اتالعان ءىس-شاراعا وتاندىق جانە شەتەلدىك قورعانىس-ونەركاسىپ كەشەنى, عارىشتىق سالا مەن اقپاراتتىق قاۋىپسىزدىك سالاسىنىڭ كاسىپورىندارى, جەتەكشى كونسترۋكتورلىق بيۋرو مەن عىلىمي-زەرتتەۋ ينستيتۋتتارى قاتىسادى دەپ كۇتىلۋدە. ۇيىمداستىرۋشىلاردىڭ ايتۋلارىنا قاراعاندا, بيىلعى كورمەنىڭ باستى ەرەكشەلىگى – «KADEX-2018» كورمەسىنىڭ قۇرامداس بولىگى رەتىندە «قازاقستانداعى عارىش كۇندەرى» حالىقارالىق فورۋمىنىڭ وتكىزىلۋى. بۇل باستاما استانا قالاسىنىڭ 20 جىلدىعىنا وراي جوسپارعا ەنگىزىلگەن.
كورمەدە العاش رەت وتاندىق جانە الەمدىك كوسموناۆتيكانىڭ جەتىستىكتەرىنە ارنالعان جەكە پاۆيلون ۇسىنىلاتىن بولادى. سونداياق الەمدىك جەتەكشى وندىرۋشىلەردىڭ قارۋ-جاراعى جانە اسكەري تەحنيكا, اسكەري جانە ازاماتتىق ماقساتتاعى ونىمدەرى كورسەتىلەدى.
جالپى, «KADEX» كورمەسى شارتاراپقا كەڭىنەن تانىلعان الاڭعا اينالعاندىعىن كەلەسى دەرەكتەر دە راستاي تۇسەدى. قازىردىڭ وزىندە «KADEX-2018» كورمەسىنە رەسەي, بەلارۋس, قىرعىزستان, ارمەنيا, يران, ءباا, تۇركيا, يوردانيا جانە باسقا مەملەكەتتەردىڭ قورعانىس مينيسترلىكتەرىنىڭ باستاماسىمەن 21 رەسمي دەلەگاتسيا كەلەتىندىكتەرىن راستاپ وتىر. بۇعان قوسا, الەمنىڭ اقش, برازيليا, گەرمانيا, يزرايل, ءۇندىستان, قىتاي, رەسەي ءتارىزدى 26 ەلىنەن 294 كاسىپورىن ءوز ونىمدەرىن اكەلەدى. سونىمەن قاتار شەتەلدىك 96 كاسىپورىننىڭ باسشىلارى ءبىزدىڭ ەلورداعا كەلۋگە نيەتتى.
دەمەك, كورمەگە كەلۋشىلەر قارۋلانۋدىڭ وزىق ۇلگىلەرىنەن باستاپ, اقپاراتتىق قاۋىپسىزدىكتى قامتاماسىز ەتۋگە دەيىنگى زاماناۋي جەتىستىكتەردى كورە الادى.
البەتتە كەز كەلگەن مەملەكەتتىڭ الەم الدىنداعى ابىروي-بەدەلى قارۋلى كۇشتەرىنىڭ جاي-كۇيىمەن انىقتالادى. بۇل رەتتە قازاقستان قارۋلى كۇشتەرىنىڭ تۇبەگەيلى قالىپتاسىپ, وزگەلەرگە كورسەتەرى دە كوبەيدى. ونىڭ ىشىندە سەرجانتتاردان باستاپ گەنەرالدارعا دەيىن اسكەردىڭ بارلىق سالاسى بويىنشا وتاندىق وقۋ ورىندارىندا ءبىلىم الۋدا. قارۋ-جاراقتىڭ جەكەلەگەن تۇرلەرى دە ەلىمىزدە جاسالىپ, ءوندىرىستىڭ تاعى ءبىر قىرى وركەندەي ءتۇستى. ونىمەن قوسا, اسكەري تەحنيكا ونەركاسىبىندە رەسەي, يزرايل جانە ەۋروپا ەلدەرىمەن ءتيىمدى بايلانىستار ورناعان.
قورىتا ايتقاندا, شەتەلدىكتەر «KADEX-2018» كورمەسىن كورۋگە دە, ءوز ونىمدەرىن كورسەتۋگە دە كەلەدى. ال جالپى, بۇقارا كورمەنىڭ قىزىقتارىن 25-26 مامىر كۇندەرى تاماشالاي الادى.
سەرىك ابدىبەك,
«ەگەمەن قازاقستان»
