گۇلشارا ابدىقالىقوۆا قۇتتىقتاۋ سوزىندە ەلباسى نۇرسۇلتان نازارباەۆتىڭ «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسى اياسىنداعى العاشقى 18 وقۋلىقتىڭ تانىستىرىلىمىندا ايتقان: «جاڭا وقۋلىقتار – ەكسكليۋزيۆتى گۋمانيتارلىق كىتاپحانا. ول بارلىق ادام ءۇشىن ءۇش فورماتتا قولجەتىمدى بولادى: ادەتتەگى قاعاز كىتاپتار تۇرىندە, ەلەكتروندى ونلاين-نۇسقادا جانە ۇزدىك لەكتورلاردىڭ ۆيدەوتەكا فورماتىنداعى اشىق دارىستەرى تۇرىندە», – دەگەن ءسوزىن اتاپ ءوتتى.
مەملەكەتتىك حاتشى بۇل ەلەۋلى مادەني ءىس-شارا قازاقستان ەلورداسىنىڭ 20 جىلدىعىمەن تۇسپا-تۇس ءوتىپ جاتقانىنا توقتالدى. بۇگىندە استانا مەگاپوليسى – ەلدىڭ ۇلتتىق سيمۆولى عانا ەمەس, سونداي-اق, ەۋرازيانىڭ مويىندالعان ورتالىقتارىنىڭ ءبىرى.
– جاھاندانۋ جانە تسيفرلىق تەحنولوگيالار عاسىرىندا كىتاپ بۇرىنعىشا جاڭا ءبىلىمنىڭ قاينار كوزى بولىپ قالا بەرەدى. ول بۇكىل بولمىستى تانىپ-ءبىلۋدىڭ عالامات قۇرالى بولىپ تابىلادى, – دەدى مەمحاتشى.
قازاقستاننىڭ تاۋەلسىزدىگى جىلدارىندا جالپى تارالىمى 400 ميلليون بولاتىن 81 مىڭعا جۋىق كىتاپ شىعارىلدى. تەك 2010 جىلدان بەرى عانا كىتاپ باسۋعا 10 ميلليارد تەڭگەدەن استام قاراجات بولىنگەن. بۇگىندە 380 كومپانيا باسپاگەرلىك قىزمەت كورسەتۋدە.
بيىل كورمەگە الەمنىڭ 18 مەملەكەتىنەن 155 كومپانيا مەن ۇيىم وكىلدەرى قاتىسۋدا. ولاردىڭ اراسىندا رەسەيلىك «ناۋكا», پولشادان كەلگەن «Kurtiak and Ley Artistic Publishing House» جانە باسقا دا بەلگىلى باسپالار بار. سونداي-اق, 120-عا جۋىق مادەني-ىسكەرلىك ءىس-شارالار وتكىزىلەدى.
مەملەكەتتىك حاتشى گ.ابدىقالىقوۆا «Eurasian Book Fair – 2018» كورمە-جارمەڭكەسىنە قاتىسۋ بارىسىندا كورمەگە قويىلعان كىتاپتاردىڭ ەكسپوزيتسياسىمەن تانىسىپ, بارلىق قاتىسۋشىلاردىڭ شىعارماشىلىق جانە ىسكەرلىك بايلانىستى تەرەڭدەتە تۇسۋىنە, تاڭداعان سالادا زور تابىسقا جەتۋلەرىنە تىلەكتەستىك ءبىلدىردى.
