كەزدەسۋ بارىسىندا بىرقاتار ماسەلەلەر, سونىڭ ىشىندە حالىقارالىق قاۋىپسىزدىككە تونەتىن قاۋىپ-قاتەر, حالىقارالىق تەرروريزمگە قارسى ءىس-قيمىل, اقپاراتتىق قاۋىپسىزدىك, ەسىرتكىنىڭ زاڭسىز اينالىمىمەن كۇرەس جۇرگىزۋ جانە تاعى باسقا ماسەلەلەر تالقىلاندى. رەسەيدە توعىزىنشى رەت ءوتىپ جاتقان مۇنداي كەزدەسۋلەرگە كوپتەگەن مەملەكەت ساراپشىلارى نازار اۋدارادى. سوچيدەگى كەزدەسۋگە 100-دەن استام مەملەكەتتىڭ قاۋىپسىزدىك كەڭەستەرى, قۇقىق قورعاۋ جانە ارناۋلى ورگاندارى, سىرتقى ساياسات ۆەدومستۆولارى اپپاراتتارىنىڭ وكىلدەرى, سونداي-اق بۇۇ قۇرىلىمدارىمەن بىرگە ءتۇرلى حالىقارالىق ۇيىمداردىڭ قىزمەتكەرلەرى قاتىستى.
ن.ەرمەكباەۆ «حالىقارالىق تەرروريستىك ۇيىمداردىڭ ستراتەگياسى مەن تاكتيكاسىنىڭ دامۋى» تاقىرىبىنداعى بايانداماسىندا ەكسترەميزم مەن تەرروريزمگە قارسى ءىس-قيمىلعا بايلانىستى نورماتيۆتىك قۇقىقتىق بازانى قالىپتاستىرۋ جونىندەگى قازاقستاننىڭ ءىس-قيمىلىنا, ەلىمىزدەگى تەرروريزمگە قارسى كۇشتەردىڭ ۇيىمداستىرىلۋ ماسەلەسىنە, تمد, شىۇ جانە ۇقشۇ اياسىنداعى سەرىكتەستەرمەن بىرلەسە اتقارىلىپ جاتقان الدىن الۋ جۇمىستارىنا توقتالدى. الەمدەگى بارلىق مەملەكەتتەردىڭ تەرروريزمگە قارسى كۇرەس جۇرگىزۋشى كۇشتەرىن جۇمىلدىرۋدىڭ ماڭىزدىلىعى اتاپ ءوتىلدى. وسىعان بايلانىستى, قازاقستان قاۋىپسىزدىك كەڭەسىنىڭ حاتشىسى توعىزىنشى حالىقارالىق كەزدەسۋدىڭ قاتىسۋشىلارىنا نۇرسۇلتان نازارباەۆتىڭ تەرروريزمگە قارسى كۇرەستىڭ جاھاندىق جەلىسىن (كواليتسيا) قۇرۋ, سونداي-اق تەرروريستىك ۇيىمداردىڭ بىرىڭعاي تىزبەسىن ازىرلەۋ تۋرالى باستامالارىن بەلسەندى تۇردە قولداۋدى ۇسىندى.
سونىمەن قاتار ءىس-شارا اياسىندا ەلىمىزدىڭ دەلەگاتسياسى ءتۇرلى مەملەكەتتەردىڭ وكىلدەرىمەن بىرقاتار ەكىجاقتى كەزدەسۋ وتكىزدى. كەزدەسۋلەر بارىسىندا وڭىرلىك قاۋىپسىزدىكتى قامتاماسىز ەتۋ سالاسىنداعى ءوزارا ىقپالداستىق ماسەلەلەرى تالقىلاندى. بۇل رەتتە, ورتالىق ازيا مەملەكەتتەرىنەن كەلگەن ارىپتەستەر قاۋىپسىزدىك كەڭەستەرى اپپاراتتارى دەڭگەيىندە وڭىرلىك كوپجاقتى كونسۋلتاتسيالاردىڭ تۇراقتى تەتىگىن قۇرۋ قاجەتتىگىنە نازار اۋداردى.
