وسىعان جالعاسقان ەكىنشى جاعىمدى جاڭالىق تا كوپ كۇتتىرمەدى. امەريكا قۇراما شتاتتارىنىڭ سان-فرانتسيسكو قالاسىندا ورنالاسقان حالىقارالىق ارت-ورتالىعى 2018 جىلعى دجەك لوندون اتىنداعى حالىقارالىق ادەبي سىيلىعىنىڭ لاۋرەاتتارىن جاريا ەتتى. ناق وسى سان-فرانتسيسكو قالاسىندا 1876 جىلدىڭ 12 قاڭتارىندا بۇكىل الەم امەريكانىڭ ايگىلى جازۋشىسى ءھام قوعام قايراتكەرى دجەك لوندون رەتىندە بىلەتىن دجون گريففيت چەيني دۇنيەگە كەلگەن بولاتىن.
وسىناۋ مارتەبەلى سىيلىقپەن ماراپاتتالعان ءار ەلدىڭ ءماشھۇر جازۋشىلارىنىڭ اراسىندا كورنەكتى قازاق جازۋشىسى روللان سەيسەنباەۆ تا بار. ونىڭ «قۇم كەزگەن ولىكتەر» رومان-ەپوسى ءححى عاسىردىڭ تاڭداۋلى روماندارىنىڭ ءبىرى دەپ تانىلدى.
قازاق رۋحانياتىنىڭ قابىرعالى وكىلدەرى قاتارىنداعى قارىمدى قالامگەر ء«وزىمدى ىزدەپ ءجۇرمىن» اتتى العاشقى پروزالىق جيناعىمەن-اق وقىرمان جۇرەگىن جاۋلاپ, ادەبيەتىمىزگە ولجا سالار ويلى جازۋشىنىڭ كەلگەنىن اڭعارتقان ەدى. كەيىن ول «شايتاننىڭ تاعى», «قۇم كەزگەن ولىكتەر», «دۇنيە تاس-تالقان بولعان كۇن» سياقتى سۇبەلى روماندار جازىپ, جاڭا شىعارماشىلىق بەلەستەرگە كوتەرىلدى. الەمدىك دەڭگەيدەگى كلاسسيگىمىز ءابىش كەكىلباەۆ باستاعان ارىپتەستەرى بۇل ەلەۋلى ەڭبەكتەرىنە جوعارى باعا بەردى. ماسكەۋدىڭ بەدەلدى باسپالارىنان بىرنەشە كىتابى ورىس تىلىندە جارىق كوردى. كوپتەگەن پەسالارى ەلىمىز تەاترلارىنىڭ ساحناسىندا قويىلدى. ۇلى ابايدىڭ ولەڭدەرىن, قارا سوزدەرىن دۇنيە جۇزىنە تانىتۋعا ايانباي اتسالىستى. «امانات» جۋرنالى ارقىلى الەم ادەبيەتىنىڭ ءىنجۋ-مارجاندارىن قازاقشاعا اۋدارىپ, كوپشىلىك يگىلىگىنە جاراتتى. ەندەشە ارداقتى اعامىزدىڭ الداعى ۋاقىتتاردا دا تابىستى ەڭبەك ەتە بەرۋىنە تىلەكتەستىگىمىزدى بىلدىرەمىز.
قورعانبەك امانجول,
«ەگەمەن قازاقستان»
