كەزەكتى كونفەرەنتسياعا قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆتەن باستاپ, باس حاتشى ازامات ايتقوجين, ۇلتتىق قۇراما جاتتىقتىرۋشىسى ستانيمير ستويلوۆ جانە ەل فۋتبولىنىڭ بارلىق اتقامىنەرلەرى مەن ايماقتىق فۋتبولدىڭ وكىلدەرى قاتىستى.
القالى جيىننىڭ شىمىلدىعىن ادىلبەك جاقسىبەكوۆ اشىپ, قازاقتىڭ داڭقتى فۋتبولشىسى بولعان تيمۋر سەگىزباەۆتىڭ رۋحىنا قۇرمەت كورسەتىپ, ءبىر مينۋت ەسكە الۋمەن باستادى.
– تيمۋر سانجار ۇلىنىڭ ەسىمى ەل فۋتبولىنىڭ تاريحىندا التىن ارىپتەرمەن ماڭگىلىككە جازىلىپ قالادى. الداعى ۋاقىتتاردا ونى ەسكە الۋعا باعىتتالعان ءارتۇرلى جوبالاردى قولعا الامىز – دەدى ول.
سونداي-اق ءا.جاقسىبەكوۆ جيىنعا قاتىسقان ارىپتەستەرى مەن بۇكىل قازاق فۋتبولىنىڭ جانكۇيەرلەرىن قازاقستان فۋتبولى كۇنىمەن قۇتتىقتادى. وسىدان تۋرا 16 جىل بۇرىن قازاقستان ماڭىزدى قادام جاساپ, ەۋروپا فۋتبول قاۋىمداستىقتارىنىڭ وداعىنا (ۋەفا) قابىلدانعان-دى. وسى ۋاقىت ارالىعىندا قازاقستان فۋتبولى ەۋروپا تۋرنيرلەرىندە ايتارلىقتاي تابىستارعا قول جەتكىزدى.
قازاقستان فۋتبول فەدەراتسياسىنىڭ باس حاتشىسى ازامات ايتقوجيننىڭ پايىمداۋىنشا, «العا, فۋتبول! العا, Qazaqstan!» باعدارلاماسى ەل فۋتبولىن جاڭا دەڭگەيگە كوتەرىپ, ويىنشىلاردىڭ دەڭگەيىن جاقسارتۋعا كومەكتەسە-ءدى. سونداي-اق اتالعان باعدارلامانى دايىنداۋعا وتاندىق فۋتبول ماماندارىمەن قاتار, بىرنەشە شەتەلدىك تانىمال فۋتبول ساراپشىلارى اتسالىسقانىن اتاپ ءوتتى.
«بۇل باعدارلاما قازاننىڭ ء«رۋبينى» مەن الماتىنىڭ «قايراتىنىڭ» قۇرامىندا 10 جىلدان اسا دوپ تەپكەن پاۆەل چەرەپانوۆ باسقاراتىن جۇمىس توبى جانە قۇربان بەرديەۆتىڭ بەلسەندى قاتىسۋىمەن دايىندالدى. سونىمەن قاتار ءبىز ەۋروپا ەلدەرىنىڭ, ونىڭ ىشىندە گەرمانيا, يتاليا, يسپانيا جانە باسقا دا فەدەراتسيالاردىڭ ادىستەمەلەرى مەن باعدارلامالارىمەن تانىسىپ شىقتىق», دەدى ا.ايتقوجين.
سونىمەن قاتار ايتقوجين ەل فۋتبولىن دامىتۋ ءۇشىن الدىمەن جاسوسپىرىمدەر مەن بالالار فۋتبولىن دامىتۋ كەرەكتىگىن جانە وڭىرلەردەگى فۋتبول ورتالىقتارىن جەتىلدىرۋ قاجەتتىگىن ايتتى. «فەدەراتسيا اۋىلدىق جەرلەردە فۋتبولمەن شۇعىلداناتىن بۇكىل قازاقستاندىقتارعا مونيتورينگ جاسادى. قازىردىڭ وزىندە 200 مىڭنان اسا بالا تىركەلگەن. سونداي-اق 2022 جىلعا دەيىن بۇكىل مەكتەپتەردە ارنايى فۋتبول ساباقتارى وتەتىن بولادى. قازىردىڭ وزىندە 203 مەكتەپتە فۋتبول ساباقتارى ءوتىپ جاتىر», دەدى ا.ايتقوجين.
كونفەرەنتسيا اياسىندا شاراعا قاتىسۋشىلار «العا, فۋتبول! العا, Qazaqstan!» باعدارلاماسىنا ءوز ۇسىنىستارى مەن پىكىرلەرىن ايتىپ, فەدەراتسيانىڭ اتقارۋشى كوميتەتىنە جاڭا مۇشەلەر سايلادى.
ءالي بيتورە,
«ەگەمەن قازاقستان»
