ەلباسى, «نۇر وتان» پارتياسىنىڭ توراعاسى نۇرسۇلتان نازارباەۆتىڭ تاپسىرماسى بويىنشا بۇگىندە پارتيا قىزمەتىن جاڭعىرتۋ جۇمىستارى قارقىندى جۇرگىزىلۋدە. وسى باعىتتا بىرقاتار ناقتى ستراتەگيالىق جوبالار قولعا الىنىپ, ولاردى جۇزەگە اسىرۋدىڭ ءتيىمدى تەتىكتەرى دە قاراستىرىلعان. اتالعان جوبالاردىڭ ءمانى مەن ماڭىزى تۋرالى ايتقان ماۋلەن اشىمباەۆ ولاردىڭ ەل دامۋىنا تيگىزەر وڭ اسەرىن دە اتاپ ءوتتى.
«پارتيا قولعا العان جاڭا جوبالاردىڭ قاتارىندا تسيفرلاندىرۋدى جۇزەگە اسىرۋ, شاعىن جانە ورتا بيزنەستى قولداۋ جانە «رۋحاني جاڭعىرۋ» باعدارلاماسىنا ۇلەس قوسۋعا باعىتتالعان تىڭ باستامالار بار. بۇل جوبالار الدىمىزدا تۇرعان ەڭ باستى ماقسات – ەڭ دامىعان 30 ەلدىڭ قاتارىنا قوسىلۋعا جانە قازاقستاندىقتاردىڭ الەمدىك باسەكەگە قابىلەتتىلىكتەرىن ارتتىرۋعا ءوز سەپتىگىن تيگىزەدى», – دەدى «نۇر وتان» پارتياسى توراعاسىنىڭ ءبىرىنشى ورىنباسارى.
م.اشىمباەۆتىڭ ايتۋىنشا, پارتيالىق جاڭعىرۋ اياسىندا الداعى ۋاقىتتا ەلىمىزدە بالالارعا ارنالعان 1000 IT-سىنىپ اشىلىپ, وندا جىلىنا 150 مىڭ مەكتەپ وقۋشىسى باعدارلامالاۋ جانە روبوت-تەحنيكانىڭ نەگىزدەرى جايىندا تەرەڭدەتىلگەن ءبىلىم الماق. سونداي-اق پارتيانىڭ باستاماسىمەن جۇمىس بەرۋشى ءىت-كومپانيالار مەن ءىرى جوعارى وقۋ ورىندارىنىڭ بازاسىندا 20 ءىت-ورتالىق اشىلادى. وندا جىلىنا 35 مىڭ قازاقستاندىق ءىت-يندۋستريانىڭ قىر-سىرىن ۇيرەنەتىن بولادى. وسىلايشا «نۇر وتان» پارتياسى «اتامەكەن» ۇلتتىق كاسىپكەرلەر پالاتاسىمەن بىرلەسىپ قازاقستاندىقتاردىڭ تسيفرلى ساۋاتتىلىعىن ارتتىرىپ قانا قويماي, ولاردىڭ الەمدىك ءىرى جوبالارعا قاتىساتىن باسەكەگە قابىلەتتى مامان بولىپ قالىپتاسۋىنا جاعداي جاساماق.
شاعىن جانە ورتا بيزنەستى قولداۋ ماقساتىندا «نۇر وتان» پارتياسى «اتامەكەنمەن» بىرلەسىپ كاسىپكەرلەرگە ارنالعان بىرىڭعاي گەواقپاراتتىق ونلاين قىزمەت ۇسىناتىن پورتال قۇرۋدى جوسپارلاپ وتىر. ونىڭ باستى ماقساتى – كاسىپكەرلىك سالاداعى مەملەكەتتىك قىزمەتتەردى ەلەكتروندى فورماتقا كوشىرۋ, دامىعان ەلدەردىڭ ەڭ ۇزدىك ۇلگىلەرىن ەنگىزۋ جانە بيزنەستەگى شىعىنداردى ازايتۋ. پارتيا تاراپىنان وڭىرلەردە مەملەكەت-جەكەمەنشىك ارىپتەستىگىن ودان ءارى نىعايتۋعا باعىتتالعان جۇمىستار دا قارقىندى جۇرگىزىلمەك. سول ارقىلى مەكتەپ اسحانالارىنىڭ جۇمىسى جاندانىپ, سپورت الاڭدارى قايتا قالپىنا كەلتىرىلەدى.
