اقش زاڭ شىعارۋشىلارىنا قاراتا ايتقان سوزىندە ماكرون اقش پەن فرانتسيا اراسىنداعى دوستىق قارىم-قاتىناس تۋرالى ايتىپ, كوپتەگەن شايقاستاردا ەكى ەلدىڭ قويان-قولتىق ارەكەت ەتكەنىن ەسكە الدى. سونىمەن قاتار اقش پەن فرانتسيانىڭ ادام قۇقىعىن قورعاۋ, بوستاندىق, گەندەرلىك تەڭدىك سەكىلدى ماسەلەلەرگە كوزقاراسى بىردەي ەكەنىن ايتتى.
يران يادرولىق باعدارلاماسى تۋرالى ايتا كەلە ماكرون يراننىڭ يادرولىق قارۋعا يەلىك ەتۋىنە ەشقاشان جول بەرمەۋ كەرەكتىگىن قاداپ ايتتى. اقش پرەزيدەنتىنىڭ يران يادرولىق كەلىسىمىنە تەرىس كوزقاراستا ەكەنىن بىلە تۇرا ماكرون ء"بىز تۇراقتىلىقتى قامتاماسىز ەتۋىمىز كەرەك", دەدى.
كەلىسىمدى ساقتاپ قالۋعا نيەتتى ماكرون ءوز كەزىندە فرانتسيانىڭ قۇجاتقا قول قويعانىن ەسكە الدى.
بۇعىن دەيىن دونالد ترامپ اق ۇيدە فرانتسيا پرەزيدەنتىن قابىلداپ, ەكى ەل يران يادرولىق كەلىسىمنە قاتىستى ورتاق شەشىمگە كەلۋ كەرەكتىگىن ايتقان بولاتىن. ترامپ يران يادرولىق باعدارلاماسىن توقتاتۋ ارقىلى سانكتسيالاردى ازايتۋ كەلىسىمىنە قاتىستى سىني پىكىر ءبىلدىرىپ, بۇل كەلىسىمنىڭ تەگەراننىڭ زىمىران باعدارلاماسىنا قاتىستى ەمەس ەكەنىن, بۇل ارەكەت وڭىردەگى ماسەلەنى شەشپەيتىنىن ايتتى. ال ماكرون ترامپتى 2015 جىلى اقش, ۇلىبريتانيا, گەرمانيا, قىتاي, رەسەي, فرانتسيا قول قويعان كەلىسىمنەن شىقپاۋعا كوندىرمەك.
سونىمەن قاتار ەممانۋەل ماكرون كونگرەستە سويلەگەن سوزىندە اقش-تىڭ پاريج كەلىسىمىنە قايتا ورالاتىنىنا سەنىمدىلىك ءبىلدىردى. ء"بىز مويىنداۋ كەرەك ءبىر فاكت بار - بىزدە پلانەتا بىرەۋ عانا. بىزگە بىرگە جۇمىس ىستەپ, پلانەتامىزدى ۇلى ەتۋ ءۇشىن كوپ كۇش جۇمساۋ كەرەك. جاڭا جۇمىس ورىندارىن قۇرساق تا, جەردى ساقتاپ قالۋىمىز كەرەك. مەن اقش-تىڭ پاريج كەلىسىمىنە قايتا قوسىلاتىنىنا سەنىمدىمىن", دەدى ول.
بۇل سوزدەردى اقش كونگرەسىندەگىلەر زور قوشەمەتپەن قابىلدادى. اسىرەسە ترامپتىڭ پوزيتسياسىن قولدامايتىن دەموكراتتار ەرەكشە قۋانعانىن جەتكىزدى.
