الماز ەرجاننىڭ مۇمكىندىگى شەكتەۋلى, ارباسىز ءبىر قادام باسا المايتىن جان. بىراق ءتانىنىڭ كەمتارلىعى بولعانىمەن, جانى باي الماز وزگەلەر ءۇشىن پايدالى ءىس جاساۋدى باستاعان. ءسويتىپ ول الدىمەن «ELAMAN» الەۋمەتتىك يننوۆاتسيالىق جوبالار قورىن اشادى. ارباعا تاڭىلعان جانداردىڭ باسىنداعى بارلىق پروبلەمالاردى تۇبىرىنەن تانيتىن المازعا مۇمكىندىگى شەكتەۋلى جانداردى الەۋمەتتىك ورتاعا بەيىمدەپ, ولاردىڭ بيزنەستەرىن اشىپ, قوعامداعى بارلىق ماسەلەلەردى شەشۋگە ءۇن قوساتىنداي تولىققاندى ازاماتتىق سەزىمدى قالىپتاستىرۋ قاجەت دەگەن وي ۇيالايدى. وسىلايشا تالاي ەسىكتى قاعىپ, جاقسى ىسكە مۇرىندىق بولدى. ونىڭ قۋانىشىنا وراي استانا قالالىق اكىمدىگى قولداۋ كورسەتىپ, قالانىڭ ورتالىق كوشەسىنىڭ بىرىندەگى جاڭا ءۇيدىڭ ءبىرىنشى قاباتىنان اربامەن كىرىپ-شىعۋعا قولايلى كەڭسە بەردى. «Beeline قازاقستان» المازدىڭ ءوتىنىشىن جەرگە تاستاماي, «شەكسىز مۇكىندىكتەر» رەسپۋبليكالىق قايىرىمدىلىق جوباسى شەڭبەرىندە ينكليۋزيۆتى ديزاين ورتالىعىن اشىپ, ارباعا تاڭىلعان جانداردى ەڭبەكپەن قامتۋعا جانە الەۋمەتتىك ورتاعا بەيىمدەۋگە ارنالعان ۇيىمدى كومپيۋتەرلەرمەن جانە تەگىن ۇشقىر ينتەرنەتپەن جابدىقتادى. جاڭا كەڭسەدە وقۋ ورتالىعى, شىعارماشىلىق بەيىمدەۋ كلۋبى جانە پسيحولوگيالىق قولداۋ كورسەتۋگە جانە مۇگەدەكتەردىڭ قۇقىعى تۋرالى اقپارات بەرۋگە ارنالعان call-ورتالىق بار ەكەن. ۇيىمنىڭ ءوزىنىڭ اقپاراتتىق ارناسى – www.inva.kz سايتى مەن «ينكليۋزيا» YouTube-ارناسىن اشۋعا دا قولۇشىن سوزىپتى.
«ELAMAN» الەۋمەتتىك يننوۆاتسيالىق جوبالار» قق توراعاسى الماز ەرجانمەن وسى ءبىر قۋانىشتى ساتتە كەزدەستىم. مۇمكىندىگى شەكتەۋلى ادامدار كەزدەسەتىن كەدەرگىلەر وتە كوپ. قاراپايىم كوپشىلىك وعان ءتىپتى ءمان دە بەرىپ جاتپايدى. ولار ءۇشىن ەش پروبلەماسى جوق نارسەلەر, مىسالى, قوعامدىق كولىككە وتىرۋ, الدەبىر كەڭسەگە جۇمىسىڭ بويىنشا كىرىپ-شىعۋ, تاعى دا باسقا تولىپ جاتقان ەلەۋسىز دۇنيەلەر ارباسىز قوزعالا المايتىندار ءۇشىن ۇلكەن قيىندىقپەن كەلەدى. سوندىقتان ءبىزدىڭ ورتالىق وسىنداي ادامدار ءۇشىن جۇمىس اتقارادى. قانشا مۇگەدەك دەسەڭىز دە مۇمكىندىگى شەكتەۋلى ادامداردىڭ جاقىندارىنا ماسىل بولعىسى كەلمەيدى, ءارى وزدەرىنە جاردەماقى, زەينەتاقى بەرىپ وتىرعان قوعامعا دا پايداسىن تيگىزگىلەرى كەلەدى. بىراق كوپشىلىگى نە ىستەۋ كەرەك, نەدەن باستاۋ كەرەك دەگەننەن بەيحابار. ماسەلەن, «Beeline قازاقستان» كومەگى ءبىز ءۇشىن ناعىز تاپتىرمايتىن ولجا بولدى. ەندى ءبىز YouTube-ارناسى ارقىلى ەفيرگە شىعىپ, ءبىر استاناداعى عانا ەمەس باسقا وڭىرلەردەگى وسىنداي جاندارعا كەرەك كەڭەستى, ۇلگى بولاتىن ىستەردى ناسيحاتتاپ وتىرماقشىمىز.
ەلىمىزدە مۇمكىندىگى شەكتەۋلى ميلليونعا جۋىق ادام بار, ءبىز سولار كەزىگەتىن شەكتەۋلەردى ازايتۋعا ۇلەس قوسساق دەيمىز, ويتكەنى ول پروبلەمالاردى ءدال بىزدەي ۇعىنىپ, شەشۋگە مۇددەلى بولىپ ۇمتىلاتىندار از. قازىردىڭ وزىندە وسى ورتالىققا مۇمكىندىگى شەكتەۋلى 6 ادام جۇمىسقا الىندى.
