ورتالىقتىڭ نەوناتولوگ دارىگەرى لوندونداعى الەمدەگى بەس وزىق بالالار كلينيكاسىنىڭ بىرىندە تاجىريبە جيناقتادى. بيىل مۇنداعى دارىگەرلەر قاتارى اسا ءزارۋ 10 مامانمەن – اكۋشەر-گينەكولوگتارمەن, پەدياتر-نەوناتولوگتارمەن تولىقپاق. سونىمەن قاتار ورتالىققا شەتەلدەن زاماناۋي مەديتسينالىق قۇرال-جابدىقتار ساتىپ الىنۋدا. جاقىندا نەيروحيرۋرگتەرگە قاجەتتى نەيروناۆيگاتورلار مەن سال اۋرۋىنا شالدىققان بالالارعا ارنالعان روبوتتىق جاتتىعۋ قۇرالدارى ساتىپ الىنباق. انا مەن بالا ورتالىعىنىڭ ديرەكتورى ەرمەك وماربەكوۆتىڭ ايتۋىنشا, ورتالىق ماماندارىنىڭ شەت مەملەكەتتەردە ءبىلىمىن جەتىلدىرۋىنە, سوڭعى ۇلگىدەگى جابدىقتارمەن قامتىلۋىنا وڭىردەگى ءىرى كاسىپورىن – «قازتسينك» كومپانياسى كومەك قولىن سوزىپ وتىر. «كاسىپورىننىڭ قارجىلاي قولداۋى ناتيجەسىندە ورتالىق انالار مەن سابيلەردىڭ دەنساۋلىعىن ساقتاپ, جاقسارتۋعا سەپتىگىن تيگىزگەن زاماناۋي قۇرال-جابدىق, تەحنيكالارمەن جابدىقتالدى. 2018 جىلى وقۋ ورنىن ءبىتىرىپ, «انا مەن بالا ورتالىعىنا جۇمىسقا تۇرعان جاس دارىگەرلەردىڭ ءبارىنىڭ كوتەرمە اقشاسىن تولەۋگە دە كومپانيا قاراجات ءبولۋدى جوسپارلاپ وتىر», دەيدى ورتالىق ديرەكتورى.
انا مەن بالا دەنساۋلىعىنا بەيجاي قاراماي, قولدان كەلگەن كومەگىن كورسەتىپ جاتقان «قازتسينك» جشس-ءنىڭ اكىمشىلىك ماسەلەلەر جونىندەگى اتقارۋشى ديرەكتورى اندرەي لازارەۆ كاسىپورىن قارجىسىنا ساتىپ الىنعان قۇرال-جابدىقتار ورتالىقتىڭ بولىمشەلەرىندە جۇمىس ىستەپ تۇرعانىن ايتادى. «مەملەكەت-جەكەمەنشىك ارىپتەستىگى نەگىزىندە كومپانيا قولداۋىنا سۇيەنە وتىرىپ, ورتالىق دارىگەرلەرى دياگنوستيكالىق تالداۋلار جاساۋدىڭ, وتانىڭ جاڭا تۇرلەرىن مەڭگەرىپ جاتىر. بۇگىندە ورتالىقتا لاپاروسكوپيالىق حيرۋرگيا تاسىلدەرى قولدانىلۋدا. انا مەن بالا دەنساۋلىعىن جاقسارتۋ ءۇشىن قانداي قامقورلىق جاسالسا دا ارتىقتىق ەتپەيدى. بۇل ءبىزدىڭ الەۋمەتتىك جۇمىسىمىزدىڭ باسىم باعىتتارىنىڭ ءبىرى», دەيدى ول.
ازامات قاسىم,
«ەگەمەن قازاقستان»
وسكەمەن
