ۇزدىك تاۋارلار كورمەسى

كەشە استانادا «كورمە» ورتالىعىندا «قازاقستاننىڭ ۇزدىك تاۋارى-2011» رەسپۋبليكالىق كورمە-كونكۋرسىنىڭ اشىلۋ سالتاناتى ءوتتى. وعان پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ قاتىسىپ, قۇتتىقتاۋ ءسوز سويلەدى. 2001 جىلى بەلگىلەنگەن «قازاقستاننىڭ ۇزدىك تاۋارى» كورمە-كونكۋرسى ءوز ءونىمىنىڭ ساپاسىن دامىتۋدا ۇلكەن ناتيجەلەرگە قول جەتكىزىپ, ساپا مەنەدجمەنتى جۇيەلەرىن ويداعىداي ەنگىزگەن وتاندىق تاۋار وندىرۋشىلەردى قولداۋ ماقساتىن­دا قۇرىلعان. ەل تاۋەلسىزدىگىنىڭ 20 جىلدىعىن تويلاۋ جىلىندا ۇزدىك تاۋارلار كورمەسى رەسپۋبليكا ونەركاسىبى جەتىستىكتەرىن پاش ەتۋدە. اتال­عان كورمە-كونكۋرسقا بايقاۋدىڭ وڭىرلىك كەزەڭ­دە­رىنەن ءوتىپ جەڭىمپاز اتانعان 150- دەن استام ەڭ مىقتى دەگەن قازاقستاندىق تاۋار وندىرۋشىلەر قاتىسىپ وتىر. ولاردىڭ قاتارىندا ۇلتتىق ساز اسپاپتارىن جاساۋدا ۇزدىك ناتيجە كورسەتىپ, حالىقتىڭ ىستىق ىقىلاسىنا بولەنىپ جۇرگەن الماتىلىق «شەرتەر» جشس دا بار. سەرىكتەستىك ديرەكتورى باقىتجان ءدىلمانوۆ تاپسىرىس بوي­ىنشا دا جانە بولشەك ساۋداعا دا ءوز شەبەرلەرىمەن دومبىرادان ساز سىرنايعا دەيىن اسپاپتار جاساپ, ونى ەلىمىزدىڭ بىرنەشە ايماقتارىنا شى­عارىپ جاتقاندىقتارىن ايتادى. سونىمەن بىرگە ول الىس-جاقىن شەتەلدەردە تۇراتىن قانداستار تىلەگىن قاناعاتتاندىراتىندىقتارىن دا نازاردان تىس قالدىرمادى. ال شىعىس قازاقستان وبلىسىنان كورمەگە ارنايى ات ارىلتىپ كەلگەن ەت, شۇجىق ونىمدەرىمەن اتى شىققان «شۆابسكيە كولباسكي» سەرىكتەستىگىنىڭ ونىمدەرى قاراعان جان­دى تامسانتپاي قويمايتىنداي. كاسىپ­ور­ىن­نىڭ سەمەيلىك وكىلدىگىنىڭ ديرەكتورى گۇلسارا كوپ­­باە­ۆا ونىمدەرىمەن الماتى, تالدىقورعان, سەمەي, وسكەمەن وڭىرلەرىن قامتاماسىز ەتىپ وتىر­عان­دىقتارىن ايتا كەلە, بايقاۋ-كورمەدەن كۇتەر ءۇمىت­تەرىنىڭ مول ەكەندىكتەرىن جەتكىزدى. كونكۋرس كوميسسياسى «وندىرىستىك ماقساتتاعى ۇزدىك تاۋارلار», «حالىق تۇتىناتىن ۇزدىك تاۋارلار» جانە «ۇزدىك ازىق-ت ۇلىك تاۋارلارى» سىندى ءۇش نوميناتسيادا جەڭىمپازداردى انىقتاماق. باي­قاۋ جەڭىمپازدارى «التىن ساپا» مەن «پارىز» سىي­لىقتارىنىڭ لاۋرەاتتارىمەن بىرگە 9 جەل­توق­سان­دا وتەتىن يندۋستريالاندىرۋ كۇنى ماراپاتتالماق. ءابدىراحمان قىدىربەك.