ق.توقاەۆ وتكەن جىلى جۇزەگە اسقان كونستيتۋتسيالىق رەفورمانىڭ ناتيجەسىندە پرەزيدەنت وكىلەتتىگىنىڭ ءبىر بولىگى بيلىكتىڭ اتقارۋشى جانە زاڭ شىعارۋ تارماعىنا بەرىلگەنى تۋرالى ومبۋدسمەندەردى حاباردار ەتتى. سەناتقا ادام قۇقىقتارى جونىندەگى ۋاكىل لاۋازىمىنا سايلاۋ جانە ونى قىزمەتىنەن بوساتۋ قۇقىعىنىڭ بەرىلۋى ماڭىزدى جاڭالىقتاردىڭ ءبىرى بولدى. پارلامەنت جوعارعى پالاتاسىنىڭ توراعاسى اتاپ وتكەندەي, بۇل ۇلتتىق قۇقىق قورعاۋ تەتىكتەرىن ينستيتۋتتىق تۇرعىدا قولداۋ ءۇشىن زور مۇمكىندىكتەر بەرەدى.
سەنات توراعاسى قۇقىق قورعاۋ سالاسىنداعى ايماقتىق ىقپالداستىقتى قولداۋ مەن بىرلەسكەن كۇش-جىگەردى ۇيلەستىرۋ جايىندا ايتتى. «ادام قۇقىقتارىنىڭ ءرولى وتە جوعارى دەپ سانايمىن, سوندىقتان ادام قۇقىقتارى مەن ەركىندىگى جانە زاڭ ۇستەمدىگى ماسەلەلەرىندە ءبىزدىڭ ەلدەرىمىزگە ءوزارا تىعىز ءىس-قيمىل كەرەك», - دەدى ق.توقاەۆ.
سەنات توراعاسىنىڭ پىكىرىنشە, ادام قۇقىقتارى جونىندەگى بۇگىن باستالعان فورۋم ادام قۇقىقتارىنىڭ جاعدايىنا مونيتورينگ جۇرگىزۋ سالاسىندا ءبىلىم جانە تاجىريبە الماسۋ, ۇلتتىق پرەۆەنتيۆتىك تەتىكتەر قىزمەتىن ودان ءارى جەتىلدىرۋ جانە ونى زاڭنامالىق تۇرعىدا رەتتەۋ جولدارىن تالقىلاۋدىڭ مۇمكىندىكتەرىن بەرەدى.
رەسەي فەدەراتسياسىنىڭ ادام قۇقىقتارى جونىندەگى ۋاكىلى تاتيانا موسكالكوۆا, وزبەكستان رەسپۋبليكاسى ولي ءماجىلىسى ادام قۇقىقتارى جونىندەگى ۋاكىلى ۇلىقبەك مۇحامماديەۆ, قىرعىز رەسپۋبليكاسىنىڭ اكىيكاتچىسى (ومبۋدسمەنى) قۇباتبەك وتورباەۆ, تۇرىكمەنستان ومبۋدسمەنى يازدۋرسۋن گۋرباننازاروۆا ءوز ەلدەرىندەگى قۇقىق قورعاۋ ماسەلەلەرىن رەتتەۋدىڭ ەرەكشەلىكتەرى, ومبۋدسمەن ينستيتۋتتارىنىڭ زاڭ شىعارۋ ورگاندارمەن ءوزارا ءىس-قيمىلى تۋرالى اڭگىمەلەدى. كەزدەسۋگە قازاقستان رەسپۋبليكاسىنىڭ ادام قۇقىقتارى جونىندەگى ۋاكىلى اسقار شاكىروۆ قاتىستى.