«رۋحاني جاڭعىرۋ» باعدارلاماسى بويىنشا دا پارتيا بىرقاتار باسىم باعىتتاردى قولعا العان. بۇل رەتتە اۋىلدىق جەرلەردە اعىلشىن ءتىلىن ۇيرەنۋگە قولايلى ورتا قالىپتاستىرۋعا جانە ەلىمىزدە ەرىكتىلەر قوزعالىسىن دامىتۋعا باسىمدىق بەرىلىپ وتىر. سوعان بايلانىستى اعىلشىن ءتىلىن ەركىن مەڭگەرگەن 500 قازاقستاندىق جانە شەتەلدىك جاس ەرىكتى اۋىلدىق مەكتەپتەرگە جىبەرىلىپ, ولار ارنايى قۇرىلعان كلۋبتاردا جەرگىلىكتى جاستارعا ءتىل ۇيرەتەتىن بولادى. وسى باعىتتا پارتيانىڭ باستاماسىمەن وتاندىق كىتاپحانالاردى زاماناۋي ءبىلىم ورتالىقتارى رەتىندە قايتا قۇرۋ ءىسى دە قولعا الىنباق. سونىڭ ناتيجەسىندە بىرىڭعاي ونلاين كىتاپحانا جۇيەسى قالىپتاسىپ, ەلىمىزدەگى بارلىق كىتاپ قورى ەلەكتروندى فورماتقا كوشىرىلەدى. كىتاپحانالاردا جاستارعا ارنالعان قىزىقتى لەكتسيالار ۇيىمداستىرىلىپ, پىكىرتالاس الاڭدارى جانە تاعى باسقا يگى باستامالار دا جۇمىس ىستەيتىن بولادى.
– قازىر بۇكىل الەم قارقىندى دامىپ قانا قويماي, جەدەل وزگەرۋ ۇستىندە. سوندىقتان ءبىز دە بۇگىنگى زامان تالاپتارىنا ساي بەيىمدەلۋىمىز كەرەك. وسى ماقساتتا «نۇر وتان» پارتياسى ناقتى جوبالاردى قولعا الىپ, جۇمىستى باستاپ كەتتى. بۇل جوبالاردى جۇزەگە اسىرۋ مۇمكىندىكتەرى جان-جاقتى ساراپتالىپ, ءتيىمدى تەتىكتەرى الدىن الا مۇقيات زەرتتەلدى. پارتيا وسىنداي ناقتى جوبالار ارقىلى ەلباسى ايقىنداپ بەرگەن ماقسات-مىندەتتەردى تابىستى جۇزەگە اسىرىپ, ستراتەگيالىق باستامالارعا بەلسەنە قاتىساتىن بولادى, – دەگەن ماۋلەن اشىمباەۆ مۇنداي اۋقىمدى جۇمىستى پارتيا مەملەكەتتىك ورگاندار, بيزنەس قاۋىمداستىق جانە ۇكىمەتتىك ەمەس ۇيىمدارمەن بىرلەسىپ اتقاراتىنىن اتاپ ءوتتى.
سونىمەن قاتار جيىن بارىسىندا پرەمەر-ءمينيستردىڭ ورىنباسارى اسقار جۇماعاليەۆ ەلباسى تاپسىرماسىنا سايكەس «تسيفرلى قازاقستان» باعدارلاماسى بەكىتىلىپ, 5 ناقتى باعىت انىقتالعانىن تىلگە تيەك ەتتى.
«ولاردىڭ ىشىندە, ادامي كاپيتال, تسيفرلى ۇكىمەت, تسيفرلى ەكونوميكا, يننوۆاتسيالى ەكوجۇيە جانە تسيفرلى جىبەك جولى نەمەسە ينفراقۇرىلىمدى دامىتۋ بار. ولار حالىقتىڭ ءومىر ءسۇرۋ ساپاسىن جاقسارتۋعا ارنالعان. ولاردىڭ ەڭ ماڭىزدىسى ادامي كاپيتال. ادامي كاپيتالدىڭ كومەگى ارقىلى بارلىق باعىت جۇزەگە اسىرىلادى. بالالارعا ارنالعان تەگىن IT-سىنىپتاردىڭ كوتەرەر جۇگى سالماقتى بولماق. بۇل جوبا اياسىندا ەلىمىز بويىنشا 1000 ءىت-سىنىپتىڭ, جوعارى وقۋ ورىندارىنىڭ بازاسىندا 20 ءىت-ورتالىق اشىلاتىنى قۋانىشتى. ءبىز مۇنداي باستامالاردى قولداۋعا ءازىرمىز», دەدى اسقار جۇماعاليەۆ.
ءوز كەزەگىندە, «اتامەكەن» ۇكپ باسقارما توراعاسى ابىلاي مىرزاحمەتوۆ تە پارتيالىق باستامالاردىڭ الەۋەتىنە نازار اۋدارىپ, وسى جولدا بيزنەس-قاۋىمداستىق تاراپىنان مەيلىنشە قولداۋ كورسەتىلەتىنىن ايتتى.
راۋان قايدار,
«ەگەمەن قازاقستان»
