قىس مەرزىمىندە جابدىقتاردىڭ جۇمىسىندا اقاۋ بولمادى, تەمپەراتۋرالىق كەستە ساقتالدى, جوسپاردان تىس توقتاپ قالۋلار ورىن العان جوق. جىلۋ بەرۋ اياقتالماي جاتىپ-اق, سسكوب جىلۋ ەلەكتر ورتالىعىنىڭ قىزمەتكەرلەرى جابدىقتاردى جوندەۋگە كىرىسىپ كەتكەن. بيىل جەو-نى اۋقىمدى جوندەۋ جۇمىستارى كۇتىپ تۇر. بۇل ماقساتقا ءتورت ميلليارد تەڭگەدەن استام قارجى باعىتتالماق.
«العاشقى جوندەۋ جۇمىستارىن ءبىز 20-ناۋرىزدا باستادىق . جوندەۋلەر №4 بۋ قازاندىعىندا, №5 سۋ جىلىتقىش قازاندىقتا, №1 بۋ تۋربيناسىندا ءجۇرىپ جاتىر. بۇل جابدىقتاردىڭ بارلىعى قالانى جىلۋمەن قامتاماسىز ەتۋگە قاتىسادى» دەيدى «سسكوب» اق جەو ديرەكتورى ولەگ ابىلقايىروۆ.
جاز ايلارىندا جىلۋ بەرۋشىلەردى سۋ جىلىتقىش قازاندىعى بويىنشا اۋقىمدى جۇمىستار كۇتۋدە. №1 جانە №2 قازاندىقتاردى كونسەرۆاتسيادان شىعارۋ, № 5 قازاندىقتى اعىمداعى جوندەۋدەن وتكىزۋ جوسپارلانعان. وسىلايشا, جاڭا جىلۋ بەرۋ ماۋسىمى باستالعانشا بارلىق بەس سۋ جىلىتقىش قازاندىق قايتا قالپىنا كەلتىرىلەدى. مۇنىڭ بارلىعى جابدىق جۇمىسىنىڭ تيىمدىلىگىن, قالا مەن گورنياتسك كەنتىنە جىلۋ مەن ىستىق سۋ بەرۋدىڭ ساپاسى مەن سەنىمدىلىگىن ارتتىرۋ ءۇشىن جاسالىنىپ وتىر. نەگىزگى جابدىقتاردان بولەك جەو ۇجىمى قۇبىرلاردى دا نازاردان تىس قالدىرمايدى.جاڭا جىلۋ بەرۋ ماۋسىمىنا دايىندىققا الماتى مەن قوستانايدىڭ مەردىگەر كومپانيالارىنىڭ ماماندارى دا كومەك بەرۋدە.اتالعان جۇمىستاردىڭ بارلىعى قالا تۇرعىندارىنا ەش جايسىزدىق تۋدىرمايدى.
كەلەسى جىلۋ بەرۋ ماۋسىمىنا دايىندىقپەن ءبىر مەزگىلدە جەو-دا ۇزاق مەرزىمدى ءىس-شارالار دا جالعاسا بەرەدى. پاۆلودار ماشينا جاساۋ زاۋىتىمەن كومىردى جيناۋ ءۇشىن پايدالانىلاتىن ارتۋ كرانىن جاساۋ جونىندە كەلىسىم شارت جاسالعان. قىسقى كەزەڭدە ستانتسيانىڭ ۇزدىكسىز قىزمەتىن قامتاماسىز ەتەتىن وسى كران ارقىلى ورتا ەسەپپەن 2,5 مىڭ توننا كومىر وتەدى. №3 تۋربينا ءتسيليندرىن ازىرلەۋ بويىنشا دا جۇمىستار اتقارىلىپ جاتىر. ول رۋدنىي مەن ونەركاسىپتىك اۋماقتى جىلىتۋعا ارنالعان. جاڭا بۇيىمدى قاراعاندى تۋربومەحانيكالىق زاۋىتى دايىنداپ جاتىر.
«جەو-نى جىلۋ بەرۋ ماۋسىمىنا دايىنداۋ ماسەلەسىنە جىل سايىن ەرەكشە كوڭىل بولەمىز. سوڭعى جىلدارى ورتالىقتا كوپ جاڭارۋلار ورىن الدى جانە مۇنىڭ بارلىعى قالانى جىلۋمەن جانە ىستىق سۋمەن قامتاماسىز ەتۋدى جاقسارتا ءتۇستى. ءبىز ءوز تۇتىنۋشىلارىمىزعا تەك ساپالى قىزمەت كورسەتۋگە تىرىسامىز. سوندىقتان رۋدنىي ءۇشىن الەۋمەتتىك ماڭىزى زور نىساندى جاڭعىرتۋعا قوماقتى قاراجات بولۋدەمىز» دەدى «سسكوب» اق پرەزيدەنتى بەرەكە مۇحامەتقاليەۆ.
ءنازيرا جارىمبەت,
«ەگەمەن قازاقستان»
رۋدنىي
