وتىرىستا العاشقى بولىپ ءسوز العان قازاقستان رەسپۋبليكاسى ىشكى ىستەر ءمينيسترىنىڭ ورىنباسارى ەرلان تۇرعىمباەۆ: «قازاقستان – ەۋرازيانىڭ ءدال ورتاسىندا ورنالاسقان ىرگەلى مەملەكەت. سوندىقتان دا جىل سايىن شەتەلدىڭ 3 ميلليون ازاماتى وسى اۋماقتان ترانزيتپەن وتەدى. تاعى 2,5 ميلليون ادام قىزمەت بابى, جەكە شارۋاسى نەمەسە ءبىلىم الۋ ءۇشىن ءبىزدىڭ رەسپۋبليكاعا كەلۋدە. سولاردىڭ 90 پايىزى تمد ەلدەرىنىڭ ازاماتتارى. اسىرەسە ەڭبەك ميگرانتتارى كوپ. جاسىراتىنى جوق, ەلدەگى ساياسي جانە ەكونوميكالىق تۇراقتىلىقتىڭ قالىپتاسۋى, ينۆەستيتسيالىق احۋالدىڭ جاقسارۋى, تۋريستىك ءيميدجدىڭ ارتۋى جانە اسا ماڭىزدى حالىقارالىق شارالاردىڭ ۇيىمداستىرىلۋىنىڭ ارقاسىندا قازاقستانعا كەلۋگە قۇلشىنىس تانىتىپ وتىرعانداردىڭ سانى جىلدان جىلعا كوبەيىپ كەلەدى. ماسەلەن, بىلتىرعى جىلدىڭ وزىندە عانا XXVIII قىسقى دۇنيەجۇزىلىك ۋنيۆەرسيادا مەن حالىقارالىق ەكسپو كورمەسىن تاماشالاۋ ءۇشىن عانا 3 ميلليوننان اسا تۋريست ءبىزدىڭ ەلگە ات باسىن بۇردى. سونىمەن قاتار ەلباسى نۇرسۇلتان نازارباەۆتىڭ تىكەلەي ۇيىتقى بولۋىمەن استانادا حالىقارالىق قارجى ورتالىعى قۇرىلدى. ونىڭ نەگىزگى مىندەتى – قارجىلىق قىزمەت سالاسىندا ينۆەستيتسيالاۋ ءۇشىن تارتىمدى ورتا قۇرۋ ارقىلى ەل ەكونوميكاسىنا تىكەلەي شەتەل ينۆەستيتسيالارىن تارتۋعا جاردەمدەسۋ, قازاقستان رەسپۋبليكاسىنىڭ باعالى قاعازدار نارىعىن دامىتۋ, ونىڭ حالىقارالىق كاپيتال نارىقتارىمەن ىقپالداسۋىن قامتاماسىز ەتۋ بولىپ تابىلادى. وسى ۇيىمنىڭ قۇرىلۋى ينۆەستيتسيالىق ينفراقۇرىلىمدى دامىتۋعا, يننوۆاتسيالىق تەحنولوگيالار مەن الەمدىك دەڭگەيدەگى قارجى قىزمەتتەرىن ۇسىنۋ ءۇشىن قوسىمشا ينفراقۇرىلىمدى ىنتالاندىرۋعا جاڭا سەرپىن بەردى», دەدى.
قۇزىرلى ورگاندار ۇسىنعان مالىمەتكە سەنسەك, قازىرگى كەزدە قازاقستانعا 30 تاۋلىككە دەيىنگى ۋاقىتقا كەلگەن 61 مەملەكەتتىڭ ازاماتتارىنا ۆيزانىڭ ەش قاجەتى جوق. ترانزيتتىك باعىتپەن جۇرگەن قىتاي مەن ءۇندىستاننىڭ ازاماتتارى 72 ساعات بويى استانا مەن الماتى قالالارىن ۆيزاسىز ەمىن-ەركىن ارالاي الادى. ەكونوميكاسى دامىعان, ساياسي تۇراقتا 56 مەملەكەتتىڭ ازاماتتارى شەكارادان اسقاندا ميگراتسيالىق قىزمەتكە ارنايى كەلىپ تىركەلمەيدى ەكەن. ونىڭ بارلىعىن ونلاين رەجىمدە جۇزەگە اسىرۋعا بولادى.
قازاقستان ىشكى ىستەر مينيسترلىگى ميگراتسيالىق قىزمەت كوميتەتى توراعاسىنىڭ ورىنباسارى ارمان سادانوۆ زاڭسىز ميگراتسيامەن كۇرەستىڭ قالاي ءجۇرىپ جاتقانى جايىندا اڭگىمەلەپ, ناقتى دەرەكتەردى العا تارتتى.
تاعى ءبىر جاعىمدى جاڭالىق, ۇستىمىزدەگى جىلدىڭ 1 شىلدەسىنەن باستاپ ەلەكتروندى ۆيزالار بەرىلە باستايدى. ياعني ۆيزا الۋ نەمەسە تىركەلۋ قاجەتتىگى تۋىنداعان جاعدايدا ءار ازامات كونسۋلدىققا بارماي-اق, ۇيىندەگى ينتەرنەت ارقىلى وسى ماسەلەنى وڭدى شەشە الادى.
عالىم سۇلەيمەن,
«ەگەمەن قازاقستان»
الماتى
