رەتى كەلگەندە ايتا كەتۋ كەرەك, بالەتتىڭ مۋزىكاسى مەن ليبرەتتوسىن قازاقستان كومپوزيتورلار وداعىنىڭ مۇشەسى, ونەر شەبەرى جانە مادەنيەت ءبولىمىنىڭ باسشىسى ايسۇلۋ تاني جازدى. ال رەجيسسەر-حورەوگرافى – ۇكىلى ىبىراي اتىنداعى اقمولا وبلىستىق فيلارمونياسىنىڭ حورەوگرافى گۇلميرا ورداباەۆا. ال بالەتتىڭ جەكە ورىنداۋشىلارى – مەدينا نۇرماعامبەتوۆا مەن تيمۋر بوريسوۆ. قويىلىم استانانىڭ كورىكتى جەرلەرىنىڭ سۇلۋلىعىن سيپاتتايتىن 10 سۋرەتتەن تۇرادى. حورەوگرافيا اكادەمياسى, «شابىت» شىعارماشىلىق ءۇيى, بەيبىتشىلىك پەن كەلىسىم سارايى جانە تاعى باسقالارى باستى كەيىپكەردى ساۋلەت ونەرىنىڭ اسەمدىگىمەن تاڭعالدىرىپ, ارمانىن بيىكتە شالقىتادى. بۇندا نازىك سەزىم, ومىرگە قۇشتارلىق, عاشىقتىق پەن ءمولدىر ماحاببات جاتىر. استانا – ارمان مەن ءۇمىتتىڭ قالاسى! جالپى, بالەتكە 116 ادام قاتىستى. شىعارمانىڭ باستى ەرەكشەلىگى – حورەوگرافيانىڭ ءتورت ءتۇرلى باعىتىن, ياعني بالەت حالىقتىق, قازىرگى زامانعى جانە بال بيلەرىنىڭ بىرىگۋى. سونىمەن قاتار بارلىق بالەت ارتىستەرى قالانىڭ اۋەسقوي شىعارماشىلىق ۇجىمدارىنىڭ – حالىقتىق بالەت ستۋدياسى, «سەرپانتين», «رادۋگا», «ەكسكليۋزيۆ» جانە «نۇر» انسامبلدەرىنىڭ مۇشەلەرى ەكەنىن ايتا كەتۋ كەرەك.
اسقار تۇراپباي ۇلى,
«ەگەمەن قازاقستان»
اقمولا وبلىسى
