الەم بىرىنشىلىگىنىڭ سوڭعى تۋر ويىندارى الدىندا پولشا قۇراماسىنان باسقا بارلىق كوماندالاردىڭ جوعارى توپقا شىعۋىنا مۇمكىندىكتەرى بار ەدى. ال قازاقستاندىق حوككەيشىلەر پولشانى جەڭگەننەن سوڭ توپ ديۆيزيونعا ءوتۋ-وتپەۋى ايدىن يەلەرى ۆەنگريا- ۇلىبريتانيا جانە سلوۆەنيا-يتاليا قۇرامالارىنىڭ ويىندارىنا بايلانىستى بولدى. ويتكەنى جارىس قوجايىندارى بريتانيالىقتاردى جەڭەتىن بولسا, ەكىنشى ويىننىڭ ناتيجەسىنە قاراماي قازاقستان مەن ۆەنگريا قۇرامالارىنىڭ ۇپايى بىردەي بولىپ, وتانداستارىمىز العاشقى ويىندا ۆەنگريانى جەڭگەنى ەسكەرىلىپ, توپتا ءبىرىنشى ورىنمەن الەم چەمپيوناتىنىڭ جوعارى توبىنا جولداما الۋعا مۇمكىندىگى بار بولاتىن. ال ەگەر يتاليا قۇراماسى سلوۆەنيانى جەڭەتىن بولسا, قازاقستانمەن ۇپايى تەڭەسىپ, جەكە كەزدەسۋ بويىنشا وتانداستارىمىزدى جەڭگەن يتاليالىقتار ءبىرىنشى ورىنمەن, قازاقستاندىقتار ەكىنشى ورىنمەن كەلەسى توپقا وتەتىن ەدى. ءتىپتى سلوۆەنيا مەن يتاليا نەگىزگى ۋاقىتتى تەڭ اياقتاعاندا, ءبىز ءۇشىن ەڭ ۇتىمدى ناتيجە سول بولاتىن. وكىنىشكە قاراي ۆەنگريالىق حوككەيشىلەر دە ۇلىبريتانيامەن نەگىزى ۋاقىتتا 2:2 ەسەبىمەن تەڭ ويناپ, ويىن سوڭىنداعى بۋلليت سەرياسىندا جەڭىلىپ قالدى. يتاليا قۇراماسى بولسا سلوۆەنيالىقتاردان 4:3 ەسەبىمەن باسىم ءتۇستى. ۇلىبريتانيا مەن يتاليا قۇرامالارى توپ ديۆيزيونعا جولداما الدى.
چەمپيونات قورىتىندىسى بويىنشا ءۇش جەڭىس, ەكى جەڭىلىسى بار قازاقستان قۇراماسىنىڭ حوككەيشىلەرى توعىز ۇپايمەن ءۇشىنشى ورىندا قالىپ قويىپ, كەلەسى جىلى دا ءى ديۆيزيوننىڭ «ا» توبىندا وينايتىن بولدى. ءبىرىنشى ورىندى 11 ۇپايى بار ۇلىبريتانيا قۇراماسى ەنشىلەدى. ال توپتا ەڭ سوڭعى ورىن العان پولشا قۇراماسى «ۆ» توبىنىڭ ءى ديۆيزيونىنا سىرعىدى.
ءالي بيتورە,
«ەگەمەن قازاقستان»
