشتارعا سۋبسيديا الا المايدى. سوندىقتان, جەرگىلىكتى ديقاندار تسيفرلاندىرۋ جۇيەسىنە قوسىلۋعا كىرىستى. قازىر كوكتەمگى ەگىس جۇمىستارى باستالدى. باسقارماسىنىڭ حابارىنشا, بيىلعى كوكتەم كەش كەلۋىنە وراي توپىراق بەتى ءالى جىلي قويماعان. دەگەنمەن, جۇمىس باستالدى. ەگىس القاپتارىنىڭ كولەمى 1 ميلليون 421 مىڭ گەكتار. اۋىل شارۋاشىلىعى قۇرىلىمدارىن سۋبسيديالاۋعا 3,1 ملرد. تەڭگە قارجى قاراستىرىلىپتى.
شارۋا قوجالىقتارىن قولداۋ ءۇشىن كوكتەمگى ەگىس جۇمىستارىنا شاعىن نەسيە تۇرىندە 2 ملرد. تەڭگە قاراجات بولىنگەن. جەڭىلدەتىلگەن باعامەن 16 مىڭ توننا ديزەل وتىنى بەرىلمەك, 126,8 مىڭ توننا تۇقىم دايىنداعانى. ەگىس ناۋقانىنا 5 018 تراكتور دايىن. قۇنى 454 ميلليون تەڭگەگە 23 جاڭا تەحنيكا ساتىپ العان. كوكتەمگى ەگىس ناۋقانىنا قاجەتتى ساپالى تۇقىم دا, ىلعال دا جەتكىلىكتى.
فاريدا بىقاي,
«ەگەمەن قازاقستان»
پاۆلودار وبلىسى
