اتىراۋدا «Bike Ride Atyrau – 2018» قايىرىمدىلىق ۆەلوجارىسىنىڭ قورتىندىسى شىقتى. شارا الەكساندر ۆينوكۋروۆتىڭ قوعامدىق قورى, اتىراۋ سپورتىن دامىتۋ مەن قولداۋ قوعامدىق قورى, اتىراۋ وبلىستىق اكىمدىگىنىڭ قولداۋىمەن ۇيىمداستىرىلدى.
«وسى شارادان كەيىن ءبىزدىڭ وڭىردەگى ۆەلوسپورت بۇرىنعىدان دا بەلسەندى داميدى دەگەن ويدامىز», دەيدى اتىراۋ وبلىسى اكىمىنىڭ ورىنباسارى ساعىندىق لۇقپانوۆ.
اتىراۋدىڭ ورتالىق كوشەلەرىمەن 1500 ۆەلوسيپەدشى ءجۇرىپ ءوتتى. جارىسقا ەكى وليمپيادا چەمپيونى – الەكساندر ۆينوكۋروۆ پەن يليا يلين قاتىستى.
«ونلاين تىركەۋدەن 900-دەن استام قاتىسۋشى وتكەن ەدى, جارىس باستالار الدىندا دراما تەاتر الدىنداعى سورەدە 600 ادام تاعى دا تىركەلدى», دەيدى ۇيىمداستىرۋشىلار.
ۆەلوجارىستى قولداۋعا استانالىق «Astana Pro Team» كومانداسى ارنايى كەلدى.
«قاتىسۋشىلار وسىنشا كوپ بولادى دەپ ويلامادىم. قايىرىمدىلىق اۋكتسيونى كەشكە وتەدى, سول جەردە 4 كوللەكتسيالىق ۆەلوسيپەد پەن ءبىزدىڭ كوماندانىڭ اكسەسسۋارلارى ويناتىلادى», دەيدى الەكساندر ۆينوكۋروۆ.
ۆەلوجارىس قورتىندىسى بويىنشا جەڭىمپازدار بەس اتالىمدا انىقتالدى: ەڭ جاسى ۇلكەن قاتىسۋشى 66 جاستاعى عيمران اقبوتين, ەڭ جاس قاتىسۋشى 4 جاستاعى ايا سالامات دەپ تانىلدى. التى ادامنان قۇرالعان بيساليەۆتەر وتباسى "سپورتشىلار وتباسى" اتالىمىن جەڭىپ الدى. ەڭ كرەاتيۆتى ۆەلوسيپەدتىڭ يەسى باقىتجان شايحيەۆ بولسا, مارات ناۋرىزعاليەۆكە ەڭ كرەاتيۆتى كيىمى ءۇشىن جۇلدە بەرىلدى.
بارلىق جۇلدەگەرلەر سىيلىققا ۆەلوسيپەد الدى.
جەڭىمپازداردى ماراپاتتاۋ شاراسىنان كەيىن سۇلتان بەيبارىس الاڭىندا قازاقستاندىق ەسترادا جۇلدىزدارىنىڭ قاتىسۋىمەن مەرەكەلىك كونتسەرت ءوتتى. باعدارلاما ارنايى وسى شاراعا وراي جازىلعان انۇرانمەن قورتىندىلاندى.