مەن ءوزىم ءتارىزدى ادامدارعا بىلاي دەگىم كەلەدى. ۇيدە جاتىپ ايعايلاي بەرەتىن ۋاقىت وتكەن, سوزدەن ىسكە كوشەتىن مەزگىل ابدەن ءپىسىپ جەتتى. بارلىق كۇش-جىگەرىمىزدى, اقىلىمىزدى سالىپ, رۋحىمىزدى جانىپ, ءوزىمىزدىڭ ءومىرىمىزدى وزگەرتۋگە ءتيىسپىز. بۇل ورتالىق سونىڭ تەك باسى. ورتالىقتىڭ «ينكليۋزيۆتى ديزاين» اتاۋى – استاناداعى مۇمكىندىگى شەكتەۋلى جاندارعا كەدەرگىسىز ورتا قۇرساق دەگەن ماقساتىمىزدان تۋىندادى. ءبىز كوماندانى جيناپ, كەڭسەنى جالعا الدىق, ارباعا تاڭىلعان جانداردىڭ قاجەتتىلىكتەرىن ەسكەرە وتىرىپ, ونى جوندەدىك, بۇعان دا ءبىراز جاناشىر جاندار تابىلىپ, جوندەۋ جۇمىستارىن اتقارىپ بەردى. بۇل ۇزاق مەرزىمدى جوبا, العا قويعان جوسپارلارىمىز وتە كوپ. سونىڭ ىشىندە ءبىز ساراپشىلاردى, ەرىكتىلەردى دايىنداۋ كۋرستارىن اشامىز, الەۋمەتتىك كاسىپكەرلىكپەن اينالىسقىسى كەلگەندەردى تاعىلىمدامادان وتكىزەمىز, مۇمكىندىگى شەكتەۋلى جاندارعا تەگىن زاڭگەرلىك كەڭەس بەرەمىز. Beeline ءبىزدى تەحنولوگيالىق بازامەن قامتاماسىز ەتتى جانە بۇل بىزگە ءتيىمدى جۇمىس ىستەۋ ءۇشىن ونلاين-كۋرستاردى, بەينە-كونفەرەنتسيالاردى تولىققاندى جۇرگىزۋگە, پورتال مەن YouTube ارناسىن جانە باسقا دا رەسۋرستاردى دامىتۋعا مۇمكىندىك بەرۋدە, سوندىقتان ءبىر يگى ءىستىڭ جاقسى باستاماسىنا قۋانىپ تۇرعان جاي بار, دەيدى.
ارباعا تاڭىلعان جاندارعا ارنالعان جاڭا رەسۋرس ورتالىعىنىڭ باعدارلاماعا قوسىلۋى تۋرالى Beeline قازاقستاننىڭ كورپوراتيۆتى كوممۋنيكاتسيا جونىندەگى ديرەكتورى الەكسەي بەنزدى سوزگە تارتقاندا: ء«بىزدىڭ كومپانيا ءۇشىن الەۋمەتتىك تۇرعىدا ءالسىز جاندارعا كومەك بەرۋدە بەلگىلى ءبىر ءتارتىپ بار. ءبىز اۋرۋ بالانىڭ وپەراتسياسىنا قاجەت قارجىنى اۋدارىپ بەرە المايمىز, ال مىناداي جوبالارعا قولداۋ كورسەتۋگە قۋانا كەلىسەمىز. وسىعان دەيىن ەلىمىزدىڭ بارلىق قالالارىندا بالالارعا ارنالعان تەگىن ينتەرنەتپەن جابدىقتالعان 25 ورتالىق اشقان بولاتىنبىز. ال «ELAMAN» بويىنشا جاعداي وزگەشە. جالپى, قايدا دا مۇمكىندىگى شەكتەۋلى جانداردىڭ پروبلەمالارىنا قولۇشىن بەرەتىندەر از. الماز جاساپ جۇرگەن ءىستى قول-اياعى بالعاداي, دەنى ساۋ ادام اتقارمايدى. مۇنداي جاندار كوپكە ۇلگى. قولىم جوق دەمەي اياعىمەن سۋرەت سالىپ, اس ءىشىپ, كومپيۋتەر باسىپ ەڭبەك ەتكەن جانداردى كوردىم. اياعىم جۇرمەيدى دەپ وتىرىپ قالماي كوپ ءۇشىن كوپ ەسىكتى اشىپ, جاعداي جاساعان المازدىڭ ەڭبەگى زور دەسە وسى كومپانيانىڭ كورپوراتيۆتىك الەۋمەتتىك جاۋاپكەرشىلىك جونىندەگى مەنەدجەرى انار جۇماعۇلوۆا: «بيزنەستىڭ الەۋمەتتىك جاۋاپكەرشىلىگى تۋرالى بيىك مىنبەرلەردەن ءجيى ماسەلە كوتەرىلەدى. ونى ەلباسى دا ايتتى. ال ءبىزدىڭ كومپانيا بۇل باعىتتا جۇيەلى جۇمىس اتقارۋدا. نەگىزى ادامگەرشىلىك تۇرعىسىنان العاندا دا مۇمكىندىگى شەكتەلگەن ادامعا جاردەم بەرگەن دۇرىس. سوندىقتان ونى جابدىقتاعاندا قولايلى بولۋى باستى نازاردا ۇستالدى», دەيدى.
شىنىندا ۇستەلدەردىڭ ءتۇرلى دەڭگەيگە كوتەرىلىپ, ءتۇسۋى, جىلجۋى, اربانىڭ اينالىپ كىرىپ-شىعۋىنا ىڭعايلىلىعىنىڭ ءبارى قاراستىرىلعان ەكەن. وسىلايشا «ELAMAN» ينكليۋزيۆتى ديزاين ورتالىعىنىڭ يگىلىگى مۇمكىندىگى شەكتەۋلى جاندارعا ەسىگىن ايقارا اشتى.
انار تولەۋحانقىزى,
«ەگەمەن قازاقستان»
