چەمپيونات قورىتىندىسى بويىنشا 1-ءشى جانە 2-ءشى ورىنعا قول جەتكىزگەن قۇرامالار ا توبىنىڭ جوعارى ديۆيزيونىندا, ياعني توپ ديۆيزيوندا ويناۋعا مۇمكىندىك الادى. سوڭعى ورىندا قالىپ قويعان ۇجىم ۆ توبىنىڭ ءى ديۆيزيونىنا سىرعيدى. ال قازاقستانمەن ءبىر توپتا باق سىنايتىن قۇرامالار قاتارىندا سلوۆەنيا, يتاليا, پولشا, ۆەنگريا جانە ۇلىبريتانيا بار.
ەلىمىزدىڭ حوككەيشىلەرىن الەمدىك دوداعا باس باپكەر عالىم مامبەتاليەۆ باستاپ بارادى. ول قۇراما ساپىنا نەگىزىنەن قۇرلىقتىق حوككەي ليگاسىندا (قحل) وينايتىن «بارىس» كلۋبىنىڭ حوككەيشىلەرىن كوپتەپ تارتىپ وتىر. سونداي-اق ءىشىنارا جوعارى حوككەي ليگاسىنان (جحل), قازاقستان چەمپيوناتى مەن جاستار حوككەي ليگاسىنان (جحل) ويىنشىلار بار. قۇراما ساپىنداعى حوككەيشىلەردىڭ اتى-جوندەرىنىڭ ىشىنەن حالىقارالىق سىندارعا قاتىسۋدان تاجىريبەسى مول تالعات جايلاۋوۆتىڭ ەسىمىن كوزىمىزدىڭ شالماعانى كوڭىلىمىزدى ءتۇسىرىپ تاستاعانىن دا جاسىرماساق كەرەك.
ءبىر قۋانتاتىنى, ع.مامبەتاليەۆ قۇراما ساپىنا ت.جايلاۋوۆ پەن ن.بەلگىباەۆتى الماعانىمەن, جاستار حوككەي ليگاسىندا ونەر كورسەتەتىن «قار بارىسىنان» جاس حوككەيشى سامات دانيار مەن استانانىڭ «نومادىنان» ماديار يبرايبەكوۆتى قوسىپتى. وسى جەردە حالىقارالىق حوككەي فەدەراتسياسىنىڭ ءبىر شۆەتسيالىق پەن ءتورت رەسەيلىك حوككەيشىنىڭ قازاقستان قۇراماسىندا ويناۋىنا رەسمي تۇردە رۇقسات بەرگەنىن ايتا كەتەيىك. ولار: «سۋ جاڭا» قازاقستان ازاماتتارى – قاقپاشى حەنريك كارلسسون, قورعاۋشىلار ەگور شالاپوۆ پەن رومان راچينسكي, شابۋىلشىلار دميتري گۋركوۆ پەن ەگور پەتۋحوۆ. بۇلاردىڭ اراسىنداعى ەڭ تانىمالى – سكانديناۆيا وكىلى. ول «بارىس» ساپىندا 101 ويىن وتكىزسە, شۆەتسيا قۇراماسىنىڭ دا نامىسىن قورعاپ ۇلگەرگەن, بىراق ءبارى دە رەسمي ەمەس ويىنداردا. سوندىقتان قازاقستان قۇراماسىندا ويناۋىنا مۇمكىندىك بەرىلىپ وتىر. چەمپيوناتقا قازاقستاندىقتار قاتارىندا كانادالىق قورعاۋشى كەۆين داللمەننىڭ دە بارۋى ابدەن مۇمكىن.
