قۇرامىندا تاريحشى, ولكەتانۋشى, ونەر زەرتتەۋشىلەرى, مۋزەي قىزمەتكەرلەرى, دومبىراشىلار جانە ارداگەر قالامگەرلەر بار ەكسپەديتسيا مۇشەلەرى 23 ءساۋىر كۇنى تاڭعى ساعات 4-تە ورال قالاسىنداعى قۇرمانعازى مەن دينا ەسكەرتكىشى الدىنان اتتانىپ, قاراتوبەگە كەتتى. ەكسپەديتسيانى باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ باستاپ بارادى. توپتىڭ العاش ات باسىن تىرەيتىن نۇكتەسى – قاراتوبە اۋدانى اققوزى اۋىلدىق وكرۋگىندەگى اقت ۇلىم مەكەنىندە ورنالاسقان كۇيشى ۇزاق مىرزاباي ۇلىنىڭ كەسەنەسى. ۇزاق كۇيشى – قۇرمانعازىنى جانىنا ەرتىپ ءجۇرىپ باۋلىعان, باتاسىن بەرگەن ۇستازى.
قاراتوبە اۋىلىندا «قوس ىشەكتى قۇدىرەت» تاقىرىبىنداعى دوڭگەلەك ۇستەلگە قاتىسقان ەكسپەديتسيا مۇشەلەرى بۇدان كەيىن اقجايىق اۋدانىنىڭ تايپاق ءوڭىرىن كەسىپ ءوتىپ, جاڭاقالا توپىراعىنا قوناعا جەتەدى. ساپار بارىسىندا جاڭاقالا توپىراعىندا ماڭگى تىنىس تاپقان مامەن, قالي جانتىلەۋوۆ, تۇياقبەردى ءشامىلوۆ سىندى كۇيشىلەردىڭ كەسەنەلەرىنە سوعىپ دۇعا باعىشتاعان توپ قۇرمانعازىنىڭ وسكەن اۋىلى كوكتەرەك ەلدىمەكەنىنە بارادى. ول جەردە جەرگىلىكتى حالىقپەن تاعىلىمدى شارا جوسپارلانعان.
– ءبىز كوكتەرەك اۋىلىنىڭ ماڭىنداعى نارسويعان سايىندا كوشەت وتىرعىزامىز. بۇرىن وسى جەردە تەرەك وسكەن, اۋىل اتاۋى دا سودان شىققان. ءبىز ەككەن كوشەتتەر بولاشاقتا «قۇرمانعازى توعايى» اتالىپ, نۋ ورمانعا اينالسا دەگەن ءۇمىتىمىز بار. ودان ءارى قۇرمانعازى بابامىزدىڭ تۋعان جەرى جيدەلى قۇمىنا تابان تيگىزەمىز. ۇلى كۇيشىنىڭ تۋعان جەرىنەن الىنعان توپىراق – التىنجارعا, رەسەي فەدەراتسياسى استراحان وبلىسى كراسنويار اۋدانىنداعى كۇيشى كەسەنەسىنە جەتكىزىلەدى. بىزبەن بىرگە جۇرەتىن تەلەوپەراتور وسى ساپاردان اسەرلى بەينەفيلم جاسايدى, – دەيدى وسى ساپاردى ۇيىمداستىرۋشى باتىس قازاقستان وبلىستىق تاريحي-ولكەتانۋ مۋزەيىنىڭ ديرەكتورى مەربولات ەرساەۆ.
توپ قۇرامىندا جۇرگىزۋشىلەردى قوسقاندا 18 ادام, 3 ماشينا بار. ساپار كەزىندە حالىقپەن جۇزدەسۋ شارالارىندا ولكەتانۋشى, ارداگەر-جۋرناليست تيحون الىپقالي مەن اقىن داريعا مۇشتانوۆا ءسوز باستاپ, دومبىراشى ەدىگە نابيەۆ كۇيشى شىعارمالارىن ورىنداماق. «ورال سازى» ءانسامبلىنىڭ جەتەكشىسى, دينا نۇرپەيىسوۆا اتىنداعى ساز مەكتەبىنىڭ مۇعالىمى, ونەرتانۋشى اسقار كەنجەعاليەۆ قۇرمانعازى شىعارماشىلىعىنان سىر شەرتەدى. مۋزەي قىزمەتكەرلەرى نۇرجان تولەپوۆ پەن رىستى كاجۋشەۆانىڭ دا وتكەن مەن بۇگىندى بايلانىستىرىپ ايتار تاعىلىمدى اڭگىمەسى مول. ەكسپەديتسيا مۇشەلەرى ساپار بارىسىندا داۋلەتكەرەي شىعاي ۇلى, سەيتەك ورازالى ۇلى سەكىلدى كۇيشىلەردىڭ دە زيراتىنا سوعىپ, قازاق كۇي ونەرىنىڭ ەسىمى ۇمىتىلماس ارىستارىنا تاعزىم ەتپەك.
كۇيشى كەسەنەسى باسىنداعى نەگىزگى شارا ءساۋىردىڭ 28-ءى كۇنى وتپەك. يۋنەسكو دەڭگەيىندە اتالىپ وتەتىن ۇلى كۇيشىنىڭ مەرەيتويىنا ارنالعان حالىقارالىق شارا التىنجار اۋىلىنداعى قۇرمانعازى مۋزەي-كەشەنى ەكسپوزيتسياسىمەن تانىسۋمەن قورىتىندىلانادى. ەكسپەديتسيا ورال قالاسىنا 29 ءساۋىر كۇنى ورالادى دەپ كۇتىلۋدە.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
