سۋرەتتى تۇسىرگەن ايباتىر نۇراش
ەلەكتروندىق كەزەك جۇيەسى وتە قولايلى, ەمحاناعا كەلگەن پاتسيەنتتىڭ جسن ءنومىرىن ارنايى قۇرىلعىعا جاقىنداتقان كەزدە, ول ادامنىڭ بارلىق دارىگەرلىك مالىمەتتەرى مونيتوردا دايىن تۇرادى. بۇل دارىگەرلەردى قاعازباستىلىقتان ارىلتىپ, التىن ۋاقىتىن قۇجات تولتىرۋعا ەمەس, ناۋقاسپەن سويلەسىپ, ەم جاساۋعا ارنايتىن بولادى – ەلىمىزدە قولعا الىنىپ جاتقان جاڭا جوبانىڭ ارتىقشىلىقتارىنىڭ ءبىرى وسىنداي. مينيستر قاناتقاقتى جوبا اياسىندا قولدانىسقا ەنگىزىلىپ جاتقان وزگەرىستەرمەن جاقىن تانىستى.
باتىس قازاقستان وبلىسىندا قولعا الىنعان جاڭا جوبانىڭ ءبىرى – ترياج جۇيەسى. اۋرۋحانا ەدەنىندەگى قىزىل, سارى, جاسىل جولاقتار ناۋقاستىڭ قاي توپقا جاتاتىندىعىنان حابار بەرەدى. ماسەلەن, قىزىل ءتۇس – اۋىر دارەجە, سارى ءتۇس- ورتا دارەجە, جاسىل ءتۇس – تەكسەرىلىپ, كومەك كورسەتىلەتىن دارەجەدەگى ناۋقاستار ەكەندىگىن بىلدىرەدى.
مينيسترگە وڭىردە قولعا الىنىپ جاتقان جوبالار تۋرالى تانىستىرعان باتىس قازاقستان وبلىسىنىڭ اكىمى التاي كولگىنوۆ مەملەكەتتىك جەكەمەنشىك ارىپتەستىك اياسىندا «دجەنەرال ەلەكتريك» فيرماسىنان جاڭا مرت اپپاراتى الىناتىنىن مالىمدەدى.
- وزگە وڭىرلەرمەن سالىستىرعاندا باتىس قازاقستان وبلىسىنداعى دەنساۋلىق ساقتاۋ باعدارلاماسىنىڭ ينديكاتورلارى جوعارى. ماسەلەن, انا مەن بالا ءولىمىنىڭ كورسەتكىشى تومەن, ناۋقاس سانى ۇنەمى باقىلاۋدا. دەنساۋلىق سالاسىنداعى ينۆەستيتسيا كولەمى دە جىل سايىن ءوسىپ كەلەدى, - دەدى دەنساۋلىق ساقتاۋ ءمينيسترى ەلجان ءبىرتانوۆ.
قازبەك قۇتتىمۇرات ۇلى,
«ەگەمەن قازاقستان»
ورال قالاسى
