كەزدەسۋ بارىسىندا ەكىجاقتى ىنتىماقتاستىقتى ودان ءارى دامىتۋ ماسەلەلەرى تالقىلاندى.
پرەمەر-ءمينيستردىڭ ءبىرىنشى ورىنباسارى 2018 جىلعى ناۋرىزدا استاناعا رەسمي ساپارى بارىسىندا ەكى مەملەكەت باسشىلارى نۇرسۇلتان نازارباەۆ پەن ەمومالي راحمون قول جەتكىزگەن كەلىسىمدەر ەكىجاقتى قارىم-قاتىناستاردى ساپالى ءارى جاڭا دەڭگەيگە كوتەرەتىنىن اتاپ ءوتتى.
«قازاقستان مەن تاجىكستان ۇكىمەتتەرىنىڭ الدىندا مەملەكەت باسشىلارى ساۋدا دەڭگەيىن 2 ميلليارد دوللارعا جەتكىزۋ مىندەتىن قويدى», - دەگەن اسقار مامين اتالمىش تاپسىرمانى ورىنداۋ ءۇشىن قازاقستاندىق تاراپ قاجەتتى شارالاردى قابىلداۋعا دايىن ەكەنىن ءبىلدىردى.
تاجىكستان پرەزيدەنتى ەمومالي راحمون وسى جىلدىڭ 15 ناۋرىزىندا وتكەن ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەزدەسۋىنىڭ ناتيجەلەرىن جوعارى باعالادى. سونىمەن بىرگە, ول وسى فورۋمنىڭ وڭىرلىك ىنتىماقتاستىقتى ودان ءارى ناسيحاتتاۋداعى ماڭىزدىلىعىن اتاپ ءوتتى. تاجىكستان ورتا ازيا ايماعىنداعى قازاقستاننىڭ ەكىنشى ءىرى ساۋدا ارىپتەسى بولىپ تابىلادى.
ناقتىراق ايتقاندا, ورتالىق ازيا ەلدەرىمەن قازاقستاننىڭ تاۋار اينالىمىنىڭ 20 پايىزى وسى ەلگە تيەسىلى. ساپار بارىسىندا اسقار مامين تر پرەمەر-ءمينيسترى كوحير راسۋلزودامەن جانە پرەمەر-ءمينيستردىڭ ءبىرىنشى ورىنباسارى سايد داۆلاتايمەن كەزدەستى. كەزدەسۋ بارىسىندا ەكىجاقتى ىنتىماقتاستىقتىڭ ماڭىزدى ماسەلەلەرى مەن ورتالىق ازيا مەملەكەت باسشىلارىنىڭ كونسۋلتاتيۆتىك كەزدەسۋ قورىتىندىسى بويىنشا حاتتاماسىن جۇزەگە اسىرۋ بويىنشا ماڭىزدى شارۋالار تالقىلاندى.
ەكونوميكانىڭ ءتۇرلى سالالارىندا ەكى ەلدىڭ اراسىنداعى ىنتىماقتاستىقتىڭ ۇدەمەلى سيپاتىن تىلگە تيەك ەتە كەلە اسقار مامين فارماتسەۆتيكا, قۇرىلىس, ازىق-ت ۇلىك ونەركاسىبى, تەمىرجول سالاسى, مەتاللۋرگيا, كولىك قۇراۋ سالاسى سەكىلدى 57 پەرسپەكتيۆتى تاۋار پوزيتسيالارى بويىنشا تاجىكستانعا تاسىمالدىڭ نومەنكلاتۋراسىن كەڭەيتۋ تۋرالى ايتتى.
اسقار مامين ساۋدا-ساتتىق اينالىمىن ارتتىرۋ جونىندەگى جۇمىس توبىنىڭ قىزمەتىن بەلسەندى ەتە ءتۇسىپ, وسى سالادا جول كارتاسىن ازىرلەۋدى جانە ونى ۇكىمەتارالىق كوميسسيانىڭ كەزەكتى وتىرىسىندا ماقۇلداۋدى ۇسىندى. كەزدەسۋ كەزىندە ايماقارالىق قاتىناستاردى دامىتۋ, قازاقستان رەسپۋبليكاسى مەن تاجىكستان رەسپۋبليكاسىنىڭ بيزنەس-قۇرىلىمدارى اراسىنداعى تىكەلەي بايلانىستار, سونداي-اق ەكى ەلدىڭ ەكسپورتتىق الەۋەتىن جۇزەگە اسىرۋ ماسەلەلەرى تالقىلاندى.
قازاقستان رەسپۋبليكاسىنىڭ ءبىرىنشى ۆيتسە-پرەمەرى اسقار ءماميننىڭ تاجىكستانعا جاساعان جۇمىس ساپارى اياسىندا Hyundai County ماركاسىنىڭ قازاقستاندىق 300 اۆتوبۋسىن, 500 جۇك ۆاگوندى, 4 مانەۆرلىك جانە ماگيسترالدىك لوكوموتيۆتى جانە 5200 توننا ر-65 رەلستەرىن, سونداي-اق اۋقىمى 30 مىڭ توننالىق روگۋسن گەس-ءىنىڭ قۇرىلىسى ءۇشىن «ارسەلور ميتتال تەمىرتاۋ» اق وندىرەتىن ارماتۋرالاردى جەتكىزۋ بويىنشا كوممەرتسيالىق قۇجاتتارعا قول قويىلدى.
