ەلىمىزدەگى ىرگەلى مەكتەپتەردىڭ كوش باسىندا تۇرعان ءبىلىم شاڭىراعىندا جالپىۇلتتىق اتا-انالار جينالىسى ەركىن فورماتتا ءوتتى. مۇعالىمدەر مەن اتا-انالار اراسىندا اشىق پىكىر الماسۋ الاڭى قالىپتاسىپ, مەكتەپتىڭ پسيحولوگ ماماندارى اتا-انالار ءۇشىن ارنايى ازىرلەگەن كوڭىلدى ترەنينگتىك باعدارلاماسىن ۇسىندى. شاكىرتتەردىڭ جەتىستىكتەرى سارالانىپ, بيىلعى وقۋ جىلىندا اتقارىلعان جۇمىستاردىڭ ەسەبى تىڭدالدى. «رۋحاني جاڭعىرۋ» باعدارلاماسىنىڭ ءمان-ماڭىزىن كورسەتەتىن ارنايى بەينەروليكتەر كورسەتىلىپ, باعدارلامانىڭ نەگىزگى باعىتتارىنا قاتىستى باياندامالار وقىلدى. نازارباەۆ زياتكەرلىك مەكتەبىنىڭ شاكىرتتەرى حالىقارالىق دەڭگەيدەگى وليمپيادالار مەن جاس ونەرتاپقىشتارعا ارنالعان الەمدىك دودالاردا جوعارى ناتيجەدەن كورىنىپ ءجۇر. بۇل وتباسى مەن مەكتەپ اراسىنداعى ۇيلەسىمدى بايلانىستىڭ جەمىسى دەيدى ۇستازدار.
– حالىقارالىق وتباسى كۇنىندە ۇيىمداستىرىلىپ وتىرعان جالپىۇلتتىق اتا-انالار جينالىسىنىڭ اۋقىمى كەڭ. «رۋحاني جاڭعىرۋ» باعدارلاماسىن تاربيە نەگىزىندە ىسكە اسىرۋ, قامقورشىلىق كەڭەستىڭ قىزمەتىمەن تانىستىرۋ, وتباسى قۇندىلىقتارىن ناسيحاتتاۋ جانە وتباسى مەن مەكتەپتىڭ ءوزارا بايلانىسىن نىعايتۋ سىندى جۇمىستار كۇن تارتىبىندە تالقىلاندى. مەكتەپ جۇمىسىندا اتا-انالاردىڭ بەلسەندىلىگى وتە جوعارى, وقۋشىلار تاراپىنان ۇيىمداستىرىلعان ءتۇرلى ءىس-شارالارعا, قايىرىمدىلىق اكتسيالارىنا بەلسەنە اتسالىسادى. بالاسىنىڭ ەشتەڭەگە الاڭداماي, جان-جاقتى جەتىلۋىنە جول اشىپ وتىرعان اتا-انالار قاۋىمىنىڭ قولداۋى بىزگە ۇلكەن كومەك, – دەيدى مەكتەپ ديرەكتورىنىڭ تاربيە ءىسى جونىندەگى ورىنباسارى ايگۇل يسمايلوۆا.
جينالىس بارىسىندا مەكتەپتىڭ قامقورشىلىق كەڭەسىنىڭ جۇمىسى تۋرالى دا كەڭىنەن ايتىلدى. دامىعان مەملەكەتتەردىڭ تاجىريبەسىنە ۇڭىلسەك, قامقورشىلىق كەڭەسى كوپتەگەن ەلدەردە ۇلكەن ماڭىزعا يە. ءار ءبىلىم مەكەمەسىندەگى قامقورشىلىق كەڭەس مۇشەلەرىنە جۇكتەلگەن نەگىزگى مىندەت ءبىلىم بەرۋ ۇيىمىنا بيۋدجەتتىك ۇسىنىس جاساپ ءبىلىم ساپاسىنا باعا بەرۋمەن عانا شەكتەلمەي, وقۋشىلاردىڭ ساباقتان تىس ۋاقىتتارداعى جان-جاقتى دامىپ جەتىلۋىنە, ءتۇرلى ۇيىرمەلەرگە قاتىسىپ ۋاقىتىن ءتيىمدى پايدالانۋىنا قولداۋ جاساۋ. جاس زياتكەرلەر مەكتەبىندە بۇل باعىتتاعى جۇمىستار دا جۇيەلى جولعا قويىلعان.
«مەكتەبىمىزدە وقۋشىلاردىڭ تانىم كوكجيەگىن جەتىلدىرۋگە باعىتتالعان 35 ۇيىرمە ساباعى جۇمىس ىستەيدى. ونىڭ ىشىندە 12 پاندىك ۇيىرمە, 8 سپورتتىق, 13 شىعارماشىلىق جانە ەكى بىردەي تەحنيكالىق ۇيىرمە بار. ناتيجە ساپاسى وتە جوعارى. قانداي جوبالاردا بولماسىن اتا-انالاردىڭ ۇسىنىس-تىلەكتەرى مىندەتتى تۇردە نازارعا الىنادى», دەيدى پەداگوگ-ۇيىمداستىرۋشى زاۋرە توقتامىسوۆا.
ارمان وكتيابر,
«ەگەمەن قازاقستان»
الماتى
