تۇڭعىش رەت ۇيىمداستىرىلعان شاراعا قازاقستان رەسپۋبليكاسىنىڭ ءبىلىم جانە عىلىم ۆيتسە-ءمينيسترى بيبىگۇل اسىلوۆا, وتاندىق جوعارى وقۋ ورىندارىنىڭ رەكتورلارى مەن مەملەكەت جانە قوعام قايراتكەرلەرى, جاس عالىمدار قاتىستى.
قازاقستان جاس عالىم-پەداگوگتارىنىڭ ءبىرىنشى رەسپۋبليكالىق سلەتىنىڭ اشىلۋ سالتاناتىندا ءبىلىم جانە عىلىم ۆيتسە-ءمينيسترى بيبىگۇل اسىلوۆا مينيستر ەرلان ساعاديەۆتىڭ قۇتتىقتاۋ حاتىن وقىپ بەردى.
– قىمباتتى ەلىمىزدىڭ جاس عالىم-پەداگوگتارى, ءبىرىنشى رەسپۋبليكالىق سلەتتىڭ قوناقتارى! سىزدەردى قازاقستان رەسپۋبليكاسى ءبىلىم جانە عىلىم مينيسترلىگىنىڭ اتىنان جانە ءوز اتىمنان قازاقستان جاس عالىم-پەداگوگتارىنىڭ ءبىرىنشى رەسپۋبليكالىق سلەتىنىڭ اشىلۋ سالتاناتىمەن شىن جۇرەكتەن قۇتتىقتايمىن. بۇگىن عىلىم مەن ءبىلىم سالاسىنداعى تاريحي كۇن. ويتكەنى ەلىمىزدىڭ جاس عالىم-پەداگوگتارىنىڭ تىڭ يدەيالارى مەن جاڭاشا وي-پىكىرلەرىن ءبولىسۋى ءۇشىن العاش رەت ءوزارا ديالوگ الاڭى قۇرىلۋدا. تۇڭعىش رەت ەلىمىزدىڭ بەلدى جاس عالىم-پەداگوگتارى بىرىگۋدە. سوندىقتان بۇل ماڭىزدى دا اۋقىمدى كەزدەسۋ بولماق. قازىرگى تاڭدا ءبىلىم مەن عىلىمنىڭ قارقىندى وزگەرۋ زامانىندا ەلىمىزدەگى جاستاردىڭ عىلىمي الەۋەتىن ارتتىرۋ – باسەكەگە قابىلەتتى ەلدەر قاتارىنا اپارار باستى باسپالداق. ولاي بولسا بۇگىنگى سلەتتىڭ باستى ماقساتى دا – مەملەكەت پەن قوعام دامۋىنا بەلسەندى قىزمەت ەتەتىن, جاڭاشا تۇرعىدان ويلايتىن جاس پەداگوگ-عالىمداردى بىرىكتىرۋ بولىپ تابىلادى, – دەلىنگەن قۇتتىقتاۋ حاتتا.
باسقوسۋ بارىسىندا قازاقستان جاس پەداگوگ-عالىمدارىنىڭ قاۋىمداستىعى قۇرىلدى. قاۋىمداستىقتى قۇرۋ 2018 جىلعى 10 قاڭتارىنداعى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى حالىققا ارناعان جولداۋى نەگىزىندە جاسالدى. قاۋىمداستىقتىڭ قۇرىلتايشىسى – قازاق مەملەكەتتىك قىزدار پەداگوگيكالىق ۋنيۆەرسيتەتى.
– قاۋىمداستىقتى قۇرۋداعى باستى ماقسات – مەملەكەت پەن قوعام دامۋىنا بەلسەندى قىزمەت ەتەتىن, جاڭاشا تۇرعىدا ويلاي الاتىن جاس پەداگوگ-عالىمداردى بىرىكتىرۋ, ولاردىڭ ديالوگ الاڭىن قۇرۋ. سونىمەن قاتار, ءبىلىم مەن عىلىم سالاسىنداعى وزەكتى ماسەلەلەر بويىنشا جاس پەداگوگتاردىڭ جۇيەلەنگەن پىكىرلەرىن مۇددەلى تاراپتارعا جەتكىزۋ, وقىتۋ مەن تاربيەلەۋدىڭ ءتيىمدى تەحنولوگيالارىمەن الماسۋ, عىلىمي-زەرتتەۋلەر جۇرگىزۋ جانە شەتەلدىك جوعارى وقۋ ورىندارى, كوللەدج, مەكتەپتەردىڭ جاس پەداگوگ-عالىمدار حالىقارالىق قاۋىمداستىقتار, وداقتار, كەڭەستەرمەن بايلانىس ورناتۋ دا قاراستىرىلعان, – دەيدى قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا.
قاۋىمداستىققا مۇشە رەتىندە 35 جاسقا دەيىنگى جوعارى ءبىلىم بەرۋ جۇيەسىندە قىزمەت ەتەتىن, پەداگوگيكا سالاسىندا عىلىمي زەرتتەۋ تاجىريبەسى بار وقىتۋشىلار تىركەلە الادى.
سونىمەن قاتار, شارا بارىسىندا لاتىن ءالىپبيىن ۇيرەتۋ ورتالىعىندا شەبەرلىك كلاسى, «اقتۇمار» مۇراجايى: تاريح بەتتەرىنەن» تاقىرىبىنداعى كورمە جانە «كوركەم گالەرەيا: وقىتۋداعى شابىت» اتتى كەسكىندەمە جانە گوبەلەن بويىنشا شەبەرلىك كلاسىن وتكىزىلدى. سونداي-اق, كەشەندى حيميا-بيولوگيا عىلىمي زەرتتەۋ ورتالىعى, «جاڭارتىلعان ەنەرگيا كوزدەرى» زەرتحاناسى مەن پسيحولوگيا-پەداگوگيكالىق تۇزەتۋ كابينەتىندە قىزدار ۋنيۆەرسيتەتىنىڭ عىلىمي زەرتتەۋ جوبالارى كوپشىلىك نازارىنا ۇسىنىلدى. وقۋ ورنىنىڭ جاس عالىمدارىنىڭ فيزيكا, IT, گەوگرافيا, فيلولوگيا, حورەوگرافيا سالالارى بويىنشا شەبەرلىك كلاستارى دا ۇيىمداستىرىلدى.
