«حالىقارالىق تۇركى اكادەمياسى بيىلعى جىلدى شىڭعىس ايتماتوۆ جىلى دەپ جاريالاعان ەدى. بۇگىنگى فورۋمدى قازاق-قىرعىز زيالىلارىنىڭ بەيرەسمي فورۋمى دەپ ايتۋعا بولادى. سەبەبى, بۇگىنگى جيىنعا قىرعىزستاننان بەدەلدى مەملەكەت قايراتكەرلەرى, بەدەلدى اقىن جازۋشىلار كەلىپ وتىر. سوندىقتان بۇگىنگى جيىندا ايتماتوۆتىڭ شىعارمالارىمەن بىرگە, الاتاۋدىڭ ەكى بەتىن بولىسە جايلاعان باۋىرلاس حالىقتارعا قاتىستى پىكىرلەر ايتىلادى», - دەپ اتاپ ءوتتى حالىقارالىق تۇركى اكادەمياسىنىڭ پرەيزدەنتى دارحان قىدىرالى فورۋمنىڭ اشىلۋىندا.
قر پرەزيدەنت اكىمشىلىگى ىشكى ساياسات ءبولىمىنىڭ مەڭگەرۋشىسى ايدا بالاەۆا الاتاۋدى بىرگە جايلاعان قوس ەلدىڭ دوستىعىن نىعايتۋ جولىنداعى ەڭبەكتەرى ءۇشىن قىرعىز بەن قازاق قايراتكەرلەرىنە ريزاشىلىعىن ءبىلدىردى. «ايتماتوۆ شىعارمالارىمەن تۇتاس بۋىن تاربيەلەندى. ونىڭ ناعىز ومىردەن الىنعان كەيىپكەرلەرى مەن وقيعالارى ءاربىر وقىرمانعا ەتەنە جاقىن. قالامگەر تۋىندىلارىنىڭ وزەكتىلىگى قازىرگى زاماندا تىپتەن ارتا تۇسەدى. ادامنىڭ جان دۇنيەسىنىڭ تازالىعى, ويى مەن ءىسىنىڭ ۇندەستىگى, تابيعاتپەن ۇيلەسىمدى بولۋى - قازىرگى ۋاقىتتا بۇكىل ادامزاتتىڭ الدىنداعى پروبلەمالار. تەرەڭ فيلوسوفيالىق ماعىناسى بار ايتماتوۆ تۋىندىلارىنىڭ تۇپكى يدەياسى رۋحاني جاڭعىرۋ باعدارلاماسىمەن ۇندەسىپ جاتىر. وسىنداي ۇلى قالامگەردى حالىقارالىق دەڭگەيدە ۇلىقتاۋ - تۇتاس تۇركى جۇرتىنىڭ ەلدىگى مەن بىرلىگىنە لايىق ءىس», - دەدى ايدا بالاەۆا حالىقارالىق فورۋم بارىسىندا.