ع.مامبەتاليەۆ الەم چەمپيوناتىنىڭ ءى ديۆيزيونىندا ەليتالى توپقا جولداما ءۇشىن ءىس جۇزىندە بارلىق قارسىلاستارى تالاسا الاتىنىن مالىمدەدى. «بارلىق قارسىلاستارىمىز سايدىڭ تاسىنداي مىقتى. ونىڭ ۇستىنە ۆەنگرلەر ءوز الاڭىندا وينايدى, مۇنىڭ ءوزى ولارعا قوسىمشا كۇش-جىگەر بەرەتىنى انىق. سونداي-اق ۆەنگرلەر ەۋروچەللەندجدە دە وزدەرىن جاقسى جاعىنان كورسەتتى, بىزدەن باسقا ەشكىمنەن جەڭىلگەن جوق», دەدى ول. باس باپكەر سونىمەن قاتار سلوۆەنيا قۇراماسىن ەرەكشە بولە-جارا اتادى. سەبەبى سلوۆەنيالىقتار پحەنچحاندا وتكەن وليمپيا ويىندارىنا قاتىسقان ءى ديۆيزيوندا باسەكەگە تۇسەتىن قۇرامالار اراسىنداعى بىردەن-ءبىر قۇراما بولىپ تابىلادى. «پولياكتاردى دا ەسەپتەن شىعارىپ تاستاۋعا بولمايدى, – دەيدى ع.مامبەتاليەۆ. – يتاليا قۇراماسىنىڭ كوپتەگەن ويىنشىلارى كانادا مەكتەبىنەن وتكەن. قىسقاسى, بارلىق قارسىلاستارىمىز جولداما الۋعا لايىقتى».
ۇستىمىزدەگى جىلدىڭ اقپان ايىنىڭ ورتاسىندا قازاقستان قۇراماسى وسى ءى ديۆيزيوندا ونەر كورسەتەتىن ءتورت كوماندا – قازاقستان, پولشا, يتاليا جانە ۆەنگريا قۇرامالارى قاتىسقان ەۋروچەللەندج كۋبوگىن جەڭىپ العان بولاتىن. سول جولى جەرلەستەرىمىز ءۇش جەڭىسىنە دە نەگىزگى ۋاقىتتا قول جەتكىزگەن ەدى. اتاپ ايتقاندا, يتاليانى 1:0, پولشانى 4:1 جانە ۆەنگريانى 5:2 ەسەبىمەن ۇتقان بولاتىن. تاعى ءبىر ەرەكشە اتاپ كورسەتەتىن جايت, وتكەن جىلى كيەۆتە وتكەن الەم چەمپيوناتىندا قازاقستان قۇراماسى 2007 جىلدان بەرى العاش رەت الەمدىك بىرىنشىلىكتىڭ جوعارى ديۆيزيونىنا ءبىرىنشى ۇمتىلىسىنان وتە الماي سۇرىنگەن-ءتىن. جانە ەليتالى توپتا قاتارىنان ەكى جىل تۇراقتاپ قالۋعا دا قول جەتكىزە الماي كەلە جاتىر. كەيبىر جانكۇيەرلەر ءازىل-شىنى ارالاس ايتىپ جۇرگەنىندەي, ءبىرىنشى جانە جوعارى ديۆيزيون ارالىعىنداعى «ليفتىدە» جوعارى-تومەن سىرعۋمەن ءجۇر.
قۇرامانىڭ باس باپكەرى تۋرالى وسكەمەننىڭ «تورپەدو» كومانداسىنىڭ بۇرىنعى باسشىلارىنىڭ ءبىرى يۋري پەتۋحوۆ بىلاي دەيدى: «مەنىڭشە, بيىلعى قۇراما وتە ءالسىز. بۇعان قوسا, باس باپكەردىڭ دە جوعارى دەڭگەيدە تابىسقا قول جەتكىزەتىنىنە سەنبەيمىن. قازاقستان بىرىنشىلىگىندە باپكەرلىك قىزمەت اتقارۋ مەن الەم چەمپيوناتىنا باراتىن قۇرامانى باپتاۋدىڭ اراسىندا جەر مەن كوكتەي ايىرماشىلىق بار».
سونىمەن نەگىزىنەن «بارىس» سياقتى قحل-دىڭ پلەي-وفف كەزەڭىنە دە وتە الماعان كوماندادان جاساقتالعان قۇرامادان شىنىندا دا وڭ ناتيجە كۇتۋ قيىنداۋ سياقتى. ونىڭ ۇستىنە باس باپكەر عالىم مامبەتاليەۆ, يۋري پەتۋحوۆ اتاپ وتكەندەي, ۇلكەن جارىستاردا سىنالماعان تاجىريبەسى از مامان سانالادى. بىراق قازاقستاندىق حوككەي جانكۇيەرلەرىنىڭ تەلەديدارعا ۇلكەن ۇمىتپەن كوز تىگەتىنى انىق.
سامات مۇسا,
«ەگەمەن قازاقستان»
