«قۇرىلىسشىلاردىڭ ەرەن ەڭبەگىنىڭ ارقاسىندا وبلىسىمىزدا جانە قازاقستاننىڭ وزگە ايماقتارىندا ءىرى ينۆەستيتسيالىق جوبالار جۇزەگە اسىرىلىپ, زاماناۋي نىساندار سالىنۋدا. وزدەرىڭىز كورىپ وتىرعانداي, قىزىلوردادا سىرداريانىڭ سول جاعالاۋىندا 15 شاعىن اۋدان, الەۋمەتتىك جانە بيزنەس-نىسانداردى قامتيتىن جاڭا قالا بوي كوتەرۋدە. وسى بايقاۋدى ءبىز استانانىڭ 20 جىلدىعى مەن قىزىلوردانىڭ 200 جىلدىعىنا وراي, سونداي-اق, جۇمىسشى ماماندىقتاردى ناسيحاتتاۋ ماقساتىندا ۇيىمداستىردىق. كاسىبي شەبەرلىك بايقاۋىنا ەلىمىزدىڭ بارلىق ايماقتارىنان قۇرىلىسشىلار قاتىسۋدا», - دەدى قۋانىشبەك ىسقاقوۆ.
ۇيمداستىرۋشىلاردىڭ ايتۋىنشا, بايقاۋ بارىسىندا بارلىق تاپسىرمالاردى دۇرىس ورىنداۋمەن قاتار قاۋىپسىزدىك شارالارىن ساقتاۋ جانە شىعارماشىلىق كوزقاراس ەسەپكە الىندى.
بايقاۋ قورىتىندىسىمەن «ۇزدىك قالاۋشى» جانە «ۇزدىك سىلاقشى» نوميناتسيالارىندا جەڭىمپازدار انىقتالدى.
«ۇزدىك قالاۋشى» نوميناتسياسىندا ءبىرىنشى ورىندى ايجارىق نيازوۆ (اتىراۋ وبل.), ەكىنشى ورىندى زەردەبەك يسقاليەۆ (باتىس قازاقستان وبل.), ءۇشىنشى ورىندى باۋىرجان چۋنەتوۆ (ماڭعىستاۋ وبل.) يەلەندى. «ۇزدىك سىلاقشى» نوميناتسياسىندا ءبىرىنشى ورىندى نينا دەركسەن (قاراعاندى وبل.) جەڭىپ السا, ەكىنشى ورىن ەركەماي تەمىرعاليەۆاعا (پاۆلودار وبل.), ال ءۇشىنشى ورىن عاني ەلعوجينگە (جامبىل وبل.) بۇيىردى. جەڭىمپازدارعا ديپلوم مەن باعالى سىيلىقتار – كوميۋتەر, تەلەديدار جانە نوۋتبۋكتار – تابىستالدى.
اتاپ وتەيىك, سايىس سىرداريانىڭ سول جاعالاۋىنداعى قۇرىلىس نىساندارىندا ۇيىمداستىرىلدى.
بۇگىندە قىزىلوردا قالاسىنىڭ سول جاعالاۋى قارقىندى قۇرىلىس الاڭىنا اينالدى. جاڭا قالادا 1925 جىلى ۇلتقا «قازاق» اتاۋىن قايتا بەرۋ تۋرالى تاريحي شەشىم قابىلدانعان قازاق ورتالىق اتقارۋ كوميتەتىنىڭ بۇرىنعى عيماراتى ارحيۆتەگى سىزبالار بويىنشا قايتا سالىنعان رۋحاني جاڭعىرۋ ورتالىعى سالىندى. قازىرگى تاڭدا مۇندا 18 كوپقاباتتى تۇرعىن ءۇي سالىنىپ, قالا كۇنىنە وراي پايدالانۋعا بەرىلمەك. سونداي-اق, مۇندا 320 ورىندىق بالاباقشا, «بولاشاق» ۋنيۆەرسيتەتىنىڭ ستۋدەنتتەر قالاشىعى, جاستار رەسۋرستىق ورتالىعى, ەمحانا, نەكە قيۋ سارايى مەن وزگە دە الەۋمەتتىك نىسانداردىڭ قۇرىلىسى سالىنۋدا. بيىل وسى اۋماقتا حالقىمىزدىڭ وي-ساناسى, ۇلتتىق سالت-ءداستۇرى, تۇرمىس-تىرشىلىگىن ەسكەرە وتىرا, شىعىس ستيلىندەگى تۇرعىن ۇيلەر سالىنباق.
